توڭىرەگىمىز تولا ادىلەتسىزدىك. توڭىرەگىڭىزگە كوز جۇگىرتىڭىزشى. وسىعان دەيىنگى ومىرىڭىزدە "ادىلدىك سالتاناتتى قۇردى" دەگەندى ەستىدىڭىز بە، وسى ەلدە؟
وسى وتىز جىلدا ادىلدىك ىزدەپ مۇراتىنا جەتكەن كىمدەردىڭ اتىن اتاپ، ءتۇسىن تۇستەپ بەرەر ەدىڭىز، ەگەر ەسىڭىزدە بولسا؟
ادىلەتسىزدىككە كۇرەس اشىپ، ادىلدىك ىزدەگەندەر بولمادى ەمەس، بولدى-اۋ. ولار قايدا ءقازىر؟ سايدا سانى، قۇمدا ءىزى بار ما ولاردىڭ؟.. ال ادىلەتسىزدىك شە؟ ونىڭ قىلشىعى دا قيسايعان جوق.
"ادىلدىك جەڭدى" دەپ تارازىعا تارتاتىن تىم قۇرىعاندا ءبىر مىسال تابىلا ما ءبىزدىڭ ەلدە؟ ءاي، قايدام...
ەسەسىنە ادىلەتسىزدىك ادىلدىك ۇستىنە اڭگىر تاياق ويناتقان تالاي وقيعاعا كۋاسىز.
ەتىڭىز ءولىپ كەتكەن. ادىلەتسىز ومىرگە مويىنسۇنعانىڭىز، كوندىگىپ كەتكەنىڭىز سونشا "وسىعان دا شۇكىر" دەگەنىڭىزدى اڭداماي قالاسىز اراسىندا.
ادام ادىلدىك ءۇشىن ەمەس، ادىلدىك ادام ءۇشىن جۇمىس ىستەيتىن الگى وزىق دامىعان وتىز ەلدىڭ ومىرىنە قىزىعا، قىزعانا قاراۋدان وزگە امالىڭىز جوق.
ادىلدىك ادەمى ءسوز عانا ءبىز ءۇشىن، ال ادىلەتسىزدپەن البەتتە كۇنبە-كۇن بەتپە-بەت كەلەمىز. كۇنبە-كۇن.
ايتالىق، وسى اپتادا:
«پارا العان، اقشا جىمقىرعان، قىزمەتىن اسىرا پايدالانعان» ۆيسە-مينيستر سۇحانبەردييەۆانىڭ سوت زالىندا بوستاندىق العانى ادىلەتتى مە؟
11 ملن ۇپتەپ، 6 ملن وتەپ قۇتىلعان ونىڭ توسەگىندە تىنىش ۇيىقتارىنا كۇمان-كۇدىگىڭىز بولماسىن. پارامەن ۇستالىپ، ايىپپۇلمەن قۇتىلعاندارداردىڭ اراسىندا سۇحانبەردييەۆا العاشقىسى دا، سوڭعىسى دا ەمەس. ادىلەتسىزدىك ولاردى، وندايلاردى قاناتىنىڭ استىنا الادى ءاردايىم.
ءومىرىنىڭ ون جىلىن تەمىر توردا وتكەرگەن مۇحتار جاكىشيەۆتىڭ وبالى كىمگە؟ ونى تۇرمەدە ءشىرىتۋ كىمنىڭ ماقسات مۇراتى؟ ادىلەتسىزدىك جاكىشيەۆتى جاسىتقان جوق، ايتسە دە وسى ادىلەتتى مە؟
سۇحانبەردييەۆا مەن جاكىشيەۆتىڭ سوتى - قازاقستاندى توقايەۆ ەمەس، ادىلەتسىزدىك بيلەپ-توستەپ تۇرعانىن تاعى ءبىر مارتە اشكەرەلەپ بەردى.
ءيا، تاعى ءبىر مارتە. وتكەن وتىز جىلدىڭ قيرالاڭ-بۇرالاڭىنا كوز جۇگىرتسەڭىز ادىلەتسىزدىكتەن اياق الىپ جۇرە المايسىز.
توقايەۆ ايتاتىن ادىلدىك اسپاننان تۇسپەيدى. وسىعان دەيىنگى ادىلەتسىزدىكتەر اشكەرەلەنبەي ادىلدىك ورنامايدى البەتتە. مۇنى تۇسىنۋگە توقايەۆتىڭ تۇيسىگى جەتپەيدى دەگەنگە سەنگىمىز جوق.
ادىلەتسىزدىك ءبىزدى ابدەن تالادى، ابدەن...
دۋمان بىقاي
