«قازاقستان رەسپۋبليكاسى مەملەكەتتىك تاۋەلسىزدىگى قالىپتاسۋىنىڭ ساياسي-قۇقىقتىق جانە ەكونوميكالىق ماسەلەلەرى: تاريحى جانە قازىرگى كەزەڭى» تاقىرىبىندا وتكەن اۋقىمدى شارانى ءال-فارابي اتىنداعى قازۇۋ، ق ر كونستيتۋسيالىق كەڭەسى، «نۇرسۇلتان نازاربايەۆ» قورى مەن «قازاقستانداعى پارلامەنتاريزمدى دامىتۋ» قوعامدىق قورى ۇيىمداستىردى. وعان مەملەكەتتىك بيلىك ورگاندارى مەن اكادەميالىق ورتا وكىلدەرى، زاڭگەرلەر قاۋىمى قاتىستى.
القالى جيىندى ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ اشىپ، ەل تاۋەلسىزدىگى مەرەيتويىنىڭ ماڭىزدىلىعىنا ءمان بەردى. ىرگەلى ءبىلىم ورداسىنىڭ رەكتورى:
– قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازاربايەۆتىڭ باسشىلىعىمەن زاماناۋي، باسەكەگە قابىلەتتى، يندۋستريالىق قۋاتتى مەملەكەت قۇرىلدى» دەي كەلە، قيلى كەزەڭدەگى قازاقستان حالقىنىڭ قارجىلىق داعدارىستارعا توتەپ بەرىپ، تۇراقتى دامۋ جولىنا تۇسكەنىن ايتتى. تاۋەلسىز قازاقستاننىڭ قۇقىقتىق نەگىزىنىڭ قالىپتاسۋىنداعى تاريحي وقيعالارعا شولۋ جاساي وتىرىپ، سالىق زيمانوۆ، سۇلتان سارتايەۆ، عايرات ساپارعالييەۆ سىندى تانىمال تۇلعالاردىڭ ەرەن ەڭبەگىن اتاپ ءوتتى. سونىمەن قاتار كورنەكتى قايراتكەر قازاقستان رەسپۋبليكاسىنىڭ پرەزيدەنتى ق.توقايەۆ ايقىنداپ بەرگەندەي، الداعى مىندەت «كەلەر ۇرپاققا قازاقستاندى تۇعىرى مىعىم، ەكونوميكاسى قۋاتتى، رۋحى اسقاق مەملەكەت رەتىندە تابىستاۋ جانە ەلدىك ىستەردى شاشاۋ شىعارماي لايىقتى جالعاستىراتىن جاسامپاز ۇرپاق تاربيەلەۋ، – دەدى.
ق ر كونستيتۋسيالىق كەڭەسىنىڭ ءتوراعاسى قايرات ءمامي ءوز سوزىندە
ەگەمەن قازاقستاننىڭ نەگىزى 1991 جىلى 16 جەلتوقساندا قابىلدانعان تاۋەلسىزدىك دەكلاراسياسىنان باستالاتىنىن تىلگە تيەك ەتىپ، ق ر تۇڭعىش پرەزيدەنتى نۇرسۇلتان نازاربايەۆتىڭ ەل دامۋى جولىنداعى ولشەۋسىز ۇلەسىنە ەرەكشە توقتالدى. ەلباسى باستاماسىمەن باستى مەملەكەتتىك قۇجات – ق ر كونستيتۋسياسى قابىلدانعانىن جەتكىزدى.
«قازاقستان كونستيتۋسياسى مەملەكەت پەن قوعامنىڭ تۇراقتىلىعى مەن وركەندەۋىنىڭ مىزعىماس نەگىزىنە اينالدى. ونىڭ تالاپتارىنا سايكەس ءتيىمدى دەموكراتيالىق ينستيتۋتتار – پرەزيدەنتتىك باسقارۋ نىسانى، قوس پالاتالى پارلامەنت، ەسەپ بەرەتىن ۇكىمەت، تاۋەلسىز سوت جۇيەسى جانە بەلسەندى ازاماتتىق قوعام قالىپتاستى» دەلىنگەن حاتتا.
سونداي-اق باسقوسۋدا ق ر پارلامەنتى سەناتىنىڭ دەپۋتاتى، كونستيتۋسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ ءتوراعاسى ۆلاديمير ۆولكوۆ، ق ر مەملەكەتتىك قىزمەت ىستەرى اگەنتتىگىنىڭ ءتورايىمى انار جايىلعانوۆا، «نۇرسۇلتان نازاربايەۆ» قورى اتقارۋشى ديرەكتورىنىڭ ورىنباسارى، ق ر كونستيتۋسيالىق كەڭەسى جانىنداعى عىلىمي-كونسۋلتاتيۆتىك كەڭەستىڭ مۇشەسى يگور روگوۆ، ق ر بعم عك فيلوسوفيا، ساياساتتانۋ، ءدىنتانۋ ينستيتۋتىنىڭ ديرەكتورى سەرىك سەيدۋمانوۆ، د.قونايەۆ اتىنداعى ەۋرازيالىق زاڭ اكادەمياسىنىڭ رەكتورى ءومىرالى جالايري، «Bank RBK» اق ديرەكتورى مۇسابەك الىمبەكوۆتەر ءسوز الىپ، تاۋەلسىزدىكتىڭ ءمانى مەن ماڭىزى، قۇقىق سالاسىنىڭ دامۋىنا قاتىستى وي-پىكىرلەرىن ورتاعا سالدى.
قاتىسۋشىلار تاۋەلسىز قازاقستاننىڭ دەموكراتيالىق، زايىرلى، الەۋمەتتىك، قۇقىقتىق جانە ءبىرتۇتاس مەملەكەت ەكەنىن، ول ءۇشىن باستى قۇندىلىق ادام جانە ادامنىڭ ءومىرى، قۇقىقتارى مەن بوستاندىقتارى بولىپ تابىلاتىنىن باستى باعدارعا الدى.
كونفەرەنسيا بارىسىندا ازات رەسپۋبليكانىڭ ساياسي جۇيەسىنىڭ وزەكتى ماسەلەلەرى، ونىڭ مەملەكەتتىك تاۋەلسىزدىگى قالىپتاسۋىنىڭ كونستيتۋسيالىق نەگىزدەرى جانە دەموكراتيالىق قاعيداتتارىن دامىتۋداعى ازاماتتىق قوعامنىڭ ءرولى مەن ورنى جان-جاقتى قاراستىرىلدى.
