وبلىستىڭ ورتالىعى رەتىندە باستالعان جيىنعا العاشقى كوشتى تۇركىستان وبلىسىنىڭ اكىمى جانسەيىت تۇيمەبايەۆ باستاپ باردى. ولاردىڭ قاتارىندا وبلىتىق ءماسليحات حاتشىسى ق.بالابييەۆ، «نۇر وتان» پارتياسى وبلىستىق فيليال ءتوراعاسىنىڭ ءبىرىنشى ورىنباسارى ن.جولداسوۆ، قوعامدىق كەڭەس ءتوراعاسى ءو.مەلدەحانوۆ سىندى حالىق قالاۋلىلارى مەن زيالى قاۋىم وكىلدەرى، ارداگەرلەر بولدى. شىمكەنتتەن تۇركىستانعا جەتكەن توپتى جەرگىلىكتى تۇرعىندار زور قۋانىشپەن قارسى الدى.
تاريحي ءساتتى تاماشا مەرەكەگە ۇلاستىرۋ ماقساتىندا استانا مەن الماتىدان ارنايى انشىلەر توبى دا تۇركىستاندىقتاردىڭ قۋانىشىنا ورتاقتاسا كەلدى. ولاردىڭ ورتاسىندا ەلىمىزگە بەلگىلى ونەر جۇلدىزدارى – جۇبانىش جەكسەن ۇلى، ماقپال ءجۇنىسوۆا، ۇلىقپان جولداسوۆ، سايات مەدەۋوۆ، ايگۇل يمانبايەۆا، تامارا اسار، عادىلبەك جاناي، جازيرا مەن جانبولات سىندى وننان استام تانىمال انشىلەر ءان سالىپ، حالىقتىڭ مەرەيىن اسىردى.
مەرەكەلىك جيىندا سويلەگەن تۇركىستان وبلىسىنىڭ اكىمى ج. تۇيمەبايەۆ ەلباسى جارلىعىنىڭ ستراتەگيالىق ماڭىزىنا ەرەكشە توقتالىپ، ەجەلدەن قازاق حاندىعىنىڭ ورتالىعى، كۇللى تۇركى جۇرتىنىڭ رۋحاني ورداسىنىڭ ەندىگى باعىتىن قولداپ-قۋاتتاۋعا شاقىردى.
– سىزدەردى كونە شاھار تۇركىستاننىڭ وبلىس ورتالىعى مارتەبەسىن يەمدەنگەن تاريحي ساتىمەن شىن جۇرەكتەن قۇتتىقتايمىن! پرەزيدەنتىمىز اتاپ كورسەتكەندەي ءوڭىردىڭ وركەندەۋىنە تىڭ سەرپىن بەرۋىن كوزدەگەن شەشىمنىڭ تاريحي ءمان-ماعىناسى وتە تەرەڭدە. بۇل قادام كونە شاھاردىڭ قويناۋىندا جاتقان تاريحي جادىگەرلەردىڭ قايتا جارقىراپ، ءوڭىردىڭ الەۋمەتتىك-ەكونوميكالىق الەۋەتىنىڭ كوتەرىلۋىنە، جەرگىلىكتى تۇرعىنداردىڭ تۇرمىس ساپاسىنىڭ ارتۋىنا وڭ ىقپال جاسايتىنى ءسوزسىز. 1500 جىلدان استام تەرەڭ تاريحى بار قالانىڭ ءححى عاسىرداعى جاڭا تىنىسى اشىلعالى تۇر. ۇلت كوشباسشىسىنىڭ ماڭگىلىك ەلدى قالىپتاستىرۋداعى ۇلى ماقساتتارىمەن ۇيلەسكەن مۇنداي ساياسي شەشىمدى جۇزەگە اسىرۋعا جانجۇرەگىمىزبەن ايانباي ەڭبەك ەتەيىك، – دەگەن جانسەيىت قانسەيىت ۇلىنىڭ تەبىرەنىستى تىلەگىن مىڭداعان تۇرعىندار زور ىقىلاسپەن قابىل الدى.
سالاتاناتتى كونسەرتتە تۇركىستاندىقتاردىڭ تىلەگىن قالالىق اقساقالدار كەڭەسىنىڭ مۇشەسى شورا ەسمولدايەۆ قۋانا جەتكىزدى. ەلاعاسى ەلباسىنىڭ جارلىعى تەك تۇركىستاندىقتاردى عانا ەمەس، تۇتاس ەلدىڭ رۋحىن كۇشەيتكەن كورەگەن توقتاپ بولعانىنا باسا ءمان بەرىپ، حالىقتىڭ اتىنان ايرىقشا العىسىن جەتكىزدى.
الاڭعا جينالعان قاۋىم ەستارادا جۇلدىزدارىنىڭ ونەرى مەن وتشاشۋدى تاماشالىپ، شىن ريزالىقتارىن ءبىلدىردى. كەرەمەت كەش حالىقتىق دۋمانعا ۇلاستى.
