بيىل اۋداننىڭ 2 بىردەي اۋىلى ساپالى اۋىز سۋمەن قامتاماسىز ەتىلەتىن بولادى. اتاپ ايقاندا، تۇرعىندارى ارتەزيان قۇدىقتاردان سۋ ءىشىپ كەلگەن تاعاينا اۋىلى مەن سۋ قۇبىرلارى توزعان زاعامبار اۋىلى. زاعامبار اۋىلىنداعى سۋ قۇبىرىنىڭ قۇرىلىسى اعىمداعى جىلدىڭ ءساۋىر ايىندا باستاسا، تاعايناداعى قۇرىلىس جۇمىستارى مامىر ايىندا باستاۋ العان.
ناتيجەسىندە سالىنىپ جاتقان جاڭا سۋ قۇبىرلارى اعىمداعى جىلدىڭ سوڭىنا دەيىن 6 مىڭنان اسا اۋىل تۇرعىنىن ساپالى سۋمەن قامتاماسىز ەتەتىن بولادى. سونداي-اق، اتالعان ايماقتا ءارقايسىسى 2 دانادان سىيىمدىلىعى 300 جانە 150 تەكشە مەترلىك سۋ جيناعىش-رەزەرۆۋاردىڭ قۇرىلىسى جۇزەگە اسىرىلۋدا.
تاعاينا جانە زاعامبار اۋىلدارىنا سۋ ەلدى مەكەن جانىنان انىقتالعان ۇڭعىمالاردان بەرىلەدى. ەكى اۋىلعا تارتىلاتىن سۋ وتكىزگىشتەردىڭ جالپى ۇزىندىعى – 78،327 شاقىرىمدى قۇراماق. سۋ قۇبىرى جەلىلەرىنىڭ قۇرىلىسى رەسپۋبليكالىق بيۋدجەت ەسەبىنەن جۇزەگە اسىرىلۋدا. تاعاينا اۋىلىنداعى قۇرىلىستىڭ مەردىگەرى "Star-Stroi" ءجشس-ى، ال زاعامبار اۋىلىندا سۋ قۇبىرىن "مونوليت-ديزاين-2030" ءجشس-ى جۇرگىزۋدە.
تۇركىستان وبلىسى اكىمىنىڭ باسپا ءسوز قىزمەتى
