Dalanews.kz ساراپشىنىڭ پىكىرىن ىقشامداپ ۇسىندى.
«تاسماعامبەتوۆتىڭ قازاق باسىلىمىنا بەرگەن سۇحباتى اۋىزدان-اۋىزعا تاراپ، الىس-جاقىندى ارالاپ كەتتى. تۇيدەك-تۇيدەك ويلارى اپ-ساتتە افوريزمگە اينالىپ، ەكس-ەلشىنى كوز ۇشىنان جوعالتىپ العان جۇرت «ءاي، جارايسىڭ!» دەستى. يمەكەڭ وسى ارقىلى ەلەگىزىپ وتىرعان اۋديتوريانىڭ تامىرىن باستى»، – دەيىن گروزين.
ونىڭ پىكىرىنشە تاسماعامبەتوۆ وڭايشىلىقپەن ۇيدە وتىرمايدى. زەينەتكە كەتكەنمەن ساياساتتى ساعىنىپ ءجۇر. قايتىپ ورالۋدىڭ ءامال-ادىسىن ىزدەستىرۋدە. ءال ءازىر ورالۋدىڭ فورماتىن ويلاستىرۋدا.
رەسەي ساراپشىسى تاسماعامبەتوۆتىڭ «قازاق ادەبيەتىنە» بەرگەن سۇحباتىن باسىنان اياعىنان دەيىن ءسۇزىپ شىعىپتى.
«ساياساتقا ورالۋ تۋرالى ءتىس جارماعان تاسماعامبەتوۆ ءبىر ساۋساعىن بۇگىپ قالدى»، – دەيدى گروزين.
«بار جوسپارىن جايىپ سالعىسى كەلمەدى. تەلەگرام-ارنالار دا تاسماعامبەتوۆپەن بايلانىستى كونتەنتتى كۇرت كوبەيتىپ، كۇيەۋبالاسى كەڭەس راقىشيەۆقا قاتىستى كومپروماتتى ۇستى-ۇستىنە توپەلەتىپ جاتىر. ونىڭ ورالۋىنا بۇل جايت تا تۇرتكى بولۋى مۇمكىن.
قاراپايىم لوگيكاعا سالساق تا، تاستىڭ سالماعى تىم اۋىر. ونىڭ قاعا بەرىستە قالماسى ايان. ودان بۇرىن تاسماعامبەتوۆ تاستاپ كەتكەن ورىنعا لايىقتى ۇمىتكەر تابىلماي تۇر. ورنى ويسىراپ تۇر. مۇنىڭ ىشكى ساياسي احۋالعا دا كەرى اسەرىن تيگىزەرى انىق»، – دەيدى ساياساتتانۋشى.
...
گروزين نەگە بۇلاي بولجايدى؟ قازاقستانداعى ساياسي ەليتانىڭ ءاۋىس-تۇيىسىن الىستان شولىپ وتىرعان كرەمل ساراپشىسى «قازىرگى قازاق ەليتاسى ۇساقتالىپ كەتتى» دەپ ۇيعارعان ەكەن. بۇعان اكىم-قارالارعا قاراپ-اق كوز جەتكىزۋگە بولادى.
«قازىرگى اكىمدەردە حاريزما جوق. حالىقتى وزىنە قاراتار قابىلەتى جوق. ءتىپتى كەيبىر اكىمدەردى ءوز ءوڭىرىنىڭ جۇرتى جىعا تانىمايدى. شىنايى ومىردەن قول ۇزگەن، ءوي-ورىسى تار كادرلەر كوبەيىپ كەتتى»، – دەيدى گروزين.
ونىڭ پىكىرىنشە كوشەربايەۆتىڭ كاليبرىندەگى اكىمدەردىڭ ءداۋىرى كەلمەسكە كەتكەن. بۇرىنعى اكىمدەر مەن قازىرگى اكىمدەردىڭ اراسى جەر مەن كوكتەي. سودان دا بولار قازاقستاننىڭ ساياسي الاڭى تاسماعامبەتوۆ سەكىلدى تۇلعاعا سۋساپ وتىر.
«ول ساياساتتى اينالسوقتاپ ءجۇر. ورتاعا ورالۋدىڭ امالىن تابارى انىق. ءبىراق وعان دا قولداۋ كەرەك. يمەكەڭە يىعىن توسەپ، قولتىعىنان دەمەپ جىبەرەر كىم بار؟! ساياساتتاعى وپپونەنتتەرى دە قاراپ قالماس. قارسى تۇراتىن تاراپتار دا تابىلادى».
ءسوي دەگەن گروزين تاسماعامبەتوۆتىڭ ساياساتقا ورالۋى توقايەۆتىڭ قاس-قاباعىنا قاراپ تۇر دەپ دولبارلاپتى. پرەزيدەنت تاسماعامبەتوۆتىڭ دەڭگەيىندەگى تۇلعالارعا كەڭشىلىك جاساسا، يمەكەڭنىڭ قاتارعا قوسىلۋى دا وڭاي بولماق ەكەن.
«توقايەۆ ەكس-ەلشىنى كونكۋرەنتى ەمەس، كەرىسىنشە وداقتاسى، ارىپتەسى رەتىندە باعالاي ما، جوق پا؟ ماسەلە سوندا...»، – دەيدى ساراپشى.
...
گروزيننىڭ توقايەۆتى تىلگە تيەك ەتۋى بەكەر ەمەس. يمەكەڭنىڭ «قازاق ادەبيەتىندەگى» سۇحباتىن تاعى ءبىر مارتە ەلەكتەن وتكىزگەن ساياساتتانۋشى ەكس-ەلشىنىڭ cءوز ساپتاۋىنان مىنانى اڭعارىپتى:
«تاسماعامبەتوۆ «مەن نازاربايەۆتىڭ ءتول ءونىمى ەمەسپىن» دەگەندى ايتقىسى كەلگەندەي كورىندى. ءبىر كەزدەرى ءسوي دەگەنى راس. ءبىراق بۇل جولى سول سوزىنەن اينىعانىن اڭعارتتى.
ونىڭ لاتىن ءالىپبيىن سىنعا الۋى تۇڭعىش پرەزيدەنتكە ءتيىپ كەتتى. بۇل باستامانىڭ توبە باسىندا تۇرعان نازاربايەۆتىڭ ءوزى ەدى. لاتىنعا كوشۋ يدەياسىن ريەۆيزيالاۋعا ەكىنىڭ ءبىرىنىڭ جۇرەگى داۋالاي بەرمەيدى. بۇل نازاربايەۆ يدەولوگياسىنا بالتا شابۋمەن تەڭ.
توقايەۆتىڭ ءوزى دە جاڭا الىپبيگە بايىپتاپ، بايقاستاپ كوشۋ كەرەگىن ءبىر ەمەس، بىرنەشە رەت ايتقان. سوعان قاراعاندا نازاربايەۆتىڭ باستاماسىن تەجەي تۇرعىسى كەلەتىن تاراپتار بار سىندى...»، – دەيدى ساراپشى.
ونىڭ پىكىرىنشە تاسماعامبەتوۆ بۇل ارادا توقايەۆتىڭ ءسوزىن سويلەپ وتىر. قازىرگى پرەزيدەنتتىڭ سەنىمدى سەرىگى بولۋعا ءازىر ەكەنىن اڭعارتقىسى كەلەدى. توقايەۆپەن «وداقتاسۋعا» قارسى ەمەس.
«سۇحباتتى ءسۇزىپ شىقساڭىز بۇعان انىق كوزىڭىز جەتەدى. يمەكەڭنىڭ قازاق ينتەلليگەنسياسى مەن قازاق جاستارى قاتىستى پىكىرى دە توقايەۆتىڭ تۇجىرىمىمەن ۇندەسىپ تۇر. وسى ارقىلى ەسكى جۇيەنىڭ ولقىلىقتارىن كورسەتكىسى كەلدى. قازاقستاننىڭ قازىرگىدەي جاعدايعا ءبىر كۇندە تاپ بولماعانىن، بۇل وتكەن وتىز جىلدىڭ جەمىسى ەكەنىن ايتقىسى كەلدى»، – دەيدى گروزين.
البەتتە، يمەكەڭنىڭ ءسوزىن سان-ساققا جۇگىرتۋگە بولادى. كرەمل ساراپشىلارى تاسماعامبەتوۆتىڭ سۇحباتىن وسى قىرىنان باعامداعان ەكەن.
«ول كىتاپحانادان تەرىس اينالىپ، اقورداعا قاراي ويىسا باستادى» دەپ پايىمداپتى ولار.
گروزيننىڭ ايتۋىنشا كىتاپحانا مۇنى جاۋاپسىز قالدىرمايدى. الداعى ۋاقىتتا اتىشۋلى LRT ىسىندە جاڭا ايعاقتار پايدا بولۋى مۇمكىن. اتالعان جوبانى تاسماعامبەتوۆ جانە ونىڭ كۇيەۋبالاسى كەڭەس راقىشيەۆپەن بايلانىستىراتىن كونتەنت كوبەيىپ كەتتى سوڭعى كەزدە.
ازىرلەگەن، دۋمان بىقاي
