تٶڭٸرەگٸمٸز تولا ەدٸلەتسٸزدٸك. تٶڭٸرەگٸڭٸزگە كٶز جٷگٸرتٸڭٸزشٸ. وسىعان دەيٸنگٸ ٶمٸرٸڭٸزدە "ەدٸلدٸك سالتاناتتى قۇردى" دەگەندٸ ەستٸدٸڭٸز بە, وسى ەلدە?
وسى وتىز جىلدا ەدٸلدٸك ٸزدەپ مۇراتىنا جەتكەن كٸمدەردٸڭ اتىن اتاپ, تٷسٸن تٷستەپ بەرەر ەدٸڭٸز, ەگەر ەسٸڭٸزدە بولسا?
ەدٸلەتسٸزدٸككە كٷرەس اشىپ, ەدٸلدٸك ٸزدەگەندەر بولمادى ەمەس, بولدى-اۋ. ولار قايدا قازٸر? سايدا سانى, قۇمدا ٸزٸ بار ما ولاردىڭ?.. ال ەدٸلەتسٸزدٸك شە? ونىڭ قىلشىعى دا قيسايعان جوق.
"ەدٸلدٸك جەڭدٸ" دەپ تارازىعا تارتاتىن تىم قۇرىعاندا بٸر مىسال تابىلا ما بٸزدٸڭ ەلدە? ەي, قايدام...
ەسەسٸنە ەدٸلەتسٸزدٸك ەدٸلدٸك ٷستٸنە ەڭگٸر تاياق ويناتقان تالاي وقيعاعا كۋەسٸز.
ەتٸڭٸز ٶلٸپ كەتكەن. ەدٸلەتسٸز ٶمٸرگە مويىنسۇنعانىڭىز, كٶندٸگٸپ كەتكەنٸڭٸز سونشا "وسىعان دا شٷكٸر" دەگەنٸڭٸزدٸ اڭداماي قالاسىز اراسىندا.
ادام ەدٸلدٸك ٷشٸن ەمەس, ەدٸلدٸك ادام ٷشٸن جۇمىس ٸستەيتٸن ەلگٸ وزىق دامىعان وتىز ەلدٸڭ ٶمٸرٸنە قىزىعا, قىزعانا قاراۋدان ٶزگە امالىڭىز جوق.
ەدٸلدٸك ەدەمٸ سٶز عانا بٸز ٷشٸن, ال ەدٸلەتسٸزدپەن ەلبەتتە كٷنبە-كٷن بەتپە-بەت كەلەمٸز. كٷنبە-كٷن.
ايتالىق, وسى اپتادا:
«پارا العان, اقشا جىمقىرعان, قىزمەتٸن اسىرا پايدالانعان» ۆيتسە-مينيستر سۇحانبەرديەۆانىڭ سوت زالىندا بوستاندىق العانى ەدٸلەتتٸ مە?
11 ملن ٷپتەپ, 6 ملن ٶتەپ قۇتىلعان ونىڭ تٶسەگٸندە تىنىش ۇيىقتارىنا كٷمەن-كٷدٸگٸڭٸز بولماسىن. پارامەن ۇستالىپ, ايىپپۇلمەن قۇتىلعاندارداردىڭ اراسىندا سۇحانبەرديەۆا العاشقىسى دا, سوڭعىسى دا ەمەس. ەدٸلەتسٸزدٸك ولاردى, وندايلاردى قاناتىنىڭ استىنا الادى ەردايىم.
ٶمٸرٸنٸڭ ون جىلىن تەمٸر توردا ٶتكەرگەن مۇحتار جەكٸشەۆتٸڭ وبالى كٸمگە? ونى تٷرمەدە شٸرٸتۋ كٸمنٸڭ ماقسات مۇراتى? ەدٸلەتسٸزدٸك جەكٸشەۆتٸ جاسىتقان جوق, ەيتسە دە وسى ەدٸلەتتٸ مە?
سۇحانبەرديەۆا مەن جەكٸشەۆتٸڭ سوتى - قازاقستاندى توقاەۆ ەمەس, ەدٸلەتسٸزدٸك بيلەپ-تٶستەپ تۇرعانىن تاعى بٸر مەرتە ەشكەرەلەپ بەردٸ.
يە, تاعى بٸر مەرتە. ٶتكەن وتىز جىلدىڭ قيرالاڭ-بۇرالاڭىنا كٶز جٷگٸرتسەڭٸز ەدٸلەتسٸزدٸكتەن اياق الىپ جٷرە المايسىز.
توقاەۆ ايتاتىن ەدٸلدٸك اسپاننان تٷسپەيدٸ. وسىعان دەيٸنگٸ ەدٸلەتسٸزدٸكتەر ەشكەرەلەنبەي ەدٸلدٸك ورنامايدى ەلبەتتە. مۇنى تٷسٸنۋگە توقاەۆتىڭ تٷيسٸگٸ جەتپەيدٸ دەگەنگە سەنگٸمٸز جوق.
ەدٸلەتسٸزدٸك بٸزدٸ ەبدەن تالادى, ەبدەن...
دۋمان بىقاي
