2026 جىلعى 14 اقپاندا توعىزقۇمالاقتان دۇنيەجۇزىلىك، رەسپۋبليكالىق جانە وبلىستىق فەدەراسيالار باسشىلارىنىڭ قاتىسۋىمەن ماڭىزدى جۇمىس كەزدەسۋى ءوتتى. ءىس-شارا اياسىندا دۇنيەجۇزىلىك توعىزقۇمالاق فەدەراسياسىنىڭ پرەزيدەنتى ءاليحان بايمەنوۆتىڭ قاتىسۋىمەن رەسمي توعىزقۇمالاق فەدەراسيالارىنىڭ كەڭەيتىلگەن جينالىسى ۇيىمداستىرىلدى، دەپ حابارلايدى Dalanews.kz.
كەزدەسۋ بارىسىندا قازاقستان توعىزقۇمالاق فەدەراسياسىنىڭ پرەزيدەنتى اكىم تۇرسۇن توعىزقۇمالاق سپورتىن حالىقارالىق دەڭگەيدە دامىتۋ جانە ىلگەرىلەتۋ، زياتكەرلىك سپورتتىڭ بولاشاعى مەن دامۋ پەرسپەكتيۆالارى، سيفرلاندىرۋ ۇدەرىستەرىن ەنگىزۋ، سونداي-اق ءوزارا ءتيىمدى ىنتىماقتاستىقتى نىعايتۋ ماسەلەلەرى بويىنشا ەسەپتىك بايانداما جاسادى. قاتىسۋشىلار ءتيىستى سۇراقتارىن قويدى.
تاراپتار ۇلتتىق مۇرانى جاھاندىق كەڭىستىكتە كەڭىنەن ناسيحاتتاۋ، شەتەلدىك سەرىكتەستەرمەن ىنتىماقتاستىقتى كۇشەيتۋ، حالىقارالىق تۋرنيرلەردىڭ گەوگرافياسىن كەڭەيتۋ، تورەشىلەر مەن سپورتشىلاردىڭ كاسىبي بىلىكتىلىگىن ارتتىرۋ باعىتتارىنا ەرەكشە نازار اۋداردى. سونىمەن قاتار، زاماناۋي تەحنولوگيالار مەن جاساندى ينتەللەكت مۇمكىندىكتەرىن پايدالانۋ ارقىلى وقۋ-جاتتىعۋ ۇدەرىسىن جەتىلدىرۋ، ونلاين پلاتفورمالار ارقىلى ويىننىڭ قولجەتىمدىلىگىن ارتتىرۋ جانە دەرەكتەرگە نەگىزدەلگەن تالداۋ جۇيەسىن قالىپتاستىرۋدىڭ ماڭىزدىلىعى اتاپ ءوتىلدى.
دۇنيەجۇزىلىك توعىزقۇمالاق فەدەراسياسىنىڭ ۆيسە-پرەزيدەنتتەرى ماقسات رامانقۇلوۆ پەن مۇقتار مانكەيەۆ اتالعان باستامالاردى تولىق قولدايتىندىقتارىن ءبىلدىرىپ، ولاردى جەتىلدىرۋ بويىنشا ۇسىنىستارىن جەتكىزدى. سونىمەن قاتار، دۇنيەجۇزىلىك توعىزقۇمالاق فەدەراسياسىنىڭ اتقارۋشى حاتشىسى ماقسات شوتاي جانە شولپان مارات قىزى ۇلتتىق سپورت — توعىزقۇمالاقتى ودان ءارى دامىتۋعا قاتىستى ناقتى ۇسىنىستارىن ورتاعا سالدى.
جيىن بارىسىندا قازاقستان رەسپۋبليكاسى توعىزقۇمالاق سپورتى فەدەراسياسىنىڭ پرەزيدەنتى اكىم تۇرسۇنعا مينيسترلىك وكىلىنىڭ اتىنان قۇرمەت گراموتاسى تابىستالدى.
كەزدەسۋ قورىتىندىسى بويىنشا قاتىسۋشىلار الداعى كەزەڭدە بىرلەسكەن جوبالاردى جۇزەگە اسىرۋعا دايىن ەكەندىكتەرىن ءبىلدىرىپ، توعىزقۇمالاق سپورتىن جۇيەلى تۇردە دامىتۋ باعىتىنداعى جۇمىستى جالعاستىرۋعا ۋاعدالاستى.
