تەلەفونمەن بىلاپىت ءسوز ايتقان اقتوبەلىك 130 مىڭ تەڭگەگە جۋىق ايىپپۇل تولەدى، دەپ حابارلايدى Dalanews.kz.
اقتوبە وبلىسى شالقار اۋدانىنىڭ تۇرعىنى «103» قىزمەتىنىڭ ديسپەچەرىمەن سويلەسۋ كەزىندە بالاعات سوزدەر قولدانعان. سونىڭ سالدارىنان ول مەديسينا قىزمەتكەرىنە قىزمەتتىك مىندەتىن اتقارۋ كەزىندە قۇرمەتسىزدىك تانىتقانى ءۇشىن سوتقا تارتىلدى.
ەر ادامعا 10 تاۋلىككە دەيىن اكىمشىلىك قاماۋ جازاسى ءقاۋپى تونگەن. الايدا سوت ونىڭ كامەلەتكە تولماعان بالالارى بارىن، جاساعان ارەكەتىنە وكىنىش بىلدىرگەنىن جانە ديسپەچەردىڭ ونى كەشىرگەنىن ەسكەردى.
ناتيجەسىندە سوت قاماۋ جازاسىنىڭ ورنىنا 129 750 تەڭگە كولەمىندە ايىپپۇل سالۋمەن شەكتەلدى. سوت قاۋلىسى زاڭدى كۇشىنە ەندى.
