سۋداندا ٷش جىلدان استام ۋاقىتقا سوزىلعان ازاماتتىق سوعىس پەن ەل-نينو قۇبىلىسىنا بايلانىستى قۇرعاقشىلىق اشارشىلىق قاۋپٸن كٷشەيتتٸ. بٸرٸككەن ۇلتتار ۇيىمى قولدايتىن ازىق-تٷلٸك قاۋٸپسٸزدٸگٸن باعالاۋ جٷيەسٸ ەلدٸڭ بٸرقاتار ٶڭٸرٸندە جاعداي ناشارلاپ بارا جاتقانىن ەسكەرتتٸ, دەپ حابارلايدى dalanews.kz.
Reuters اگەنتتٸگٸنٸڭ 23 قازانداعى مەلٸمەتٸنشە, 2026 جىلدىڭ ماۋسىمىندا سۋداندا 5,1 ملن ادام قاتتى اشتىققا تاپ بولعان. ال دٷنيەجٷزٸلٸك ازىق-تٷلٸك باعدارلاماسىنىڭ بولجامى بويىنشا, قۇرعاقشىلىق سالدارىنان 2026 جىلدىڭ سوڭىنا دەيٸن تاعى 350 مىڭ ادام ازىق-تٷلٸك تاپشىلىعىن سەزٸنۋٸ مٷمكٸن. 2027 جىلدىڭ تامىزىنا قاراي بۇل كٶرسەتكٸش قوسىمشا 1,2 ملن ادامعا جەتۋٸ ىقتيمال.
جاۋىن-شاشىن سوڭعى 30 جىلدان استام ۋاقىتتاعى ەڭ تٶمەن دەڭگەيگە تٷستٸ
ەلدە شٸلدە-قىركٷيەك ايلارىنداعى نەگٸزگٸ جاڭبىرلى ماۋسىمدا جاۋىن-شاشىن مٶلشەرٸ سوڭعى 30 جىلدان استام ۋاقىتتاعى ەڭ تٶمەن دەڭگەيگە جەتكەن. سولتٷستٸك دارفۋر شتاتىندا بۇل كٶرسەتكٸش 1984 جىلدان بەرگٸ ەڭ تٶمەن دەڭگەيدە تٸركەلسە, سولتٷستٸك كوردوفاندا 1990 جىلدان, گەدارەف شتاتىندا 1991 جىلدان بەرگٸ ەڭ تٶمەن كٶرسەتكٸشكە تٷسكەن.
قۇرعاقشىلىق اۋىل شارۋاشىلىعىنا ەلەۋلٸ زييان كەلتٸرٸپ, ەگٸن ٶنٸمدٸلٸگٸن تٶمەندەتتٸ. كەيبٸر فەرمەرلەر بيىلعى ٶنٸم بىلتىرعى كٶرسەتكٸشتٸڭ تٶرتتەن بٸرٸنە دە جەتپەۋٸ مٷمكٸن ەكەنٸن ايتادى. مالعا جايىلىم مەن سۋدىڭ جەتٸسپەۋٸ دە جاعدايدى قيىنداتىپ وتىر.
گۋمانيتارلىق كٶمەك قىسقاردى
اشتىقتان زارداپ شەككەن تۇرعىندارعا كٶمەك كٶرسەتۋ دە قيىنداعان. دٷنيەجٷزٸلٸك ازىق-تٷلٸك باعدارلاماسىنىڭ مەلٸمەتٸنشە, ۇيىم 5 ملن ەڭ مۇقتاج ادامعا كٶمەك جەتكٸزۋگە باسىمدىق بەرٸپ وتىر. الايدا قارجى تاپشىلىعىنا بايلانىستى بارلىق مۇقتاجعا كٶمەك كٶرسەتۋ مٷمكٸن بولماي, كەيبٸر ٶڭٸرلەردە ازىق-تٷلٸك ٷلەسٸ قىسقارتىلعان.
دارفۋرداعى تاۆيلا بوسقىندار لاگەرٸندە ازىق-تٷلٸك كٶمەگٸ ەكٸ ەسە ازايتىلعان. مۇندا شامامەن 700 مىڭ ادام تۇرادى. سونىمەن بٸرگە قىركٷيەكتٸڭ باسىنان قازاننىڭ ورتاسىنا دەيٸن لاگەرگە تاعى 9 مىڭعا جۋىق ادام كەلگەن.
17 قازانداعى جاعداي بويىنشا, ۇيىمنىڭ سۋدانداعى وپەراتسييالارىنا 276 ملن دوللار بٶلٸنگەن. بۇل ٶتكەن جىلعى قارجىلاندىرۋ كٶلەمٸنٸڭ جارتىسىنان دا از. قۇرعاقشىلىق سالدارىنان تۋىنداعان اشتىقپەن كٷرەسۋ ٷشٸن قوسىمشا 134 ملن دوللار قاجەت.
سوعىس گۋمانيتارلىق داعدارىستى تەرەڭدەتٸپ وتىر
سۋدانداعى قارۋلى قاقتىعىس 2023 جىلدىڭ سەۋٸرٸندە ارمييا مەن جەدەل قولداۋ كٷشتەرٸ اراسىنداعى شايقاستاردان باستالدى. سودان بەرٸ ەلدٸڭ كٶپتەگەن ٶڭٸرٸندە تۇرعىندار ٷيلەرٸن تاستاپ كەتۋگە مەجبٷر بولدى. قاقتىعىس پەن قاۋٸپسٸزدٸك جاعدايىنىڭ ناشارلاۋى گۋمانيتارلىق ۇيىمداردىڭ كٶمەك جەتكٸزۋٸنە دە كەدەرگٸ كەلتٸرٸپ وتىر.
بۇۇ قولدايتىن ازىق-تٷلٸك قاۋٸپسٸزدٸگٸن باعالاۋ جٷيەسٸ 2024 جەنە 2025 جىلدارى سۋداننىڭ بٸرقاتار اۋماعىندا اشارشىلىق بولعانىن جارييالاعان. قازٸرگٸ قۇرعاقشىلىق جاعدايدى ودان ەرٸ ۋشىقتىرۋى مٷمكٸن.
مامانداردىڭ پٸكٸرٸنشە, ەگٸن ٶنٸمٸنٸڭ ازايۋى مەن گۋمانيتارلىق كٶمەكتٸڭ قىسقارۋى قاتار جٷرسە, ەلدەگٸ ازىق-تٷلٸك داعدارىسى ودان ەرٸ تەرەڭدەۋٸ ىقتيمال. ەسٸرەسە دارفۋر مەن كوردوفان ٶڭٸرلەرٸندەگٸ تۇرعىندار قاتتى قاۋٸپكە تاپ بولىپ وتىر.
