مەملەكەتتىك جانە جەكەمەنشىك ارىپتەستىك اياسىندا پايدالانۋعا بەرىلگەن بالاباقشالاردىڭ قاتارى «پرەميۋم-تالعار» بالاباقشاسىمەن تولىقتى. قازاقستان رەسپۋبليكاسىنىڭ تاۋەلسىزدىگىنە 25 جىل تولۋىنا وراي لەنتاسى قيىلعان بوبەكجاي 500 بالاعا ارنالىپ سالىنعان. ءۇش بلوكتان قۇرىلعان ەكى قاباتتى عيمارات جەكە كاسىپكەر عاني چايمەردەنوۆتىڭ ىقپالىمەن ءبىر جىل ىشىندە بوي كوتەرگەن. مەملەكەت 80 گا جەر ءبولىپ، مەردىگەر مەكەمە 900 ملن 155 مىڭ تەڭگەگە سانىنە ساپاسى ساي بالاباقشا سالىپ، ەل يگىلىگىنە بەرىپ وتىر.
سيپاتى مەن مازمۇنى بولەك بالاباقشانىڭ اشىلۋىناتالعار اۋدانى اكىمىنىڭ ءبىرىنشى ورىنباسى ءا.تويبايەۆ قاتىسىپ، ىزگى تىلەگىن جولدادى:
– بىرىنشىدەن، ول مەملەكەتتىك جانە جەكەمەنشىك ارىپتەستىك باعىتى بويىنشا جۇمىس ىستەپ، سونىڭ ناتيجەسىندە جەكە ينۆەستيسيالىق جوباعا مول قارجى قۇيىلادى. ەكىنشىدەن، بۇل ىسكە مەملەكەتتىك باعدارلاماعا سايكەس جەرگىلىكتى اتقارۋ ورگانى دا اتسالىسىپ وتىر. ءۇش قاباتتى عيمارات جاس وسكىندەردى ساپالى تاربيەلەپ، وي ورىستەرىنىڭ وسۋىنە، ياعني ءبىلىمدى بولىپ ەر-جەتۋىنە ىقپال ەتەدى دەپ سەنەمىز.
سونداي-اق، شارا بارىسىندا وسى يگىلىكتى جۇمىستى ىسكە اسىرعان جەكە كاسىپكەر ع.چايمەردەن ۇلى دا ءسوز الىپ، بۇل بالاباقشانىڭ وبلىس بويىنشا التىنشىسى ەكەنىن ايتا كەلىپ، قۇتتىقتاۋ تىلەگىن جولداپ، مەكەمە كىلتىن بالاباقشا مەڭگەرۋشىسى ج.بەيسەنقىزىنا سالتاناتتى تۇردە تابىس ەتتى.
ەكى مەن التى جاس ارالىعىنداعى بالالاردى تاربيەلەيتىن مەكتەپكە دەيىنگى مەكەمەدە قازاق جانە ورىس تىلىندە 24 توپ بار. جىلى ەدەن توسەلىپ، بالاباقشاعا قاجەتتى قۇرال-جابدىقتارمەن تولىقتاي قامتاماسىز ەتىلگەن. ءار بولمە سول توپ بالالارىنىڭ جاس ەرەكشەلىكتەرىنە قاراي دايارلانعان. ءار توپقا ارنالعان ويىن الاڭدارى دا ۇمىت قالماعان. بۇگىننىڭ وزىندە 300 بالا قابىلدانىپ، 60 جۇمىس ورنىمەن قامتاماسىز ەتىلىپ وتىر. بۇلدىرشىندەرگە تەك تاربيە بەرىپ قانا قويماي، ولاردىڭ سپورتپەن، مۋزىكامەن اينالىسۋىنا باسا نازار اۋدارىلعان. سوندىقتان دا بولار، سالاماتتى ءومىر سالتىن ناسيحاتتاۋعا باعىتتالعان بولمەلەر جاڭا سيپاتتا جابدىقتالىپ، بالا قۋانىشىن ەسەلەي تۇسۋگە نەگىزدەلگەن. مەدبيكە بولمەسى، پسيحولوگ، لوگوپەد جانە ۇستازدار بولمەسى دە بار. باعاسى دا ءتيىمدى. مۇنداي مۇمكىندىكتىڭ تۋعانىنا اتا-انالار دا ءوز ريزاشىلىقتارىن بىلدىرۋدە.
ايتا كەتەلىك، وسى كۇنى تالعار وڭىرىندە تاعى 9 بالاباقشا ەسىكتەرىن ايقارا اشىپ، ءوز جۇمىستارىن رەسمي تۇردە باستادى. جەكەمەنشىك باعىتتا بولسا دا بارلىعى مەملەكەتتىك «بالاپان» باعدارلاماسى اياسىندا بوي كوتەرىپ، سول جوبا نەگىزىندە جۇمىس ىستەيدى. بالانى قۋانتقان ءساتتىڭ ءقادىرى دە ۇلكەن بولماعى وسىنداي ءىس جۇزىندە دالەلدەنىپ جاتقانىنا اۋدان جۇرتشىلىعىنىڭ العىسى شەكسىز.
