پرەمەر-مينيستر ولجاس بەكتەنوۆ ەكى ەلدىڭ بيزنەس-قوعامداستىعىنىڭ 300-دەن استام وكىلى قاتىسقان قازاقستان-فرانسيا ينۆەستيسيالىق فورۋمىن اشتى، دەپ حابارلايدى Dalanews.kz.
فورۋمنىڭ كۇن تارتىبىندە ساۋدا-ەكونوميكالىق قاتىناستاردى، كولىك، ەنەرگەتيكا جانە ونەركاسىپتىك الەۋەتتى دامىتۋ، ازىق-تۇلىك قاۋىپسىزدىگى مەن دەنساۋلىق ساقتاۋ سالاسىنداعى ىنتىماقتاستىق، قالالاردى تۇراقتى دامىتۋ جانە قالالىق ورتانىڭ ساپاسىن جاقسارتۋ، سونداي-اق تكش جانە تۋريزم سالالارىن نىعايتۋ مەن ءارتاراپتاندىرۋعا ارنالعان كەڭ اۋقىمدى ماسەلەلەر تۇر.
وتكەن جىلى ەكى ەل اراسىنداعى تاۋار اينالىمى 31%-عا ارتىپ، 5،5 ملرد دوللار رەكوردتىق كورسەتكىشكە جەتتى، ونىڭ ىشىندە ەكسپورت كولەمى 3،6 ملرد دوللاردى قۇرادى. قازاقستانداعى فرانسۋز ينۆەستيسياسى 20 ملرد دوللارعا جاقىندادى، ەلىمىزدە فرانسۋز كاپيتالىنىڭ قاتىسۋىمەن 200-دەن استام كومپانيا بەلسەندى جۇمىس ىستەپ كەلەدى.
بۇگىندە قازاقستان فرانسيا ءۇشىن جەتەكشى سەرىكتەس سانالادى، ورتالىق ازيا ەلدەرىمەن بارلىق ساۋدانىڭ 80%-عا جۋىعى ونىڭ ۇلەسىنە تيەسىلى.
فورۋمدى اشقان پرەمەر-مينيستر ولجاس بەكتەنوۆ ەكى مەملەكەت باسشىلارى دەڭگەيىندەگى سەنىمدى قارىم-قاتىناستار ناتيجەسىندە ەكىجاقتى بايلانىس ستراتەگيالىق ارىپتەستىكتىڭ كەڭەيتىلگەن دەڭگەيىنە كوتەرىلگەنىن اتاپ ءوتتى.
"فرانسيامەن ىنتىماقتاستىق – قازاقستاننىڭ سىرتقى ساياساتىنداعى نەگىزگى باسىمدىقتاردىڭ ءبىرى جانە ەۋروپالىق وداق شەڭبەرىندەگى سەرىكتەستىگىمىزدىڭ اجىراماس بولىگى. ءبىزدىڭ ەلدەرىمىز بەرىك ساياسي بايلانىستارمەن، بەلسەندى ۇكىمەتارالىق جانە پارلامەنتتىك ديالوگپەن، سونداي-اق قارقىندى ساۋدا جانە ينۆەستيسيالىق ءوزارا ىس-قيمىلمەن ەرەكشەلەنەتىن بەرىك جانە كوپقىرلى سەرىكتەستىككە يە"،- دەپ اتاپ ءوتتى ولجاس بەكتەنوۆ.
پرەمەر-مينيستر قازاقستاننىڭ وڭتۇستىگىندە قۋاتى 1 گۆت بولاتىن تotal Energies كومپانياسىمەن جەل ەلەكتر ستانساسىن سالۋ، Alstom كومپانياسى ۇسىنعان ءوندىرىستى وقشاۋلاۋ جانە تەمىرجول سەكتورىنا جاڭا ينۆەستيسيا، Air Liquide كومپانياسىنىڭ پاۆلودار محز-داعى سۋتەگى ەنەرگەتيكاسى بويىنشا جوباسى، Danone، Lactalis جانە Lidea جانە ت. ب. قاتىسۋىمەن تاماق جانە ءسۇت ونەركاسىبىن دامىتۋ سياقتى نەگىزگى بىرلەسكەن جوبالارعا توقتالدى.
قازاقستان ترانسكاسپيي حالىقارالىق كولىك باعىتىن دامىتۋعا جانە جي، فارماسيەۆتيكا، تۋريزم جانە سۋ رەسۋرستارىن باسقارۋ سياقتى سەكتورلارداعى ىنتىماقتاستىققا مۇددەلى.
سونداي-اق استانا مەن الماتىدا فرانسۋز مەكتەپتەرىنىڭ اشىلۋى، اباي اتىنداعى قازۇپۋ-داعى Lumière ورتالىعىنىڭ جانە لوتارينگيا ۋنيۆەرسيتەتى فيليالىنىڭ جۇمىسىن قوسا العاندا، ءبىلىم بەرۋ جانە عىلىمي كووپەراسياداعى ىلگەرىلەۋشىلىك اتاپ ءوتىلدى.
ولجاس بەكتەنوۆ قازاقستان شەتەلدىك ارىپتەستەر ءۇشىن قولايلى ينۆەستيسيالىق احۋال جاساۋعا تولىق نيەتتى ەكەنىن اتاپ ءوتتى. قازىرگى ۋاقىتتا قازاقستان ۇسىنىپ وتىرعان ينۆەستورلار ءۇشىن مۇمكىندىكتەرگە، قۇقىقتىق كەپىلدىكتەر، سالىقتىق جەڭىلدىكتەر، ارنايى ەكونوميكالىق ايماقتارعا جانە احقو-عا نازار اۋدارىلۋدا.
فورۋم قازاقستان مەن فرانسيا پرەزيدەنتتەرى اراسىنداعى ۋاعدالاستىقتارىنىڭ ءىس جۇزىندەگى جالعاسى بولۋعا جانە ىسكەرلىك ىنتىماقتاستىقتى كەڭەيتۋگە، جاڭا ينۆەستيسيالىق جوبالاردى ىسكە قوسۋعا جانە ەكى ەلدىڭ بيزنەسى اراسىنداعى بايلانىستاردى نىعايتۋعا باعىتتالعان.
ءىس-شارا قورىتىندىسى بويىنشا ەنەرگەتيكا، كولىك، دەنساۋلىق ساقتاۋ جانە سۋ رەسۋرستارى سالالارىنداعى كەلىسىمدەردى قوسا العاندا، ءبىرقاتار قۇجاتقا قول قويۋ جوسپارلانعان.
