تايلاندتا ەكٸ قازاقستاندىق قىز قۇلدىقتان بوساتىلدى. بۇل تۋرالى قر سىرتقى ٸستەر مينيسترلٸگٸنٸڭ رەسمي ٶكٸلٸ ايبەك سماديياروۆ مەلٸمدەدٸ, دەپ حابارلايدى Dalanews.kz.
استانادا ٶتكەن بريفينگتە ول ٸستٸڭ مەن-جايىن بايانداپ بەردٸ. انىقتالعانداي, قىزدار جاسىرىن بايلانىس ورتالىعىنداعى بوس جۇمىس ورنىنا الدانىپ قالعان. ولار بٸرنەشە تٸل بٸلەتٸندٸكتەن, جۇمىسقا الماق بولعان. بٸراق سول جاققا تابان تٸرەگەن كەزدە قىزداردى قۇلدىققا سالعان. سونىمەن قاتار 10 مىڭ دوللارداي قاراجات تالاپ ەتكەن.
"وسى جىلى قاڭتاردىڭ سوڭىندا تايلاندتاعى كونسۋلدىقتىڭ WhatsApp نٶمٸرٸنە حابارلاما كەلدٸ. وندا "مەن قازاقستان ازاماتىمىن. قاي مەملەكەت ەكەنٸن بٸلمەيمٸن, دجۋنگليدٸڭ ٸشٸندە قۇلدىققا تٷسٸپ قالدىم, كٶمەكتەسٸڭٸزدەر" دەپ جازىلعان. دەرەۋ انىقتاي باستادىق. سٶيتسەك بٸزدٸڭ ەكٸ ازاماتشامىز قۇلدىققا تٷسٸپ قالعان. ەڭ قىزىعى ەكەۋٸنٸڭ دە جوعارى بٸلٸمٸ بار, بٸرنەشە تٸل بٸلەدٸ. ينتەرنەتتەن حابارلامانى كٶرٸپ, الدانىپ قالعان. ەر ادام باسىنا 10 مىڭ دوللاردان اقشا سۇراعان. جەرگٸلٸكتٸ بيلٸكپەن جۇمىس ٸستەپ, بٸر ايدا ەكٸ ازاماتشا قۇتقارىلدى. قازٸرگٸ تاڭدا ولار ەلگە كەلە جاتىر", - دەيدٸ سٸم ٶكٸلٸ ايبەك سماديياروۆ.
ايتۋىنشا, قىزدار تايلاندقا بەت الماس بۇرىن «التىن بۇرىش» ايماعىنان حاباردار بولعان.
