اللەيادا سان الۋان زاماندى باسىنان كەشكەن تاراز شاھارىنىڭ تاريحىنان سىر شەرتەتىن ستەلا ورناتىلعان. وندا «ءتاڭىر» دەگەن ءسوز جازىلعان. وڭىرىمىزدەن عۇلامالاردىڭ دا شىققانىن كورسەتەتىن قاۋىرسىن، جامبىل بابامىزدىڭ دومبىراسى، ىقىلاس كۇيشىنىڭ قوبىزى بەينەلەنگەن.
اتالمىش نىساندى سالتاناتتى تۇردە اشۋ مارتەبەسى جامبىل وبلىسىنىڭ قۇرمەتتى ازاماتى، «100 جاڭا ەسىم» جوباسىنىڭ جەڭىمپازى سەمبەك ابەتاي ۇلى سەيدازيموۆ جانە تەمىر جول سالاسىنىڭ ارداگەرى، تاراز قالاسىنىڭ قۇرمەتتى ازاماتى ساعىمبەك اقشالوۆقا بەرىلدى.
شارانىڭ قۇرمەتتى قوناقتارى ستەلانىڭ سالتاناتتى لەنتاسىن قيعاننان سوڭ ارنايى ءسوز الدى. ءوز سوزدەرىندە س. سەيدازيموۆ پەن س. اقشالوۆ كونە شاھارعا تەمىر جول جەلىسىمەن كەلگەن قوناقتار ءۇشىن ونىڭ كەلبەتىن كورسەتەتىن وسى ۆوكزال ماڭى ەكەنىن ايتىپ، اشىلىپ وتىرعان نىسان قوناقتارعا تارازدىڭ تاريحي قالا ەكەنىن ايشىقتاپ كورسەتەتىنىن تىلگە تيەك ەتتى.
ەستەرىڭىزگە سالا كەتەيىك، اتالمىش ەسكەرتكىشتەن بولەك بۇگىن قالا كولەمىندە جامبىل اقىننىڭ ەسكەرتكىشى، وبلىس اكىمدىگىنىڭ عيماراتى ماڭىندا جانە ورتالىق «دوستىق» الاڭىندا ءتۇرلى-تۇستى سازدى اۋەن ىرعاعىمەن وينايتىن ءتورت سۋبۇرقاق پايدالانۋعا بەرىلدى.
جەڭىس ساياباعىندا ورنالاسقان «تىل ەڭبەككەرلەرىنە»، «اۋعان سوعىسىنىڭ ارداگەرلەرىنە»، «چەرنوبل اپاتىنا قاتىسۋشىلارعا» ارنالعان ەسكەرتكىشتەر اشىلادى.
سونداي-اق بۇگىن قالامىزدا «جەلتوقسان تولقىنى» اتاۋىمەن ەلىمىزدەگى ەڭ ۇزىن ءارى ماعىناسى زور سۋبۇرقاق، تولىق قايتا جاڭعىرتۋدان وتكەن قايرات رىسقۇلبەكوۆ اتىنداعى ساياباعىندا حالىق قاھارمانىنىڭ ەسكەرتكىشى، جەلتوقسان وقيعاسىنا قاتىسۋشىلارعا ارنالعان «تاۋەلسىزدىك ۇشقىنى اللەياسى»، «عيبرات» ورتالىعى اشىلماق.
سونىمەن قاتار، تارازدىقتار «ءۇشبۇلاق» جاعالاۋىنداعى دەمالىس اۋماعىنىڭ اشىلۋىن تاماشالايدى.
08 ينفو
