تالدىقورعان قالاسىنداعى «جاستار» سپورت سارايىندا الماتى وبلىسى اكىمىنىڭ «كوشباسشى – 2017» سىيلىعىن تابىستاۋ سالتاناتى ءوتتى. جىل سايىنعى ءداستۇرلى سىيلىق 17 نوميناسيا بويىنشا تاعايىندالىپ، جەڭىمپازداردى وبلىس اكىمى اماندىق باتالوۆ ماراپاتتادى، - دەپ حابارلايدى الماتى وبلىسى اكىمىنىڭ باسپا ءسوز قىزمەتى.

جينالعانداردى قۇتتىقتاعان وبلىس اكىمى ا. باتالوۆ:

- ەلىمىزدە جاستار ساياساتىنا ماڭىزدى باعىت رەتىندە ەرەكشە كوڭىل بولىنگەن.«جەتكىنشەك بۋىننىڭ تاۋەلسىزدىك يدەالدارىنا ادال بولاتىنىنا، وتانىمىزدىڭ تابىستارىنىڭ ەستافەتاسىن جالعاستىراتىنىنا سەنىمىم مول»، -دەپ، ەلباسى جاستارعا ۇلكەن سەنىم ارتتى. بۇگىندە ەلىمىزدە جاستاردىڭ تەگىن ءبىلىم الىپ، جان-جاقتى دامۋىنا، شىعارماشىلىقپەن، سپورتپەن، كاسىپكەرلىكپەن اينالىسىپ، حالىقتىڭ يگىلىگىنە ەڭبەك ەتۋىنە بارلىق جاعدايلار جاسالعان. ءوز كەزەگىندە جەتىسۋ جاستارى جۇدىرىقتاي جۇمىلىپ، ەلباسىنىڭ سارابدال ساياساتىن تياناقتى جۇزەگە اسىرۋعا اتسالىسۋى كەرەك. اسىرەسە، مەملەكەت باسشىسى جاريالاعان «رۋحاني جاڭعىرۋ» باعدارلاماسىنىڭ ورىندالۋىندا جاس بۋىننىڭ بەلسەندىلىگى اساقاجەت. ويتكەنى بۇل تاريحي قۇجات وسكەلەڭ ۇرپاق ءۇشىن قابىلدانىپ وتىر. جاستاردىڭ الدىندا الار اسۋ، شىعار شىڭ، جەتەر جەڭىستەر وتە كوپ. وعان تەك تالاپ پەن جىگەر، ءبىلىم مەن اقىل الىپ بارادى. ءبىز بۇگىن سول تالپىنىس جولىندا جەمىستى ەڭبەك ەتىپ جۇرگەن ءبىرقاتار جاستى «كوشباسشى» سىيلىعىمەن ماراپاتتاعالى وتىرمىز. بۇل ازاماتتاردىڭ ەڭبەك جولى، جەتىستىكتەر تاريحى وزگە قاتارلاستارىنا ۇلگى بولارى انىق. بارلىعىڭنىڭ دا تۋعان ەلىمىزدىڭ يگىلىگى ءۇشىن ايانباي ەڭبەك ەتىپ، قازاقستاننىڭ ماقتانىشى بولۋلارىڭا تىلەكتەسپىن! – دەي كەلە، جەڭىمپازداردى ارنايى ديپلومدارمەن جانە اقشالاي سىيلىق سەرتيفيكاتتارىمەن  ماراپاتتادى.



اتاپ ايتقاندا، ەڭبەكشىقازاق اۋدانى د. قونايەۆ اتىنداعى ورتا مەكتەپ تۇلەگى تەمۋربەك جامولاددينوۆ «جاس باتىر» اتانسا، «ۇزدىك جاس سپورتشى» اتالىمىندا گرەك-ريم كۇرەسىنەن قازاقستان رەسپۋبليكاسىنىڭ ەڭبەك سىڭىرگەن سپورت شەبەرى دەمەۋ جادىرايەۆ جەڭىمپاز دەپ تانىلدى. تالدىقورعاندىق مانسۋر قۇرمانعالييەۆ - «ۇزدىك جاس كاسىپكەر»، تالعار اۋدانى قاينار اۋىلىنداعى «ماديار» شارۋا قوجالىعىنىڭ جەتەكشىسى ماديار اۋەلبايەۆ - «اۋىل شارۋاشىلىعىنىڭ ۇزدىك جاس مامانى»، س.دەميرەل اتىنداعى ۋنيۆەرسيتەتتىڭ اعا وقىتۋشىسى ەرمەك توقتاروۆ - «ۇزدىك جاس عالىم»، الاكول اۋدانى ءۇشارال قازاق مەكتەپ گيمنازياسى ديرەكتورىنىڭ تاربيە ءىسى جونىندەگى ورىنباسارى ەرجان ومارحانوۆ - «ۇزدىك جاس ۇستاز»، الاكول اۋدانى ەڭبەكشى دارىگەرلىك امبۋلاتورياسىنىڭ مەڭگەرۋشىسى ايگۇل تۇرساعاتوۆا «ۇزدىك جاس دارىگەر» اتاندى.

2017 جىلدىڭ جاڭا كوشباسشىلارى، ياعني ءار سالادا ەڭبەك ەتىپ جۇرگەن 17 جاس مامان الداعى ۋاقىتتا دا ءبىلىمى مەن بىلىگىن جەتىلدىرىپ، ەلباسىنىڭ سەنىمىن اقتاپ، حالىققا ادال قىزمەت ەتەتىندىكتەرىنە سەندىردى. شارا سوڭى كونسەرتتىك باعدارلاماعا ۇلاستى.

ەسكە سالساق، «كوشباسشى» جاستار سىيلىعى جىل سايىن 17 نوميناسيا بويىنشا ءداستۇرلى تۇردە بەرىلىپ كەلەدى. سونىڭ ىشىندە جوعارىدا ايتىلعاندارمەن قاتار «ۇزدىك جاس مەملەكەتتىك قىزمەتشى»، «ۇزدىك جاس ساياساتكەر»، «ۇزدىك ستۋدەنت»، «ۇزدىك جاس ونەرپاز»، «ۇزدىك جاس اسكەري قىزمەتشى»، «ۇزدىك جاس وتباسى»، «ۇزدىك ەرىكتى»، «ۇزدىك جاس جۋرناليست»، «ۇزدىك «جاسىل ەل» ساربازى»، «جاس ۇلان» ءبىرىڭعاي بالالار مەن جاسوسپىرىمدەر ۇيىمىنىڭ ۇزدىك كوشباسشىسى» اتالىمدارى دا بار.