بۇعان مۋحورياپوۆتىڭ مەملەكەتتىك تىلگە قاتىستى مالىمدەمەسى سەبەپ بولدى.
ءورىستىلدى سايتتاردىڭ بىرىنە: “ەگەر ءسىز ورىسشا سۇراپ، سىزگە قازاقشا جاۋاپ بەرسە، ول ۇلتشىلدىق، ءارى تومەن مادەنيەتتىڭ بەلگىسى” دەگەن كاسىپكەردىڭ ءسوزى ءقازاقتىلدى اۋديتوريانىڭ اشۋ-ىزاسىن تۋعىزدى.
بيزنەسمەننىڭ الەۋمەتتىك جەلىدەگى پاراقشاسىنا 10 مىڭنان اسا پىكىر جازىلىپ، ءقازاقتىلدى ورتا مۋحورياپوۆتىڭ ەل الدىندا كەشىرىم سۇراۋىن تالاپ ەتتى.
“راميل مۋحورياپوۆتىڭ وسى رەپليكاسى بار جاعىنان العاندا تۇسىنىسپەۋشىلىك تۋعىزىپ وتىر. سەبەبى بۇگىن مەملەكەت باسشىسىنىڭ ءوزى قازاق تىلىنە قاتىستى ساياسي ارانداتۋشىلىقتى قويۋ كەرەك دەپ ەسكەرتكەن بولاتىن. راميل مۋحورياپوۆ بۇل تۇرعىدا كوپ نارسەنى ۋشىقتىرىپ جىبەرگەن سياقتى جانە ونىڭ ارتى بيزنەسى ءۇشىن جاقسىلىقپەن اياقتالمايتىنى كورىنىپ تۇر”، – دەيدى وسى ورايدا ايبار ولجاي.
ال ءقازاقتىلدى اۋديتوريا كاسىپكەردىڭ ونىمدەرىنە بويكوت جاريالاماق. ونىڭ ونىمدەرىنە بالامالار ۇسىنىلا باستاعان.
Choco ونىمدەرىن تۇتىنباي، تولىق الماستىرۋعا بولا ما؟ Dalainside تەلەگرام ارناسىنىڭ جازۋىنشا:
- Chocolife.me كۋپوندارىن BeSmart-قا؛
- Chocotravel اۆيابيلەت سەرۆيسىن Kaspi تريەۆەلگە؛
- Chocofood جەتكىزۋ سەرۆيسىن Glovo مەن Wolt-قا؛
- Chocomart.kz، Lensmark.kz ينتەرنەت دۇكەندەرىن Kaspi.kz دۇكەنىنە؛
- iDoctor.kz دارىگەر ىزدەۋ سەرۆيسىن Doq.kz سەرۆيسىنە؛
- راحمەت كەشبەك ءموبيلدى قوسىمشاسىن Dosmart قوسىمشاسىنا الماستىرۋعا بولادى.
“بىلتىر ChocoFamily ۆىرۋچكاسى 17،8 ميلليون دوللار بولعان. ونىڭ ىشىندەگى تازا كىرىس بويىنشا اقپارات جوق. بويكوت – ەگەر ول شىن جۇمىس ىستەي باستاسا، ەندى قاراشا-جەلتوقسان ايلارىنىڭ تۇسىمىنە اسەر ەتەتىن بولادى.
نەگىزى، Choco ءۇشىن جەلتوقسان، جاڭا جىل قارساڭى – ەڭ تابىستى كەزەڭ. تۋرا سول تابىستى ۋاقىتتىڭ الدىندا تاجىريبەلى بيزنەسمەننىڭ بۇلاي قاتەلەسۋى كۇتپەگەن جاعداي بولدى”، – دەيدى ايبار ولجاي.
[perfectpullquote align="full" bordertop="false" cite="" link="" color="" class="" size=""]
PR-شى بۇل ماسەلەنى جىلى جابا سالعاندى ءجون ساناماعان.[/perfectpullquote]
“مۋحورياپوۆ زاڭدى بۇزدى ما؟ باستى سۇراق وسى. وعان تەك قانا قۇزىرلى ورگان ارنايى تەكسەرۋدەن كەيىن جاۋاپ بەرە الادى. ءبىراق ول ءۇشىن ازاماتتىق قوعام قۇزىرلى ورگانعا جۇگىنۋى ءتيىس.
كونستيتۋسيالىق پرينسيپپەن راميل مۋحورياپوۆتىڭ رەپليكاسىن ق ر قىلمىستىق كودەكسىنىڭ 174 بابى، 1 تارماعى بويىنشا تەكسەرۋدى سۇراپ، الماتى قالاسىنىڭ پروكۋراتۋراسىنا ارىز جىبەردىم. ارىز جت-2022-02543155 نومىرىمەن رەسمي تىركەلدى. 11 قاراشاعا دەيىن پروكۋراتۋرا رەسمي جاۋابىن جىبەرەدى”، – دەيدى ارىپتەسىمىز.
وسى 174 باپ نە دەيدى جانە ونىڭ جازاسى قانداي؟
ق ر قىلمىستىق كودەكسىنىڭ 174 بابى الەۋمەتتiك، ۇلتتىق، رۋلىق، ءناسiلدiك، تەكتىك-توپتىق نەمەسە دiني الاۋىزدىقتى قوزدىرۋ بويىنشا ماسەلەلەردى رەتتەيدى.
1ء-شى بابىندا “الەۋمەتتiك، ۇلتتىق، رۋلىق، ءناسiلدiك، تەكتىك-توپتىق نەمەسە دiني الاۋىزدىقتى قوزدىرۋعا، ازاماتتاردىڭ ۇلتتىق ار-نامىسى مەن قادiر-قاسيەتiن نە دiني سەزiمدەرiن قورلاۋعا باعىتتالعان قاساقانا ارەكەتتەر، سول سياقتى ازاماتتاردىڭ دiنگە كوزقاراسى، تەكتiك-توپتىق، ۇلتتىق، رۋلىق نەمەسە ءناسiلدiك قاتىستىلىعى بەلگiلەرi بويىنشا ولاردىڭ ايرىقشالىعىن، ارتىقشىلىعىن نە تولىققاندى ەمەستىگىن ناسيحاتتاۋ، ەگەر بۇل ىس-ارەكەتتەر جاريا نەمەسە بۇقارالىق اقپارات قۇرالدارىن نەمەسە تەلەكوممۋنيكاسيالار جەلىلەرىن پايدالانا وتىرىپ، سول سياقتى الەۋمەتتiك، ۇلتتىق، رۋلىق، ءناسiلدiك، تەكتىك-توپتىق نەمەسە دiني الاۋىزدىقتى ناسيحاتتايتىن ادەبيەتتى نەمەسە وزگە دە اقپارات جەتكiزگiشتەردi دايىنداۋ نەمەسە تاراتۋ جولىمەن جاسالسا”، – دەپ كورسەتىلگەن.
ال جازاسى – ەكى مىڭنان جەتى مىڭعا دەيىنگى ايلىق ەسەپتىك كورسەتكىش مولشەرىندەگى ايىپپۇل نە ەكى جىلدان جەتى جىلعا دەيiنگi مەرزiمگە باس بوستاندىعىن شەكتەۋگە نە سول مەرزiمگە باس بوستاندىعىنان ايىرۋ.
راميل مۋحورياپوۆ قىلمىس جاسادى ما؟
“الدىمەن پروكۋراتۋرا ونىڭ بەلگىلەرىن انىقتايدى. ەگەر، يا، انىقتالسا، ماتەريالدار جيناپ، ساراپتاما جاساپ، سوتقا جىبەرەدى. سوت تاراپتاردىڭ دالەلدەرىن تىڭداپ، شەشىم شىعارادى. ياعني، بارلىق ىسكە نۇكتەنى سوت قويادى. ەگەر پروكۋراتۋرا قىلمىس بەلگىلەرىن تاپپاسا، ول ناقتى دالەلمەن رەسمي جاۋاپ بەرەدى.
ەگەر مۋحورياپوۆتىڭ قىلمىسى دالەلدەنىپ، سوت شەشىمى شىقسا، ول قانداي جازاعا تارتىلۋى مۇمكىن؟
مۇنداعى ەڭ مينيمالدى جازا – 2 مىڭ ايلىق ەسەپتىك كورسەتكىش. ءقازىر ءبىر اەك – 3063 تەڭگە.
دەمەك، ChocoFamily باسشىسىنىڭ ەڭ از جازاسى – 6 126 000 تەڭگە ايىپپۇل بولۋى مۇمكىن.
ءبىراق تەك مۇمكىن دەپ تۇرمىن. سەبەبى ماسەلەنى قۇزىرلى ورگاندار مەن سوت قانا شەشەدى”، – دەيدى ايبار ولجاي.
