تەلەگرام ارنالار توقايەۆقا تۇتقيىلدان تاپ بەردى حابارلايدى Dalanews.kz.
پرەزيدەنت كومەكشىسى ەرلان ءقاريننىڭ كارىنە ۇشىراعاننان كەيىن اتىشۋلى ارنالاردىڭ ءبىرازى بوي تاسالاپ، ساياسي ينتريگامەن اينالىسۋدى دوعارعان سىڭايلى ەدى.
سوڭعى بىر-ەكى اپتانىڭ بەدەرىندە توقايەۆتى نىساناعا العان كونتەنت كۇرت ارتىپ، جاز بويى بەيعام جاتقان ارنالار قايتا تىرىلگەن ءتۇرى بار.
توقايەۆقا شۇيلىككەن تەلەگرام ارنالار: "پرەزيدەنتتىڭ ورىنتاعى شاتقاياقتاپ تۇر. قوس بيلىك قايتىپ ورالادى. ەلدەگى ساياسي ەليتا ەكىنشى پرەزيدەنتتى جاقتامايدى. نازاربايەۆ ءقايتىپ ورالۋى مۇمكىن. توقايەۆتىڭ جولداۋى سۇرەڭسىز شىقتى. دەمالىستان ورالعان ەلباسىنىڭ سوڭعى كۇندەرى قاتارىنان ءۇش رەسمي كەزدەسۋ وتكىزگەنى ءجايدان-جاي ەمەس. توقايەۆتىڭ پوپۋليستىك مالىمدەمەدە جاساۋدان وزگە جولى جوق. ارقا سۇيەرى حالىق قانا..."، - دەگەن سىڭايداعى قاڭقۋ-قاۋەسەتتى تەلەگرامداعى اۋقىمدى اۋديتوريانىڭ قۇلاعىنا قۇيۋدا.
وسىناۋ الىپ-قاشپا اڭگىمەنىڭ ارعى جاعىندا كرەملدىڭ سۇعاناق ساياساتى جاتۋى ابدەن مۇمكىن. تەلەگرام ارنالاردىڭ ساراي توڭىرەگىندەگى ساياسي ينتريگالاردى كرەملگە جاقىن دەرەككوزدەرگە سىلتەپ حابارلاۋى وسى سوزىمىزگە دايەك بولسا كەرەك.
ايتقانداي اقپارات ءمينيسترى ايدا بالايەۆا Hola news-كە بەرگەن سۇحباتىندا تەلەگرام ارنالارعا ارنايى توقتالعان تۇعىن.
— بۇركەنشەك تەلەگرام-ارنالار بۇرا تارتار اقپار تاراتقان جاعدايدا مەملەكەت تاراپىنان قاتاڭ شارالار قابىلدانارىن ايتقان ەدىڭىز. وسى باعىتتا قانداي دا ءبىر قارەكەت جاسالدى ما؟ – دەگەن ساۋالعا بالايەۆا:
"ءازىر وعان قاجەتتىلىك جوق. تەلەگرام-ارنالاردىڭ جەتەكشىلەرى بۇعان جەتكىزبەس دەپ ويلايمىن. الۋان ءتۇرلى اقپارات ساپىرىلىسقان داۋىردە ومىردە ءومىر سۇرەمىز. جالعان اقپارات تۇتاس قوعامدى قۇزعا قۇلاتۋى مۇمكىن. بەلگىلى ءبىر مالىمەتتىڭ راس-وتىرىگىن انىقتاپ، فەيك بولسا ونىڭ تارالۋىن تەجەۋ ماقساتىندا Stopfake.kz سايتىن ىسكە قوستىق"، – دەپ جاۋاپ بەرگەن ەدى.
