تازابەكوۆ نە دەيدى؟
الەۋمەتتىك جەلىدەگى بولىسكەن جازباسىنا قاتىستى ءدىني ارنانىڭ ديرەكتورى بىلاي دەپ تۇسىنىكتەمە بەرگەن.
"Serke.orq سايتى مەنىڭ الەۋمەتتىك جەلىدە بولىسكەن (رەپوست جاساعان) جازبام تۋرالى ماقالا جاريالاعان ەكەن.
ماقالانىڭ قىسقاشا مازمۇنى – ءۇندىستاندىق ءبىر عالىمنىڭ قايتىس بولعانى مەن ونىڭ جانازاسىنا ميلليونعا جۋىق ادام جينالعانىن حابارلاعان "اسىرە راديكال وي ايتىپ جۇرەتىن ادامنىڭ" جازباسىنان "قاتتى اسەرلەنىپ"، ونىڭ «ءقاۋىپتى ادام ەكەنىن ءبىلىپ تۇرىپ بولىسكەنىم» جانە «ون مىڭداعان ادامدى جات اعىممەن ۋلاپ جىبەرگەنىم» تۋرالى.
بۇعان قوسا، بۇركەنشىك ەسىم جامىلعان اۆتور مەنى "ۋاحابيلىك ۋاعىزدى حالىققا تىقپالاپ ءجۇر جانە مۇنى مويىندامايدى" دەپ ايىپتاپ، اقتوبە مەن باسقا ايماقتاردا بولعان تەررورلىق اكتى جاساۋشىلارمەن بايلانىستىرعان جانە ەندى "قۇتىلىپ كەتۋى نەعايبىل" دەپ جازادى.
سونىمەن قاتار، وسى ماقالانى بولىسكەن ايگۇل ورىنبەك قارىنداسىمىز ءوز پوستىندا مەنى "ءدىن سالاسىندا قانشاما جىل ستاجى بار ادامنىڭ اقپاراتتى بولىسكەندە شاتاسۋى مۇمكىن ەمەس" دەي كەلە، "ناعىز تەرروريستىڭ جازباسىن ءبولىسۋشى" زاڭ الدىندا جاۋاپ بەرسىن دەپ ۇمىتتەنگەن ەكەن" دەيدى تازابەكوۆ.
"اسىل ارنانىڭ" ديرەكتورى وزىنە تاعىلعان ايىپتاۋلاردى جوققا شىعارىپ وتىر. ايتۋىنشا، فەيسبۋكتە ميللياردتان اسىپ جىعىلاتىن قولدانۋشى بار. مۇنداعى جۇرتتىڭ ءبارىن جەتە تانىپ، ولاردىڭ باعىتتارىن ءبىلىپ ءجۇرۋ مۇمكىن ەمەس.
"ادەتتە، الەۋمەتتىك جەلىدە اقپارات بولىسكەن ۋاقىتتا اۆتورى ەمەس، جازبا كونتەنتىنە كوڭىل بولەمىز. ال اتالعان جازبا جانازا تۋرالى جانە وندا زاڭعا قايشى كەلەتىن، «قۇتىلىپ كەتۋىم نەعايبىل» دۇنيە بولماعانىن ايتقىم كەلەدى.
پوست اۆتورىمەن تانىس ەمەسپىن جانە ونىڭ باسقا جازبالارىمەن تانىسىپ، ۇستانىمىن بىلگەن بەتتە، جىلدام پاراقشامنان الىپ تاستادىم. تيىسىنشە، ونىڭ "ءقاۋىپتى ادام ەكەنىن" ءبىلىپ تۇرىپ جاريالاۋىم جانە از ۋاقىتتىڭ ىشىندە "ون مىڭداعان ادامدى جات اعىممەن ۋلاپ جىبەرۋىم" استە مۇمكىن ەمەس.
سوندىقتان زاڭ الدىندا جاۋاپ بەرسىن دەگەن «ۇمىتتەردىڭ» دە ورىنسىز ەكەنسىز ايتقىم كەلەدى.
كەرىسىنشە، ماقالا مەن ونى بولىسۋشىلەردىڭ مەنىڭ اتىمدى اقتوبە مەن باسقا ايماقتاردا بولعان تەررورلىق اكتىلەرمەن بايلانىستىرۋى جانە ۋاحابيلىك ۋاعىزدى تىقپالاپ ءجۇر دەۋى - كورىنەۋ جانە بەدەلىمدى تۇسىرەتىن اقپارات دەپ بىلەمىن. اتالعان جاعدايعا بايلانىستى ق ر كونستيتۋسياسى مەن زاڭدارىنا سايكەس ءوز ابىرويىمدى قورعاۋ ماقساتىندا قۇقىق قورعاۋ ورگاندارىنا شاعىم ءتۇسىرۋ قۇقىعىم بارىن جانە زاڭگەرلەرمەن كەڭەسۋ جاساپ جاتقانىمدى حابارلايمىن" دەيدى تازابەكوۆ.
ورىنبەك نە دەيدى؟
تازابەكوۆ بولىسكەن الەۋمەتتىك جەلىدەگى جازبا جۇرتتىڭ نازارىنا بىردەن ىلىككەن. العاشقىلاردىڭ ءبىرى بولىپ بۇل تۋرالى زاڭگەر، الەۋمەتتىك جەلى بەلسەندىسى ايگۇل ورىنبەك جازعان.
"اۋىلدىڭ بالدارى رەپوست پەن لايك ءۇشىن قامالىپ كەتىپ جاتىر، ال مۇحامەتجان تازابەككە زاڭدى تۇردە جازا جوق پا؟" دەگەن بلوگەر بۇل جازبانىڭ ۇلتتىق قاۋىپسىزدىك كوميتەتىنىڭ ءتوراعاسى ك.ءماسىموۆتىڭ نازارىنا ىلىگۋى كەرەكتىگىن ايتقان.
ونىڭ ايتۋىنشا، مۇنداي اقپاراتتى بولىسكەندە ءدىن سالاسىندا قانشاما جىل ستاجى بار ادامنىڭ شاتاسۋى مۇمكىن ەمەس.
"دۇردەي ءبىر ءدىني ارنانىڭ ديرەكتورى "بىلمەي قالدىم "- دەپ بالانىڭ اڭگىمەسىن ايتپاي -اق قويسىن! ناعىز تەرروريستتىڭ جازباسىن ءبولىسىپ، وقىرماندارىنا نە ايتقىسى كەلدى ەكەن؟ زاڭ بارىمىزگە ورتاق! بولىسكەن پوستى ءۇشىن زاڭ الدىندا جاۋاپ بەرسىن! باس پروكۋراتۋرا نەمقۇرايلى قارامايدى دەپ ۇمىتتەنەمىن!" دەگەن-تۇعىن ورىنبەك.
ءىس ناسىرعا شاپتى ما؟
بۇل ىسكە وسىمەن نۇكتە قويىلۋى دا مۇمكىن ەدى. الايدا ايگۇل ورىنبەكتىڭ ايتۋىنا قاراعاندا، وعان قوقان-لوقى جاسالانىپ جاتىر. الەۋمەتتىك جەلىدەن جالعان پاراقشا اشقان بوتەن بىرەۋلەر ونى قورقىتىپ-ۇركىتپەك بولعان. بۇل تۋرالى زاڭگەر بىلاي دەپ جازدى.
"ماعان جەكەگە جالعان پاراقشالارمەن اشىلعان ادامداردان قوقان لوقى جاسالىنىپ جاتىر.
ماعان قاندايدا قاستاندىق جاسالىناتىن بولسا، مۇحامەتجان تازابەكتەن ونىڭ ارتىنان ەرۋشى شاكىرتتەرى ما ، تىڭداۋشىلارىما سولاردان كۇدىكتەنەمىن!
سەبەبى كەشە مەن مۇحامەدجان تازابەك ەكسترەميزم باعىتىن تاراتۋشى ادامنىڭ پوستىن بولىسكەنى ءۇشىن زاڭدى تۇردە جازاسىن السىن دەگەن بولاتىنمىن! ال ول كىسى ءوزىنىڭ قاتەلەسىپ بولىسكەن پوستى ءۇشىن مەنى سوتقا بەرەم دەپ پوست جازىپتى. سونىڭ سەپتىگى بولار مۇحامەدجان اعامنىڭ ۋاعىزىن تىڭداپ جۇرگەن شابارماندار ماعان شاۋىپ، قوقان لوقى جاساپ جاتقانى.
بۇكىل كەلگەن حاتتاردى سكرينشوتتاپ ۇقك -عا ارىز دايىنداپ جاتىرمىن!".
تازابەكوۆ جاۋاپ قاتتى
ىلە-شالا زاڭگەردىڭ جازباسىنا تازابەكوۆ جاۋاپ قاتقان.
"و زاماندا بۇ زامان، قازاق قىز بالاسىنا قوقان-لوقى جاساپ قورقىتا ما ەكەن؟ قىزدى قورقىتپاق تۇگىلى، قىزدىڭ الدىندا ارتىق سويلەۋدى ار سانايتىن ەرلەردىڭ ۇرپاعى ەمەس پە ەدىك... ەركەلەسىن... ويىنداعىسىن ايتسىن... ارماندا قالماسىن...
ەگەمەن ەلدە، ەركىندىك الاڭى الەۋمەتتىك جەلىدە ايتپاعاندا قايدا ايتادى. ءوز ءسوزى وزىنىكى...شىنىمەن مەن رەنجىپ قاپ، بىرەۋگە ءوتىنىپ، بىردەڭە جازعىزىپ جاتىر، دەپ، جۇرت ويلاپ قالار. الەۋمەتتىك جەلى اشىلعالى بەرى قورعانۋمەن كەلە جاتىر ەكەنمىن. بىرەۋگە تۇرا ۇمتىلعان كەزىم جوق. ەشكىمگە قامشىمدى شيىرىپ، قالامىمدى ۇشتاپ كورمەپپىن"، – دەدى تازابەكوۆ.
ونىڭ ايتۋىنشا، كىسىگە جۇمسايتىن توبى جوق.
"اقىمدى الىپ كەپ بەر، دەيتىن ادامىم جوق.
سيىنارىم دا، سۇيەنەرىم دە- جالعىز اللا!
ايگۇلدە نەم بار؟
سولاي ويلادى، سوسىن جازدى..." دەپ جازىپتى ول.
قۇسپان نە دەيدى؟
ال ورىنبەككە قولداۋ كورسەتكەن ارىپتەسى ابزال قۇسپان "ولار قارىنداسىمىزدىڭ ومىرىنە ءقاۋىپ توندىرە باستادى، ازىرگە ءسوز جۇزىندە، ال ەرتەڭ ىسكە اسىرا باستاماسىنا كىم كەپىل؟" دەيدى.
ونىڭ ايتۋىنشا، ايگۇلگە جاسالعان قوقان-لوققى، قازاقستانداعى جاڭا قالىپتاسىپ كەلە جاتقان ازاماتتىق قوعامعا كورسەتىلگەن دوق، ناقتى ءقاۋىپ.
"سول سەبەپتى ۇلتتىق قاۋىپسىزدىك كوميتەتىن ايگۇلدىڭ ارىزىن جان-جاقتى، تولىق، وبەكتيۆتى تەكسەرۋگە شاقىرامىن. ايگۇلدىڭ جەكە باسىنا قاتىستى جاعداي بارشا قوعام قاداعالاۋىندا ەكەنىن ەسكەرتەمىن! " دەپ جازىپتى ابزال قۇسپان.
(جالعاسى بار)
