"ومىرلىك قيىن جاعدايدا قالعان قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋ جونىندە ۋاقتىلى كومەك كورسەتۋ ماقساتىندا قاۋلى ەتەمىن:
1. قازاقستان رەسپۋبليكاسىنىڭ ۇكىمەتى ەكىنشى دەڭگەيدەگى بانكتەردەگى جانە ميكروقارجى ۇيىمدارىنداعى كەپىلسىز تۇتىنۋشىلىق قارىزدارى بويىنشا مىناداي جاعدايلاردا:
1) اتالعان قارىزدار بويىنشا بورىشكەرلەر كوپبالالى وتباسىلار، اسىراۋشىسىنان ايرىلۋ جاعدايىنا بايلانىستى تولەم الاتىن وتباسىلار، مۇگەدەك بالالارى بار، 18 جاستان اسقان، بالا جاسىنان مۇگەدەكتەر بار وتباسىلار، اتاۋلى مەملەكەتتىك الەۋمەتتىك كومەك الاتىندار، جەتىم بالالار، اتا-اناسىنان كامەلەتتىك جاسقا دەيىن ايىرىلعان، جيىرما توعىز جاسقا تولماعان، اتا-انانىڭ قامقورلىعىنسىز قالعان بالالار؛
2) قارىز بويىنشا جالپى بەرەشەگى 2019 جىلعى 1 ماۋسىمداعى جاعداي بويىنشا 3 000 000 (ءۇش ميلليون) تەڭگەدەن اسپايتىن بولسا؛
3) ءبىر قارىز الۋشىعا 2019 جىلعى 1 ماۋسىمداعى جاعداي بويىنشا نەگىزگى بورىشى مەن وعان ەسەپتەلگەن سىياقىدان تۇراتىن وتەلەتىن بەرەشەگىنىڭ مولشەرى 300 000 (ءۇش ءجۇز مىڭ) تەڭگەدەن اسپايتىن بولسا، ولاردى وتەۋ بويىنشا ءبىرجولعى تارتىپتە شارالار قابىلداسىن"، - دەپ جازىلعان جارلىقتا.
جارلىقتىڭ ورىندالۋىن باقىلاۋ پرەزيدەنت اكىمشىلىگىنە جۇكتەلدى.
كىمنىڭ قارىزى وتەلەدى؟
اتالعان كومەكتى الۋ ءۇشىن جالپى نەسيەنىڭ سوماسى 1 ماۋسىمداعى جاعداي بويىنشا 3 ميلليون تەڭگەدەن اسپاۋى كەرەك. وسى ساناتتاعى ازاماتتاردىڭ 300 مىڭ تەڭگەگە دەيىنگى بەرەشەگى وتەلەدى.
"قارىز الۋشىلاردىڭ 55 پايىزى، ياعني 250 مىڭ ادام ءۇشىن ولاردىڭ كرەديتى نەگىزگى بەرەشەگى مەن سىياقىسىن قوسا العاندا تولىق وتەلەدى دەگەن ءسوز. ال باسقا ازاماتتاردىڭ قارىزىنىڭ ءبىر بولىگى 300 مىڭ تەڭگە كولەمىندە وتەلەدى. بۇل ولار ءۇشىن ايتارلىقتاي كومەك بولادى"، - دەپ ءتۇسىندىردى توقايەۆ ب ا ق وكىلدەرىمەن وتكەن كەزدەسۋدە.
