عيماراتتىڭ اشىلۋىنا ق ر مادەنيەت جانە سپورت ۆيسە-مينيسترى نۇرعيسا داۋەشوۆ، الماتى وبلىسىنىڭ اكىمىنىڭ ورىنباسارى رۋستەم ءالي، جامبىل اۋدانىنىڭ اكىمى باعدات الييەۆ، قازاقستان مادەنيەتىنىڭ عىلىمي زەرتتەۋ ينستيتۋتىنىڭ ديرەكتورى دوسبول بايقوناقوۆ جانە مينيسترلىككە باعىنىستى مەكەمە باسشىلارى، وزگە دە قوناقتار قاتىستى.
«تاڭبالى» قورىق مۋزەيىنىڭ «ساپار ورتالىعى» 2018-2019 جىلدارى سالىندى. بيىل كورمە زالىن مۋزەيلەندىرۋ جۇمىستارى جۇرگىزىلگەن. زاماناۋي ۇلگىدە جابدىقتالعان جاڭا ورتالىقتا كورمە زالى، كونفەرەنسيا زالى، زەرتحانا، كىتاپحانا، كەڭسە، كەلۋشىلەر ءۇشىن اسحانا جانە ءقوناقۇي بار.
ەكى قاباتتى عيماراتتىڭ جالپى اۋماعى 1478،9 شارشى مەتردى قۇرايدى. عيماراتتىڭ سىرتىندا 5 كيىز ءۇي تىگىلگەن ءداستۇرلى ەتنواۋىل بار. وندا قازاقتىڭ ءداستۇرلى قولونەر، زەرگەرلىك، اڭشىلىق ونەرى، تۇرمىس-سالت بۇيىمدارى جايلى ماعلۇمات الۋعا بولادى.
سونىمەن قاتار «جەتىسۋدىڭ جارتاس ونەرى» اتتى عىلىمي تاجىريبەلىك كونفەرەنسيادا «تاڭبالى» قورىق-مۋزەيى عىلىمي-زەرتتەۋ ءبولىمىنىڭ مەڭگەرۋشىسى رينات شاريپوۆ «جەتىسۋ اۋماعىنداعى جارتاس سۋرەتتەرىن مۋزەيلەندىرۋ»، ارحەولوگيا عىلىمىنىڭ دوكتورى، ءال-فارابي اتىنداعى قازۇۋ تاريح فاكۋلتەتى ارحەولوگيا-ەتنولوگيا كافەدراسىنىڭ مەڭگەرۋشىسى رينات جۇماتايەۆ «ارحەولوگياداعى جارتاس ونەرىنىڭ ەرەكشەلىگى»، تاريح عىلىمىنىڭ كانديداتى، ق ر ۇلتتىق عىلىم اكادەمياسىنىڭ مۇشەسى، ش.ءۋاليحانوۆ اتىنداعى تاريح جانە ەتنولوگيا يستيتۋتىنىڭ جەتەكشى عىلىمي قىزمەتكەرى التىن ۋالتايەۆا «جارتاس بەينەلەرىنىڭ ءمان-ماعىناسى»، قازاقستاننىڭ ەڭبەك سىڭىرگەن ەكسكۋرسوۆودى باقىت ورازىمبەتوۆا «ءتۋريزمدى دامىتۋداعى «تاڭبالىنىڭ» ماڭىزى» تاقىرىبىندا بايانداما جاسادى.
