مەكتەپ مۇعالىمدەرى قوعامدا قىزۋ تالقىعا تۇسكەن لاتىن الىپبيىنە كوشۋدەگى ءارتۇرلى اسپەكتىلى سۇراقتار قويدى دەسەك بولادى.
لاتىن الىپبيىنە كوشكەن سوڭ كومپيۋتەردى ءوزىمىز جاساۋعا مۇمكىندىك بار دەدىڭىزدەر. ولاي بولسا، قازاق ءتىلى كيريلليسامەن تۇرعاندا نەگە جاساي المايسىزدار؟ ەكىنشىدەن، لاتىن تىلىنە كوشكەندە كومپيۋتەرلەرگە باعا تومەندەيدى دەپ نە ءۇشىن ايتتىڭىزدار؟.. لاتىن ءالىپبيىن قابىلداۋدا وزگە ەلدەر قانداي قيىندىقپەن ۇشتاسقانى تۋرالى دا ناقتى مىسالمەن ايتىپ بەرسەڭىزدەر؟ لاتىن گرافيكاسىنا كوشۋدە سانانى قالىپتاستىرا ءبىلۋ كەرەك دەيمىز. وسى تۇستا نە ايتار ەدىڭىزدەر؟
بۇل ساۋالدارعا وراي جۋرناليست قاجەت انداس، اقىن ساعىنىش نامازشاموۆا تۇسىنىكتى، ناقتى مىسالداردى تىلگە تيەك ەتە وتىرىپ، جىلىكتەپ ايتىپ بەردى. ولاردىڭ سوزىنشە، گرافيكانى اۋىستىرامىز دەپ تىلدەن ايىرىلساق، وندا قازاقتىڭ مەملەكەتى دە، تاريحى دا بولمايدى. «ءبىزدى بىرىكتىرەتىن ءتىلىمىز ەكەنىن جادىدان شىعارمايىق» دەگەن وي دا ورتاعا سالىندى.
لاتىن گرافيكاسىنا كوشۋ بويىنشا اقپاراتتىق ءتۇسىندىرۋ جۇمىس توبىنىڭ قاتىسۋمەن وتكەن جيىندا «قازاقستان» تەلەارناسىنىڭ لاتىن قارپىندە جازىلعان اتاۋىنا قاتىستى دا ساۋال قويىلدى.
بۇل ساۋالعا وراي وبلىستىق ءبىلىم باسقارماسى باسشىسىنىڭ ورىنباسارى گۇلسارا تاستاندى قىزى: «مەنىڭ ويىمشا بۇل جاقسى باستاما. ەلباسى ءوزىنىڭ ماقالاسىندا مۇنى العا تارتىپ ايتقان بولاتىن. بىرىنشىدەن، تەلەارنا اتاۋىن لاتىن گرافيكاسىمەن جازۋ ارقىلى حالىقتىڭ كوزىن ۇيرەتۋ، ەكىنشىدەن، جازىلعان اتاۋ دۇرىس پا الدە بۇرىس پا دەگەن سىندى حالىقتىڭ ويىن ءبىلۋ. ءبىر سوزبەن ايتساق، ەلدىڭ پىكىرىن انىقتاۋ. ال ءدال قازىرگى ۋاقىتتا ءالىپبيىمىز ءالى بەكىتىلگەن جوق. بەكىتىلگەن كۇننەن باستاپ مىندەتتى تۇردە وزگەرىسكە ەنەتىن بولادى» دەدى.
باسقوسۋدا وقۋشىلار تاراپى دا ءۇنسىز قالمادى. توپ مۇشەلەرىنە وزدەرىنىڭ كوكەيلەرىندە جۇرگەن «كيرريليسانى وقىپ كەلگەن ۇلكەندەر جاعى، لاتىن قارپىنە كوشكەن تۇستا ساۋاتسىز بولىپ قالماي ما؟»، «لاتىن الىپبيىنە كوشۋ ەلىمىزگە نە بەرەدى؟» سىندى سۇراقتارىن قويىپ، ءتۇششىمدى جاۋاپ الدى.
ءدال وسى كۇنى توپ مۇشەلەرى شاتىرباي، اباي سىندى ەلدى مەكەندەردىڭ حالقىمەن جۇزدەستى.
