“ٶزاتوم” باسشىسى ەزٸم احمەدحوجاەۆ رەسەي ٶكٸلدەرٸمەن ٶزبەكستاندا اتوم ەلەكتر ستانتسيياسىن سالۋ جٶنٸندەگٸ كەلٸسسٶزدەر تەك جالپىلاما مەلٸمدەمەلەر ەكەنٸن جەتكٸزدٸ, دەپ حابارلايدى Dalanews.kz.
باق ٶكٸلدەرٸنٸڭ قويعان سۇراعىنا ول بۇل مەسەلە بويىنشا ەلٸ ناقتى شەشٸم قابىلدانباعانىن اتاپ ٶتتٸ.
“بٸز قازٸر جاي عانا كەلٸسسٶز جٷرگٸزٸپ جاتىرمىز. جالپىلاما مەلٸمدەمەلەردەن باسقا ناقتى ەشتەڭە جوق. رەسەي جاعى دا جالپىلاما مەلٸمدەمە جاساپ, بٸراق قوسىمشا مەلٸمەت بەرٸپ, باسقاشا استارلاپ جٷر. بٸراق قازٸر ناقتى ەشتەڭە جوق. جالپىلاما مەلٸمەتتەر عانا", - دەيدٸ ٶزبەكستان اتوم ەنەرگەتيكاسىن دامىتۋ جٶنٸندەگٸ اگەنتتٸك ديرەكتورى.
ٶتكەن اپتادا “روساتوم” كورپوراتسيياسى باس ديرەكتورىنىڭ بٸرٸنشٸ ورىنباسارى كيريلل كوماروۆتىڭ ايتۋىنشا, ٶزبەكستانمەن اەس قۇرىلىسىنا قاتىستى كەلٸسسٶزدەر “ەجەپتەۋٸر سەتتٸ” ٶتٸپ جاتىر.
“بٸز وسى جوبانى جٷزەگە اسىرۋعا كەز كەلگەن ۋاقىتتا دايىنبىز”, - دەيدٸ “روساتوم” ٶكٸلٸ.
ٶزبەكستان ەنەرگەتيكا مينيسترٸ جۋرابەك ميرزاحمۋدوۆ بىلتىر قاراشادا تاشكەنت اەس قۇرىلىسىنا قاتىستى رەسەي “تەجٸريبەسٸ مەن تەحنولوگيياسىن” عانا ەمەس, باسقا دا ەلدەردٸ دە قاراستىرىپ جاتىر دەپ مەلٸمدەگەن.
ەسكە سالايىق, 2018 جىلى قىركٷيەكتە ٶزبەكستان رەسەيمەن اتوم ەلەكتر ستانتسيياسىنىڭ قۇرىلىسى تۋرالى ەرٸپتەستٸك تۋرالى كەلٸسٸمگە قول قويعان. ەش ەسكەرتۋسٸز قابىلدانعان شەشٸم ٶزبەكستانعا كٶرشٸلەس ورنالاسقان مەملەكەتتەردٸڭ الاڭداۋشىلىعىن تۋدىرعان بولاتىن.
دەرەكتەرگە سٷيەنسەك, اەس ٶزبەكستان-قازاقستان شەكاراسىنان 40 كيلومەتر جەردە ورنالاسقان جيزاق وبلىسى تۇزقان كٶلٸنٸڭ ماڭىندا سالىنادى دەگەن جوسپار بار. بۇل - ايدار-ارناساي كٶلدەر جٷيەسٸنٸڭ بٶلٸگٸ. مۇندا ستراتەگييالىق ماڭىزدى نىسان شاردارا سۋ قويماسى ورىن تەپكەن. سونىمەن قاتار زاۋىت ٷش ميلليون حالىقتى قامتىعان ٶزبەكستان استاناسى تاشكەنتتەن نەبەرٸ 140 كم قاشىقتا بوي كٶرسەتپەك.
سوندىقتان جوبا ورتالىق ازيياداعى ەكولوگييالىق تەپە-تەڭدٸك پەن ينۆەستيتسييالىق احۋالعا قاۋٸپ تٶندٸرٸپ, ايماقتىق قاۋٸپسٸزدٸك شيەلٸنٸستەرٸن ودان ەرٸ ۋشىقتىرۋى مٷمكٸن. قالا بەردٸ ٶزبەكستاننىڭ رەسەيگە ستراتەگييالىق تۇرعىدان تەۋەلدٸ بولۋ كٶرسەتكٸشٸ دە ارتپاق.
ال ساراپشىلار مۇندا ماگنيتۋداسى 6,0-6,5-كە دەيٸن, تٸپتٸ ودان دا جوعارى جەر سٸلكٸنٸسٸ بولادى دەپ دابىل قاعۋدا. راسىمەن دە, ٶزبەكستاننىڭ بٸرنەشە قالاسىندا سەيسميكالىق بەلسەندٸلٸك جوعارى. سونىڭ ٸشٸندە زاۋىتقا جاقىن جەردە ورنالاسقان جيزاق ەلدٸ-مەكەنٸ جەر سٸلكٸنٸسٸنە سەزٸمتال ايماق ەكەنٸن اتاپ ٶتكەن جٶن. ريحتەر شكالاسى بويىنشا بۇل جەردە 9 باللدىق اپات بولۋى مٷمكٸن.
