"تەڭىز" كەن ورنىندا بولعان تەحنولوگيالىق ىركىلىسكە بايلانىستى وقيعا ورنىندا جەدەل شارالار قابىلداندى، دەپ حابارلايدى Dala News.
ەنەرگەتيكا ءمينيسترى ەرلان اقكەنجەنوۆتىڭ تاپسىرماسىمەن ۆيسە-مينيستر قايىرحان تۇتقىشبايەۆ تىكەلەي "تەڭىز" كەن ورنىندا ءجۇر. ول جاعدايدى باقىلاپ، وپەراتور كومپانيامەن ءوزارا ءىس-قيمىلدى ۇيلەستىرۋدە.
مينيسترلىكتىڭ مالىمەتىنشە، 18 قاڭتاردا بولعان گازتۋربينالىق قوندىرعىلاردىڭ اجىراۋىنا قاتىستى بارلىق ءمان-جايدى انىقتاۋ ءۇشىن ارنايى كوميسسيا قۇرىلىپ، جۇمىسىن باستادى. ونىڭ قۇرامىنا مەملەكەتتىك ەنەرگەتيكالىق قاداعالاۋ جانە باقىلاۋ كوميتەتىنىڭ اۋماقتىق دەپارتامەنتى، اتىراۋ وبلىسى اكىمدىگىنىڭ ەنەرگەتيكا باسقارماسى، جۇيەلىك وپەراتور KEGOC جانە "تەڭىزشيەۆرويل" كومپانياسىنىڭ وكىلدەرى ەندى.
مۇناي ءوندىرۋدىڭ ۋاقىتشا توقتاتىلۋى وپەراتور تاراپىنان قاۋىپسىزدىك حاتتامالارىنا سايكەس قابىلدانعان. بۇل شەشىم پەرسونال مەن جابدىقتى قورعاۋ ماقساتىندا جۇزەگە اسىرىلعان.
قازىرگى تاڭدا كوميسسيا وقيعانىڭ سەبەپتەرىن جان-جاقتى تەحنيكالىق تۇرعىدا تالداپ جاتىر. ينسيدەنتتىڭ سەبەپتەرى مەن سالدارىنا قاتىستى بارلىق رەسمي قورىتىندىلار تەك كوميسسيا جۇمىسى اياقتالعاننان كەيىن جاريالاناتىن بولادى.
مينيسترلىك جاعدايدى تولىق باقىلاۋدا ۇستاپ وتىر.
