مەملەكەت باسشىسى نۇرسۇلتان ءابىش ۇلى نازاربايەۆتىڭ سالاماتتى قوعامدى قالىپتاستىرۋ ساياساتىن قولداۋ، سالاۋاتتى ءومىر سالتىن ناسيحاتتاۋدى ماقسات تۇتقان سپورتتىق شارا بارىسىندا ارقان تارتۋ، ۆولەيبول، قازاق كۇرەسى، جەڭىل اتلەتيكا، ۆەلوجارىس، ۇستەل تەننيسى، شاحمات، توعىزقۇمالاق، قول كۇرەسى سپورتتىق ويىن تۇرلەرى بويىنشا جارىستار ۇيىمداستىرىلىپ، رەكتورات قۇراما كومانداسىمەن قاتار بارلىق ينستيتۋتتاردان 7 كوماندا قاتىستى.
مەرەكەلىك سپورتتىق شارانى ۋنيۆەرسيتەت رەكتورى تاكير بالىقبايەۆ اشىپ، بيىلعى وقۋ جىلى ۋنيۆەرسيتەت ابىرويىن اسقاقتاتىپ، تۋىن كوككە جەلبىرەتىپ جۇرگەن رەسپۋبليكالىق، قالالىق جارىستار مەن IX جازعى ۋنيۆەرسيادانىڭتۇرلى ويىندارى بويىنشا جەڭىمپاز اتانعان 56 سپورتشىنى ارناي ديپلوم جانە اقشالاي سىياقىمەن ماراپاتتادى.
ەكى كۇنگە سوزىلعان سپورتتىق فەستيۆالدىڭ قورىتىندىسى بويىنشا جالپى كوماندالىق ەسەپتە قىزمەتكەرلەر مەن پروفەسسور-وقىتۋشىلار قۇرامى اراسىندا ۇيىمداستىرىلعان سپورتتىق ويىندار ناتيجەسى بويىنشا ءىىى ورىنعا 19 ۇپايمەن جاراتىلىستانۋ جانە گەوگرافيا ينستيتۋتى، ءىى ورىنعا 22 ۇپايمەن ونەر، مادەنيەت جانە سپورت ينستيتۋتى ورنالاسسا، 25 ۇپاي جيناعان پەداگوگيكا جانە پسيحولوگيا ينستيتۋتىنىڭ كومانداسى ءى ورىن جۇلدەگەرى اتاندى.
ستۋدەنتتەر اراسىندا ۇيىمداستىرىلعان سپورتتىق ويىندار ناتيجەسى بويىنشا جالپى كوماندالىق ەسەپتە 19 ۇپايمەن ءىىى ورىندى ماتەماتيكا، فيزيكا جانە ينفورماتيكا ينستيتۋتى، 23 ۇپايمەن ءىى ورىندى سوربوننا-قازاقستان ينستيتۋتىنىڭ كومانداسى يەلەنسە، 24 ۇپاي جيناعان جاراتىلىستانۋ جانە گەوگرافيا ينستيتۋتىنىڭ كومانداسى ءى ورىندى جەڭىپ الدى.بارلىق جەڭىمپاز اتانعان كوماندالار ۋنيۆەرسيتەت رەكتورىنىڭ گراموتاسى جانە كۋبوگىمەن ماراپاتتالدى.
تۇڭعىش پرەزيدەنت كۇنىنە ورايلاستىرىلعان بۇل شارا جاستاردىڭ سپورتقا دەگەن قىزىعۋشىلىعىن ارتتىرىپ، ۇجىمدىق بىرلىكتى نىعايتا ءتۇستى.
اباي اتىنداعى ءقازۇپۋ-دىڭ تاربيە، الەۋمەتتىك جۇمىستار جانە جاستار ساياساتى جونىندەگى دەپارتامەنت
