قما الماتى وبلىسى بويىنشا دەپارتامەنتى «Amanat Drive» اتاۋىمەن قارجى پيراميداسىنىڭ قىزمەتىن اشكەرەلەدى، دەپ حابارلايدى Dalanews.kz.
قارجى پيراميدانىڭ ۇيىمداستىرۋشىلارى ازاماتتارعا پايىزسىز ءبولىپ تولەۋ ارقىلى جىلجىمايتىن مۇلىك پەن اۆتوكولىك ساتىپ الۋدى ۇسىنعان.
الايدا بۇل مىندەتتەمەلەر تولىق ورىندالماعان، ال مۇلىك تۋىستارى مەن جاقىندارىنا بەرىلگەن.
ناتيجەسىندە قارجى پيراميداسى 8 مىڭنان استام سالىمشىنى تارتقان، ولاردىڭ جالپى سالعان قاراجاتى 21 ملرد تەڭگەدەن اسقان.
قىلمىستىق جولمەن الىنعان كىرىستەردى زاڭداستىرۋ ماقساتىندا، قارجى پيراميدانىڭ ۇيىمداستىرۋشىسى بىرنەشە دەڭگەيلى زاڭسىز سحەما جاساعان. ول ءوز باقىلاۋىنداعى زاڭدى تۇلعالاردى — «اللو، نە كەرەك»، «i-m@rketing»، «Gold SapaPremium» ج ش س — پايدالانعان.
اتالعان كومپانيالار جالعان جەتكىزۋشىلەر رەتىندە كورسەتىلىپ، جارناما قىزمەتتەرى، جىلجىمايتىن مۇلىك پەن كولىك نارىعىنا تالداۋ مەن بولجاۋ جۇرگىزۋ سەكىلدى قىزمەتتەردى ورىنداعان بولىپ كورىنگەن. وسى جالعان شارتتار نەگىزىندە 1،8 ملرد تەڭگەدەن استام قاراجات قولما-قول اقشاعا اينالدىرىلىپ، سىرتقا شىعارىلعان.
قىلمىستىق كىرىستەر ەسەبىنەن جەكە تۇرعىن ۇيلەر، استانادا پاتەرلەر، سونداي-اق HUMMER H2 جانە Lexus LX570 ماركالى قىمبات اۆتوكولىكتەر ساتىپ الىنعان. بۇل مۇلىكتەر مۇمكىن بولاتىن تاركىلەۋدەن جاسىرىنۋ ماقساتىندا سەنىمدى ادامداردىڭ اتىنا راسىمدەلگەن.
سوت سانكسياسىمەن اتالعان مۇلىككە جانە تۇتىنۋ كووپەراتيۆىنىڭ شوتتارىنا تىيىم سالىندى.
قارجى پيراميدانىڭ باس ۇيىمداستىرۋشىسى قاماۋعا الىندى.
تەرگەۋ امالدارى جالعاسۋدا.
ق ر قىلمىستىق ءىس جۇرگىزۋ كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى.
