ول وتكەن ءتۇن ۋكراينا ءۇشىن اسا اۋىر بولعانىن ايتىپ ءوتتى. پۋتين اسكەرى تۇرعىن ۇيلەردى بومبىلاپ، قوعامدىق ينفراقۇرىلىمداردى قيراتۋعا كوشكەنىن مالىمدەدى.
زەلەنسكييدىڭ ايتۋىنشا، وككۋپانتتار كوزىنە تۇسكەن كوزدەپ، قاراپايىم تۇرعىنداردى دا نىساناعا الاتىن بولعان.
"ولار بالاباقشالاردى، تۇرعىن ۇيلەردى قيراتۋدا، ءورت ءسوندىرۋ، جەدەل جاردەم كولىكتەرىنە وق جاۋدىرۋدا. ولار ۋكراينا جەرىنە ارتيللەرياسىن الىپ كىردى. ءدال ءقازىر اگرەسسورلار اسكەري ينفراقۇرىلىمى اتىمەن جوق قالالاردى دا بومبىلاۋدا.
كييەۆ، ۆاسيلكوۆ، چەرنيگوۆ، سۋمى، حاركوۆ سەكىلدى قاھارمان قالالار ەكىنشى دۇنيەجۇزىلىك سوعىستىڭ كۇيىن باستان كەشىرۋدە"، – دەدى زەلەنسكيي.
ول باۋىرلاس بەلارۋس ۇلتىنىڭ ۋكرايناعا قارسى سوعىسىپ جاتقانىنا قىنجىلىس ءبىلدىردى. بەلارۋس اۋماعىندا ورنالاسقان وككۋپانتتار ارمياسىنىڭ زىمىراندارى ۋكراينانىڭ تۇرعىندارىنا باعىتتالىپ جاتقانىن ەسكە سالدى.
ايتا كەتەلىك، بۇگىن بەلارۋستە كونستيتۋسياعا وزگەرىس ەنگىزۋ تۋرالى رەفەرەندۋم باستالدى. وسى جايتتى قاپەرگە العان زەلەنسكيي بەلارۋستەر ءۇشىن سىن ساعات تۋعانىن مالىمدەدى.
"ەرتەڭگى ۇرپاقتىڭ الدىندا ءجۇزىم جارىق بولسىن دەسەڭىز، شەشىمدى ءقازىر قابىلداڭىزدار. بالاڭىزدىڭ كوزىنە ۇيالماي تۋرا قاراۋ ءۇشىن ءوز-وزىڭىزدى الداۋدى دوعارىڭىز، ءادىل تاڭداۋ جاساۋ كەرەگىن انىقتايتىن ءسات تۋدى. ءبىز سىزدەرگە بوتەن ەمەسپىز! رەسەي ەمەس، بەلارۋس بولىڭىزدار! بۇگىن تاريحي كۇن"، – دەدى زەلەنسكيي بەلارۋس تۇرعىندارىنا قاراتىپ.
ۋكراينا پرەزيدەنتى كەلىسسوز الاڭى دەپ ايتىلعان مينسكىگە قاتىستى پىكىر ءبىلدىردى. ونىڭ اتاپ وتكەنىندەي بۇل كييەۆتىڭ شەشىمى ەمەس. بەلارۋس تۇرعىندارىنان دا ەشكىم رۇقسات سۇراماعان. بۇل كرەملدىڭ تاڭداۋى.
[video width="848" height="464" mp4="https://dalanews.kz/wp-content/uploads/2022/02/IMG_6675.mp4" poster="https://dalanews.kz/wp-content/uploads/2022/02/zelenskiy.jpg"][/video]
"ءتورت كۇن بۇرىن بەلارۋس اۋماعىنان بىزگە قاراي زىمىراندار، اسكەري ۇشاقتار مەن تەحنيكالار اعىلدى. تۇرعىنداردىڭ توبەسىنەن بومبا تاستالدى. شىرت ۇيقىدا جاتقان حالىق شوشىپ وياندى.
بەلارۋستەر، ءدال ءقازىر سىزدەر ءتاتتى ۇيقىنىڭ قۇشاعىنداسىزدار. ال ءبىزدىڭ كوز ىلمەگەنىمىزگە تالاي كۇن بولدى. ءبىز ءوز ەلىمىز ءۇشىن كۇرەسىپ جاتىرمىز. ءبىز بوستاندىق ءۇشىن ارپالىسۋدامىز. بۇعان تولىق قۇقىلىمىز!
ەگەر سىزدەر جاقتان شابۋىل جاسالماسا، ءبىز مينسكىگە بارىپ سويلەسۋگە ءازىر ەدىك. وسى كۇنگە دەيىن ورتان بەلدەن ويىسپاعان مينسك ءقازىر ءپۋتيننىڭ قولجاۋلىعىنا اينالىپ كەتتى. سوندىقتان كەلىسسوز الاڭى رەتىندە باسقا ايماقتى تاڭداۋعا ءماجبۇرمىز. تاعدىرشەشتى تاڭداۋ جاسايتىن كەز تاقاپ تۇر، بەلارۋس تۇرعىندارى. بارلىعى، تەك ءوز قولدارىڭىزدا. بەلارۋستىڭ قاي باعىتتا داميتىنىن اقش-تا، رەسەي دە، ۋكراينا دا شەشپەيدى"، – دەدى زەلەنسكيي.
ۋكراينا پرەزيدەنتى بەلارۋستىڭ رەسەي ىقپالىنان قۇتىلىپ، بۇرىنعى دوسپەيىلدى ەلگە اينالارىنا سەنىم ءبىلدىردى. "بارلىعى تاڭداۋ جاساۋعا تىرەلىپ تۇر. سىن ساعاتتا سىنا كورمەڭىزدەر، مۇقالماڭىزدار..."، – دەدى ول.
