Táýelsiz, qýatty Qazaqstan – Elbasynyń eńbegi
«Qazaqstan Respýblikasy memlekettik táýelsizdigi qalyptasýynyń saiasi-quqyqtyq jáne ekonomikalyq máseleleri: tarihy jáne qazirgi kezeńi» taqyrybynda ótken aýqymdy sharany Ál-Farabi atyndaǵy QazUÝ, QR Konstitýtsiialyq Keńesi, «Nursultan Nazarbaev» qory men «Qazaqstandaǵy parlamentarizmdi damytý» qoǵamdyq qory uiymdastyrdy. Oǵan memlekettik bilik organdary men akademiialyq orta ókilderi, zańgerler qaýymy qatysty.
Alqaly jiyndy Ál-Farabi atyndaǵy QazUÝ-dyń Basqarma Tóraǵasy – Rektory Janseiit Túimebaev ashyp, el táýelsizdigi mereitoiynyń mańyzdylyǵyna mán berdi. Irgeli bilim ordasynyń rektory:
– Qazaqstan Respýblikasynyń Tuńǵysh Prezidenti – Elbasy Nursultan Nazarbaevtyń basshylyǵymen zamanaýi, básekege qabiletti, indýstriialyq qýatty memleket quryldy» dei kele, qily kezeńdegi Qazaqstan halqynyń qarjylyq daǵdarystarǵa tótep berip, turaqty damý jolyna túskenin aitty. Táýelsiz Qazaqstannyń quqyqtyq negiziniń qalyptasýyndaǵy tarihi oqiǵalarǵa sholý jasai otyryp, Salyq Zimanov, Sultan Sartaev, Ǵairat Saparǵaliev syndy tanymal tulǵalardyń eren eńbegin atap ótti. Sonymen qatar kórnekti qairatker Qazaqstan Respýblikasynyń Prezidenti Q.Toqaev aiqyndap bergendei, aldaǵy mindet «keler urpaqqa Qazaqstandy tuǵyry myǵym, ekonomikasy qýatty, rýhy asqaq memleket retinde tabystaý jáne eldik isterdi shashaý shyǵarmai laiyqty jalǵastyratyn jasampaz urpaq tárbieleý, – dedi.
QR Konstitýtsiialyq keńesiniń tóraǵasy Qairat Mámi óz sózinde
egemen Qazaqstannyń negizi 1991 jyly 16 jeltoqsanda qabyldanǵan Táýelsizdik deklaratsiiasynan bastalatynyn tilge tiek etip, QR Tuńǵysh Prezidenti Nursultan Nazarbaevtyń el damýy jolyndaǵy ólsheýsiz úlesine erekshe toqtaldy. Elbasy bastamasymen basty memlekettik qujat – QR Konstitýtsiiasy qabyldanǵanyn jetkizdi.
«Qazaqstan Konstitýtsiiasy memleket pen qoǵamnyń turaqtylyǵy men órkendeýiniń myzǵymas negizine ainaldy. Onyń talaptaryna sáikes tiimdi demokratiialyq institýttar – prezidenttik basqarý nysany, qos palataly Parlament, esep beretin Úkimet, táýelsiz sot júiesi jáne belsendi azamattyq qoǵam qalyptasty» delingen hatta.
Sondai-aq basqosýda QR Parlamenti Senatynyń depýtaty, Konstitýtsiialyq zańnama, sot júiesi jáne quqyq qorǵaý organdary komitetiniń tóraǵasy Vladimir Volkov, QR Memlekettik qyzmet isteri agenttiginiń tóraiymy Anar Jaiylǵanova, «Nursultan Nazarbaev» qory atqarýshy direktorynyń orynbasary, QR Konstitýtsiialyq Keńesi janyndaǵy ǵylymi-konsýltativtik keńestiń múshesi Igor Rogov, QR BǴM ǴK Filosofiia, saiasattaný, dintaný institýtynyń direktory Serik Seidýmanov, D.Qonaev atyndaǵy Eýraziialyq zań akademiiasynyń rektory Ómiráli Jalairi, «Bank RBK» AQ direktory Musabek Álimbekovter sóz alyp, táýelsizdiktiń máni men mańyzy, quqyq salasynyń damýyna qatysty oi-pikirlerin ortaǵa saldy.
Qatysýshylar Táýelsiz Qazaqstannyń demokratiialyq, zaiyrly, áleýmettik, quqyqtyq jáne birtutas memleket ekenin, ol úshin basty qundylyq adam jáne adamnyń ómiri, quqyqtary men bostandyqtary bolyp tabylatynyn basty baǵdarǵa aldy.
Konferentsiia barysynda azat respýblikanyń saiasi júiesiniń ózekti máseleleri, onyń memlekettik táýelsizdigi qalyptasýynyń konstitýtsiialyq negizderi jáne demokratiialyq qaǵidattaryn damytýdaǵy azamattyq qoǵamnyń róli men orny jan-jaqty qarastyryldy.
