تاۋەلسىزدىك اق بىلەكتىڭ كۇشىمەن، اق نايزانىڭ ۇشىمەن اتا-بابالارىمىزدىڭ ەگەمەندىك ءۇشىن كۇرەسىمەن عاسىرلارعا ۇلاسقان اسىل ارمانىنا جەتكەن كۇن. تاۋەلسىزدىك كۇنى – كەڭدىگىنەن ۇشقان قۇستىڭ قاناتى تالعان، جۇگىرگەن تۇلپاردىڭ تۇياعى توزعان ۇلانعايىر جەرىمىز – ۇلى دالا ەلىندە تاۋەلسىز مەملەكەت قۇرىلعانىن بۇكىل الەمگە جاريالاعان – ۇلى كۇن.

تاۋەلسىزدىك جۇلدىزدى 27 جىلدا اق تۇيەنىڭ قارنى جارىلعان، ءتورت قۇبىلامىز تەڭەلىپ، كوك تۋىمىز كوكتە جەلبىرەپ، كەڭ بايتاق جازيرالى دالادا قىران قۇستاي قالىقتاپ، تۇعىرعا قايتا قونعان كۇن.

بۇگىنگى كۇن دالامىز – دانگە، ءورىسىمىز – مالعا، وتباسىمىز – جانعا تولعان كۇن.

سوندىقتان، قازاقستاندىقتار ءۇشىن تاۋەلسىزدىكتەن ارتىق قاسيەتتى دە قىمبات ەشتەڭە جوق.

مىنە، تاۋەلسىز ەل بولعانىمىزعا 27 جىل تولدى. وسى از ۋاقىتتىڭ ىشىندە ەلباسىنىڭ سارابدال ساياساتىنىڭ ارقاسىندا قول جەتكىزىلگەن ناتيجەلەر قازاقستاننىڭ الەمدىك قوعامداستىقتا ءوزىنىڭ لايىقتى ورنىن الۋىنا مۇمكىندىك بەردى. تاۋەلسىز قازاقستاننىڭ تۇراقتىلىعى مەن ۇدەمەلى دامۋىنداعى، ۇلتارالىق جانە ءدىنارالىق كەلىسىمنىڭ ورنىعۋىنداعى، ن.ءا.نازاربايەۆتىڭ ءرولى وراسان.ەلباسىنىڭ «بولاشاققا باعدار: رۋحاني جاڭعىرۋ» جانە «ۇلى دالانىڭ جەتى قىرى» اتتى ماقالالارى اياسىندا ۇلتتىق مادەنيەت پەن تاريح كەلبەتى بۇرىن بولىپ كورمەگەن بيىك دەڭگەيگە كوتەرىلدى.

جەلتوقساننىڭ ىزعارىمەن كەلگەن تاۋەلسىزدىكتىڭ ءبىز ءۇشىن ورنى قاشان دا بولەك. سوندىقتان دا «تولارساقتان ساز كەشكەن» باتىر بابالارىمىزدىڭ ءار جىلدا توگىلگەن قانىنىڭ، ۇلى مۇراتتار جولىندا قۇربان بولعان اسىل ازاماتتارىمىزدىڭ اسقاق ارماندارىنىڭ ارقاسىندا قول جەتكىزگەن تاۋەلسىزدىكتى ءبىز ءارقاشان ماقتان تۇتىپ، قاستەرلەي بىلۋگە ءتيىستىمىز. بۇل ءبىزدىڭ ازاماتتىق پارىزىمىز.

بارشاڭىزدى كەلە جاتقان تاۋەلسىزدىك مەرەكەسىمەن شىن جۇرەكتەن تاعى دا قۇتتىقتايمىن! بارشا شاڭىراق باياندى باق-داۋلەتكە كەنەلىپ، ەلىمىزدە ىنتىماق سالتانات قۇرىپ، ىرىسىمىز ورتايماسىن! تاۋەلسىزدىگىمىز تۇعىرلى، بىرلىگىمىز باياندى، ەلىمىز ەڭسەلى بولسىن، ارداقتى اعايىن!

 

نۇربول تۇراشبەكوۆ، تۇلكىباس اۋدانىنىڭ اكىمى.