KASE-دە تەڭگە باعامى تاعى قۇلدىرادى. 2 قاراشادا ەلوردالىق كەيبىر اقشا ايىرباس ورىندارىندا 1 اقش دوللارى 526 تەڭگەدەن، الماتىدا 523 تەڭگەدەن ساتىلا باستادى. مۇنىڭ سەبەبىن Dalanews.kz بىلىپ-كورۋگە تىرىستى.
قازاقستان قارجىگەرلەر قاۋىمداستىعىنىڭ ساراپشىلارى تەڭگەنىڭ قايتا السىرەۋىنە ۇلتتىق بانكتىڭ ينتەرۆەنسيا جۇرگىزۋدى دوعارعانى جايلى مالىمدەمەسى تۇرتكى بولۋى مۇمكىن ەكەنىن ايتادى.
"سوڭعى ەكى اپتادا 500+ دەڭگەيىن ساقتاۋ ءۇشىن قور بيرجاسىندا 1 ملرد دوللار ساتقان ۇلتتىق بانك ۆاليۋتالىق ينتەرۆەنسيا جۇرگىزۋدى دوعاراتىندارىن جانە جاقىن كۇندەرگە مۇنداي شارانىڭ جوسپارلانىپ وتىرماعانىن مالىمدەگەن بولاتىن. بۇل جولعى وسىمگە سونىڭ قاتىسى بار سەكىلدى. جالپى، ۆاليۋتا نارىعىندا تەڭگەرىمسىزدىكتىڭ تۋىنداعانىنا كوپ بولعان، ال اقشا باعامىنا قاتىستى جاڭا قۇبىلىس سونىڭ ايعاعى بولا الادى"، - دەيدى قازاقستان قارجىگەرلەرى قاۋىمداستىعى.
بۇگىن ، 2 جەلتوقساندا ۇلتتىق بانك قاراشا ايىنىڭ قورىتىندىسىن جاريالادى. مىنە، سونىڭ بارىسىندا وزدەرىنىڭ جەلتوقسان ايىندا دا بۇل شارانى جۇزەگە اسىراتىندارىن اشىپ ايتىپ، قاراشانى سابىرعا شاقىرعانداي بولدى:
"ۇكىمەتتىڭ الدىن الا بولجامدى وتىنىمدەرى بويىنشا رەسپۋبليكالىق بيۋدجەتكە ترانسفەرت بولۋگە 2024 جىلعى جەلتوقساندا ۇلتتىق بانك ۇلتتىق قوردان 800 ملن-نان 900 ملن اقش دوللارىنا دەيىنگى مولشەردە ۆاليۋتا ساتىلادى دەپ كۇتەدى".
دەگەنمەن ۇلتتىق بانك بۇل رەتتە تەك وسى ءبىر عانا جوسپارىن ايتادى. ال بۇل الدىڭعى ايداعى ۆاليۋتالىق ينتەرۆەنسياعا جۇمسالعان كولەمنەن الدەقايدا از. ونىڭ ۇستىنە ۇلتتىق بانك قاراشاداعىداي جەلتوقسان ايىندا بجزق ءۇشىن ۆاليۋتا ساتىپ الۋ جوسپارلانباعانىن اتاپ كورسەتەدى. سول سەكىلدى قاراشادا "قازاتومونەركاسىپ" اق-نىڭ اكسيالارىن ساتىپ الۋ بويىنشا مامىلەنى شىعارۋ اياسىندا ۆاليۋتا ساتۋ اياقتالدى. وسى جاعىنان العاندا، ۇلتتىق بانك قور بيرجاسىنداعى شەتەل ۆاليۋتاسى ساۋدا-ساتتىعىنا جەلتوقساندا ارالاسقانىمەن، قاراشا ايىنداعىداي قارقىندا ارەكەت المايدى. بۇل دا الداعى تەڭگە باعامىنا قاتىستى ءبىراز نارسەنى اڭعارتا السا كەرەك...
ايتا كەتسەك، بۇگىن - 2 جەلتوقساندا ۇلتتىق بانك قاراشا ايىنىنىڭ قورىتىندىسىن جاريالاپ، تەڭگە باعامى 5%-عا السىرەپ، 1 اقش دوللارى 512،52 تەڭگەگە دەيىن بارعانىن جەتكىزدى. ۇلتتىق بانكتىڭ مالىمەتىنشە، قىسقامەرزىمدى پەرسپەكتيۆادا تەڭگەنىڭ ديناميكاسى نارىققا قاتىسۋشىلاردىڭ كۇتۋلەرىنە، توقساندىق سالىق تولەمدەرىنە، الەمدىك نارىقتارداعى احۋالعا جانە گەوساياسي جاعدايدىڭ وزگەرۋىنە بايلانىستى بولادى.
