Jergilikti eki tilshiniń sózine súıengen brıtandyq BBC agenttigi adam urlaýǵa qatysy bar dep aıyptalǵan tórt adamnyń denesi qalanyń túrli bóligine ilinip qoıǵanyn jazdy. Qaladaǵy negizgi alań mańynda ornalasqan dárihananyń ıesi Ahmad Seddıkı Associated Press agenttigine áýeli tórt máıittiń alańǵa ákelingenin, keıin úsheýi qaladaǵy ózge alańdarǵa áketilgenin aıtty.
Provınsıa gýbernatorynyń orynbasary Ahmad Omardyń aıtýynsha, bul adamdar "Talıban" sodyrlarymen qaqtyǵys kezinde adam urlaǵannan keıin atyp óltirilgen.
"Ózgelerge sabaq bolsyn dep qaladaǵy alańdarǵa deneleri ilindi" dedi Omar DPA agenttigine.
Áleýmettik jelide jarıalanǵan vıdeoda Gerat alańynda shynjyrǵa oralǵan qansyraǵan er adamnyń denesi kótergish kranda asylyp turǵany baıqalady. Keıbir adamdar olardy uıaly telefondaryna túsirip jatty.
Tálipter taǵaıyndaǵan polısıa basshysy Zıaýlhaq Jalalıdiń sózine qaraǵanda, tálipter atys kezinde adam urlaýǵa tyrysqan tórt adamnan ákeli-balaly eki adamdy arashalap qalǵan.
"Talıban" qozǵalysynyń negizin qalaýshylardyń biri Nurıddın Týrabı molda osy aptada Associated Press agenttigine tálipter darǵa asý men qoldy shabý sıaqty jazalaý túrlerin qaıtadan qolǵa alatynyn, biraq ony jarıa túrde jasamaıtynyn aıtqan.
Aýǵanstandy 1996 jáne 2001 jyldary basqaryp turǵan shaqta "Talıban" dúre soǵý, tas atyp óltirý, qol-aıaqty shabý sıaqty qatań jaza túrlerin qoldanǵan.
