بۇل اقپاراتتى ءبىرقاتار تەلەگرام جەلىسىندەگى حايپسۇيەر كانالدار دا جارىسا جاريالاعان ەدى. جالاقىلارىن 100%-عا كوتەرۋ تۋرالى تالاپ قويعان باستاماشىل توپتىڭ ىنتاسىن قولداپ ۇندەۋ جاريالاعان ايەلدەردىڭ بەينەجازباسى بيلىكتىڭ كەم كەتىگىن تەرىپ وتىراتىن ناسيحاتشىل توپتارعا وڭىنان كەلگەنى راس.
الايدا، ماسەلەنىڭ اق پەن قاراسىن اجىراتىپ كورسەك؟!
«قتج» ۇك» كومپانياسى ەلىمىزدەگى ەڭ ءىرى الپاۋىت، جۇيە قۇراۋشى كومپانيالاردىڭ ءبىرى. مەملەكەت ىشىندەگى مەملەكەت دەۋگە دە بولادى.
مۇنداي كۇردەلى كومپانيالاردىڭ باسقارۋ كەشەنى مەن ادام رەسۋرستارى، ەڭبەك الەۋەتىنىڭ ەسەبى مەن قىزمەتكەرگە باعىتتالعان ءوز ساياساتى، زاماناۋي باسقارۋ تەتىكتەرىنە نەگىزدەلگەن ءوز قۇندىلىقتارى مەن قۇرىلىمى بار.
وسى جىلدىڭ شىلدە ايىنان باستاپ تەمىرجولشىلاردىڭ ەڭبەكاقىسىن تولەۋدىڭ وبلىستىق كوەففيسيەنتتەرىنە كەزەڭ-كەزەڭىمەن كوشۋ جوباسى سونىڭ ءبىرى.
ارينە، مۇنداي ەڭبەك تولەمىنىڭ كوەففيسيەنتتىك نەمەسە KPI جۇيەلەرى شالعايداعى شويىن جولدا قىزمەت ەتىپ جۇرگەن قاراپايىم قىزمەتكەرگە تۇسىنىكسىز نەمەسە ادىلەتسىز بولىپ كورىنۋى مۇمكىن.
ءوز كەزەگىندە قتج ەڭبەك ۇجىمدارىندا ەڭبەكاقى تولەۋ جۇيەسىنە جاڭا تاسىلدەردى ەنگىزۋ ماسەلەلەرى بويىنشا ءتۇسىندىرۋ جۇمىستارىن دا جۇرگىزۋ كەرەك.
كومپانيانىڭ رەسمي سايتىندا قىزمەتكەرلەردىڭ الەۋمەتتىك-ەكونوميكالىق جاعدايىن جاقسارتۋ بويىنشا جوسپارلى جۇمىستارىنىڭ ەسەپتىك كورسەتكىشتەرى كورسەتىلگەن ەكەن.
وندىرىستىك پەرسونالداعى قىزمەتكەرلەرىنىڭ جالاقى دەڭگەيىن وتكەن جىلعى كورسەتكىشپەن سالىستىرعاندا 41%-كە ارتىپ، بۇل ماقساتقا 133 ملرد. تەڭگە بولىنگەن.
2013 جىلدان بەرى وندىرىستىك پەرسونالدىڭ جالاقىسى مۇنداي دەڭگەيدە وسپەگەن.
جالپى كومپانيانىڭ نەگىزگى تابىسى جۇك جانە جولاۋشىلار تاسىمالىنا نەگىزدەلگەنىن جانە وسى تابىستان قىزمەتكەرلەر جالاقى الىپ وتىرعانىن ەسكەرسەك، 2020 جىلمەن سالىستىرعاندا كومپانيانىڭ جالپى تابىسىنىڭ كولەمى 7،4 ەسە وسكەن.
وتكەن جىلى تەمىرجول كولىگىنىڭ پايدالانىلعان جۇك اينالىمى 239،3 ملرد توننا/كم-گە جەتىپ، «قازاقستان تەمىر جولى» ۇك» اق-نىڭ قورىتىندى تابىسى 120،6 ملرد تەڭگەنى قۇراعان.
بۇل ناتيجەنىڭ قورىتىندىسىندا جۇرگىزىلگەن ءىس-شارالار ەسەبىنەن 2021-2022 جىلدارى وندىرىستىك پەرسونال قىزمەتكەرلەرىنىڭ ەڭبەكاقىسىنىڭ ءوسىمى ورتاشا ەسەپپەن 50% قۇراعان. بيىلدىڭ وزىندە وندىرىستىك قىزمەتكەرلەردىڭ جالاقىسىن كوتەرۋگە 70 ملرد.تەڭگەدەن استام قاراجات ءبولىنىپ وتىر ەكەن.
ەڭبەكاقى تولەۋ قورلارىنىڭ كوەففيسەنتتىك جۇيەسى مەن ەففەكتيۆتىلىك تۇرعىسىنان ءادىل جانە ادامي فاكتورلاردان ادا بولاتىنىنا سەنىممەن قاراۋعا بولادى. سەبەبى بۇگىندە بۇل پروسەسستەردىڭ بارلىعى سيفرلى اۆتوماتتاندىرىلعان باعدارلامالاردان تۇرادى.
الايدا، مۇنداي جاڭاشىلدىقتاردىڭ بارلىعىن وڭىرلەردەگى ەڭبەك اكتيۆتەرىنە قاراپايىم تىلمەن تۇسىندىرە دە الۋ كەرەك. ماڭعىستاۋداعى تەمىرجولشىلاردىڭ دا ءجۇز پايىز ءوسىم سۇراپ جاتقاندىعى دا وسىنداي اعارتۋشىلىق جۇمىستاردىڭ كەمشىندىگىنەن بولۋى مۇمكىن.
ەكونوميكادا مۋلتيپليكاتيۆتى ەففەكت دەگەن تۇجىرىم بار، ماعىناسى بىر-بىرىنە بايلانىستى جۇيەلەردىڭ بىر-بىرىنە اسەرى. قاراپايىم تىلمەن ايتقاندا دومينو تاستارىنىڭ بىر-بىرىنە سۇيەنىپ قۇلاۋىمەن تۇسىندىرۋگە بولادى.
ماسەلەن، كەشەگى بەينەۋدەگى تەمىرجولشىلاردىڭ تالابى ورىندالدى دەلىك، الايدا ءدال سونداي ەڭبەك ەتىپ جۇرگەن تەمىرجولشى قاندىاعاش پەن قازالىدا دا بار نەمەسە قازاقستاننىڭ ءاربىر تەمىرجول بەكەتىندە.
وندا بارلىق قازاقستاندىق تەمىرجول بەكەتتەرىندەگى وندىرىستەگى 100 مىڭنان استام قىزمەتكەردىڭ جالاقىسىن كوتەرۋ كەرەك دەگەن ءسوز.
ال، بۇل قىزمەتكەرلەردىڭ ەڭبەكاقىسىنىڭ كولەمى قتج كومپانياسىنىڭ جالپى تابىسىمەن بىردەن-بىر بايلانىستى ەكەنىنە نازار سالساق، قتج ءوز كەزەگىندە جولاۋشىلار تاسىمالى مەن جۇك تاسىمالىنداعى تاريفتەردى كوتەرۋ كەرەك بولادى دەگەن ماعىناعا سايادى.
جۇك تاسىمالىنىڭ تاريفتەرى كوتەرىلەتىن بولسا، بارلىق شويىن جولدا تاسىمالدانىپ جاتقان تاۋارلاردىڭ باعالارى دا وزگەرەدى، ياعني قۇرىلىس، تەحنيكا مەن كۇندەلىكتى تۇرمىستىق تاۋارلاردىڭ دا باعاسى وسەدى دەمەك. جولاۋشىلار تاسىمالىنداعى بيلەت قۇنى ايتپاسا دا تۇسىنىكتى.
ءيا، كيەلى ماڭعىستاۋ جەرى وزدەرىنىڭ تالاپشىل جانە ءور مىنەزدى گەوگرافيالىق، ەتنيكالىق ەرەكشەلىكتەرىمەن ەلگە ايان. ءبىراق، سوڭعى وتاندىق وسىنداي تالاپتار قويۋ تاريحىنا قارايتىن بولساق، ماڭعىستاۋلىقتاردىڭ عانا ەمەس ءدۇيىم ەلدىڭ تىنىشتىعىن ويلاعان رەسمي بيلىك بۇل جەردىڭ ازاماتتارىن جەڭىل جانە كەي جاعدايدا ولشەمسىز قويىلعان سۇرانىستارىن ورىندايمىن دەپ جامان دا ۇيرەتىپ العان سەكىلدى.
تالاپتىڭ دا تالابى، ءوتىنىشتىڭ دە ءوتىنىشى بولادى، ءبىراق قازاق حالقى تەك قانا ماڭعىستاۋدا ءومىر ءسۇرىپ جاتقان جوق. سونى ەسكەرسەك.
