"جولاۋشىلار تاسىمالى" پويىزدا زورلانعان ازاماتشاعا 3 ملن تەڭگە تولەيتىن بولدى. تالاپ-ارىزدى استانانىڭ ازاماتتىق ىستەر جونىندەگى اۋدانارالىق سوتى قارادى، دەپ جازادى Dalanews.kz.
"جولاۋشىلار تاسىمالى" اكسيونەرلىك قوعامىنان جابىرلەنۋشىنىڭ پايداسىنا 3 ملن تەڭگە مولشەرىندە مورالدىق زيان وتەماقىسى،سونداي-اق سوتقا كەتكەن شىعىستارىنا 350 مىڭ تەڭگە مولشەرىندە قاراجات ءوندىرىپ الىنسىن. تالاپ قويۋ بويىنشا باسقا بولىگىن قاناعاتتاندىرۋدان باس تارتىلادى"، دەلىنگەن سوت شەشىمىندە.
جابىرلەنۋشى بۇل رەتتە اپەللياسيالىق شاعىم تۇسىرە الادى.
ايتا كەتسەك، قىلمىستىڭ ءوزى 2018 جىلدىڭ قىركۇيەگىندە بولعان. ول كەزدە عىلىمي كونفەرەنسيادان كەلە جاتقان اقتوبە وبلىسىنىڭ 35 جاستاعى تۇرعىنىن ەكى جولسەرىك كۋپەدە زورلاعان. ەكەۋى دە 2،5 جىلعا باس بوستاندىعىنان ايىرىلعان ەدى. ول كەزدە سۋديا ورازباي ساتىبالدى زورلىق-زومبىلىق اياق-استىنان جاسالعان، الدىن الا ءسوز بايلاسۋ بولمادى دەپ ەسەپتەدى. جابىرلەنۋشى جازانى قاتاڭداتۋدى تالاپ ەتتى. اپەللياسيالىق القا ءبىرىنشى ساتىداعى سوتتىڭ ۇكىمىن جويىپ، جولسەرىكتەرگە بەس جىلعا باس بوستاندىعىنان ايىرۋ جازاسىن تاعايىندادى. 2024 جىلدىڭ ماۋسىمىندا ولاردىڭ بوستاندىققا شىققانى بەلگىلى بولدى.
