قوعام قايراتكەرى، Transparency International حالىقارالىق ۇيىمىنىڭ مۇشەسى اسەل تەمىروۆا مەملەكەتتىك ساتىپ الۋلارداعى كۇماندى كەلىسىمشارت جايلى اقپاراتتى ءبولىستى. ونىڭ ايتۋىنشا، ادىلەتسىزدىككە بەي-جاي قاراي الماعان مەملەكەتتىك قىزمەتكەر وعان الماتى اكىمدىگى مەن “اتامەكەن” ۇلتتىق كاسىپكەرلەر پالاتاسى اراسىنداعى 2،26 ملرد تەڭگەلىك كەلىسىمشارت تۋرالى مالىمەتتەردى بەرگەن، دەپ حابارلايدى Dalanews.kz.
تەمىروۆانىڭ مالىمەتىنشە، مەملەكەتتىك ساتىپ الۋ كەلىسىمى كاسىپكەرلىك سالاسىنداعى بيزنەس-پروسەستەردى اۆتوماتتاندىرۋ جانە باسقارۋ بويىنشا كونسۋلتاسيالىق قىزمەتتەردى الۋ ءۇشىن جاسالعان.
"ءبىزدىڭ بيۋدجەت قاراجاتىمىز بەن مەملەكەتتىك ساتىپ الۋلاردا نە بولىپ جاتىر؟ الماتى اكىمدىگى مەن كاسىپكەرلەر پالاتاسى، سىزدەردەن 2 ملرد 264 ملن تەڭگە حالىق قاراجاتىنىڭ ناقتى قايدا جۇمسالعانىن ءتۇسىندىرۋدى سۇرايمىن! قانداي وقىتۋ باعدارلامالارى وتكىزىلدى جانە الداعى ۋاقىتتا قانداي كۋرستار جوسپارلانعان؟" دەپ جازدى اسەل تەمىروۆا Facebook-تەگى پاراقشاسىندا.
ول سونداي-اق “اتامەكەن” ۇكپ ءتوراعاسى رايىمبەك باتالوۆقا تىكەلەي سۇراق قويىپ، بيۋدجەت قاراجاتىنىڭ ناقتى قانداي ماقساتتارعا جۇمسالعانىن اشىق ءتۇسىندىرۋدى تالاپ ەتتى.
"سىزدەردەن بۇل قارجىنىڭ قالاي جۇمسالعانىن اشىق جانە جاريا تۇردە ءتۇسىندىرۋدى سۇرايمىن، ويتكەنى بۇل اقشا حالىققا تيەسىلى! قانداي كاسىپكەرلەر وقۋدان ءوتتى؟ بۇل كۋرستاردى كىم وتكىزدى؟ اۆتوماتتاندىرۋ مەن باسقارۋ بويىنشا كەڭەس بەرۋ قىزمەتتەرى نەلىكتەن مۇنشا قىمباتقا ءتۇستى؟"، دەپ سۇرادى قوعام بەلسەندىسى.
تەمىروۆا مۇنداي وقىتۋ باعدارلامالارىن تەگىن دە تابۋعا بولاتىنىن اتاپ ءوتتى.
"ەگەر كاسىپكەرلەر پالاتاسىنىڭ وقىتۋ باعدارلامالارىنا قارجى جەتپەي جاتسا، ماعان حابارلاسسىن. مەن ولارعا تولىقتاي تەگىن ءبىلىم بەرۋ باعدارلامالارىن تابۋعا كومەكتەسەمىن"، دەپ تۇيىندەدى ول.
اسەل تەمىروۆا كوتەرگەن بۇل ماسەلە قوعامدا ۇلكەن تالقىعا ءتۇستى. الماتى اكىمدىگى مەن “اتامەكەن” ۇكپ بۇل سۇراقتارعا ناقتى جاۋاپ بەرە مە – ونى ۋاقىت كورسەتەدى.
