اۋعانستاننىڭ سولتۇستىك باتىسىنداعى گەرات قالاسىندا تالىپتەر الاڭعا ءتورت ادامنىڭ دەنەسىن ءىلىپ قويدى. بۇل تۋرالى جەرگىلىكتى ب ا ق جانە كۋاگەرلەر حابارلادى.

جەرگىلىكتى ەكى ءتىلشىنىڭ سوزىنە سۇيەنگەن بريتاندىق BBC اگەنتتىگى ادام ۇرلاۋعا قاتىسى بار دەپ ايىپتالعان ءتورت ادامنىڭ دەنەسى قالانىڭ ءتۇرلى بولىگىنە ءىلىنىپ قويعانىن جازدى. قالاداعى نەگىزگى الاڭ ماڭىندا ورنالاسقان ءدارىحانانىڭ يەسى احماد سەدديكي Associated Press اگەنتتىگىنە اۋەلى ءتورت ءمايىتتىڭ الاڭعا اكەلىنگەنىن، كەيىن ۇشەۋى قالاداعى وزگە الاڭدارعا اكەتىلگەنىن ايتتى.

پروۆينسيا گۋبەرناتورىنىڭ ورىنباسارى احماد وماردىڭ ايتۋىنشا، بۇل ادامدار "تاليبان" سودىرلارىمەن قاقتىعىس كەزىندە ادام ۇرلاعاننان كەيىن اتىپ ولتىرىلگەن.

"وزگەلەرگە ساباق بولسىن دەپ قالاداعى الاڭدارعا دەنەلەرى ءىلىندى" دەدى ومار DPA اگەنتتىگىنە.

الەۋمەتتىك جەلىدە جاريالانعان ۆيدەودا گەرات الاڭىندا شىنجىرعا ورالعان قانسىراعان ەر ادامنىڭ دەنەسى كوتەرگىش كراندا اسىلىپ تۇرعانى بايقالادى. كەيبىر ادامدار ولاردى ۇيالى تەلەفوندارىنا ءتۇسىرىپ جاتتى.

تالىپتەر تاعايىنداعان پوليسيا باسشىسى زياۋلحاق ءجالاليدىڭ سوزىنە قاراعاندا، تالىپتەر اتىس كەزىندە ادام ۇرلاۋعا تىرىسقان ءتورت ادامنان اكەلى-بالالى ەكى ادامدى اراشالاپ قالعان.

"تاليبان" قوزعالىسىنىڭ نەگىزىن قالاۋشىلاردىڭ ءبىرى نۇريددين تۋرابي مولدا وسى اپتادا Associated Press اگەنتتىگىنە تالىپتەر دارعا اسۋ مەن قولدى شابۋ سياقتى جازالاۋ تۇرلەرىن قايتادان قولعا الاتىنىن، ءبىراق ونى جاريا تۇردە جاسامايتىنىن ايتقان.

اۋعانستاندى 1996 جانە 2001 جىلدارى باسقارىپ تۇرعان شاقتا "تاليبان" دۇرە سوعۋ، تاس اتىپ ءولتىرۋ، قول-اياقتى شابۋ سياقتى قاتاڭ جازا تۇرلەرىن قولدانعان.