جاپون ينجەنەرلەرى بولاشاقتا دۇنيەجۇزىندەگى ەڭ بيىك عيماراتتى تۇرعىزۋعا بەل بۋىپ وتىر. ەل استاناسى توكيودا ورنالاساتىن عيماراتتىڭ بيىكتىگى 1700 مەتر بولادى دەپ كۇتىلۋدە. وسىلايشا جاپوندار تاعا دا الەم حالقىن تاڭعالدىرۋعا وقتالۋدا.
بۇگىندە دۇنيەجۇزىندەگى ەڭ بيىك عيمارات دۋبايداعى بۋردج-حاليفا مۇناراسى ەكەنى بارشاعا ءمالىم. ونىڭ بيىكتىگى 828 مەتر. ال جاڭادان سالىناتىن عيمارات بۇدان دا بيىك بولايىن دەپ تۇر.
ينجەنەر-قۇرىلىسشىلار بيىك عيماراتتى توكيو قالاسىنىڭ وڭتۇستىك-شىعىس جاعىنداعى جاعالاۋدا سالماقشى. سونداي-اق، ولار الىپ عيماراتتىڭ اينالاسىندا بىرنەشە جاساندى ارالدار سالۋدى دا كوزدەپ وتىر. مامانداردىڭ ەسەبىنشە، عيمارات 50 مىڭ ادامعا ارنالادى. بيىك عيماراتتىڭ ىشىندە تۇرعىن جايلار، ساۋدا ورىندارى، مەيرامحانالار، ءقوناقۇي، سپورت زالدار، ەمحانا مەن كىتاپحانالار ورنالاسپاق. وسىلايشا الىپ ءۇيدى مەكەندەۋشىلەر سىرتقا شىقپاي-اق الاڭسىز تىرشىلىك ەتۋىنە جاعداي جاسالماقشى. ال عيماراتقا قاجەتتى قۋات كوزى ەكولوگيالىق تازا قۋات كوزىنەن الىناتىن بولادى. Kohn Pedersen Fox Associates جانە Leslie E. Robertson Associates كومپانيالارى قۇرىلىس جۇمىستارىن 2045 جىلعا دەيىن اياقتاۋدى جوسپارلاپ وتىر.
