قازاق ەلى قاشاندا تالانتتى جاندارعا كەندە ەمەس. بويىنداعى بار كۇش جىگەرىن، ءبىلىمىن حالىقتىڭ يگىلىگىنە جۇمساپ، حايپ ەمەس، قايىرلى ارەكەتتەردىڭ تىزگىنىن ۇستاپ «ءبىر پايدام بولسا دا» تۋعان جەرىمە ءتيسىنشى دەپ جۇرگەن جاستارمەن سۇحباتتاسۋدىڭ ءساتى ءتۇستى.
مەملەكەت باسشىسى قاسىم-جومارت كەمەل ۇلى توقايەۆتىڭ قاتىسۋىمەن "100 جاڭا ەسىم" جوباسىنىڭ ماراپاتتاۋ سالتاناتى وتكەنى بەلگىلى. تالانتتى، جالىندى جاستار توپ جارىپ، حالىققا تانىلدى.
الدىنا ماقسات قويىپ، ىسكە اسىرا بىلگەن جاننىڭ ءبىرى ءبىرىنشى توپتاعى مۇگەدەكتىگىنە قاراماستان، تالدىقورعان قالاسىندا بالالاردى روبوتوتەحنيكا الەمىنە باۋلىپ جۇرگەن دامير نۇركەجانوۆ. وسىدان ءبىر جىل بۇرىن دامير تۋعان قالاسىندا روبوتوتەحنيكا بويىنشا وقۋ كۋرستارىن اشتى.
قىسقا ۋاقىت ىشىندە ونىڭ شاكىرتتەرى ىت-تەحنولوگيالار بويىنشا رەسپۋبليكالىق جانە وبلىستىق كونكۋرستاردا كوپتەگەن ماراپاتتارعا يە بولدى.
2018 جىلدىڭ جەلتوقسان ايىندا «Future-IT» روبوتوتەحنيكا مەكتەبىنىڭ نەگىزىن قالادى.
«مەملەكەت ماعان كەدەرگىسىز ورتا قالىپتاستىرىپ، ساپالى ءبىلىم الۋىما جاعداي جاسادى. بالا كۇنىمنەن IT سالاسىنا قىزىعۋشىلىعىم بولدى دەسەم ارتىق ايتپاعانىم بولار. سول ارمان مەنى جەتەلەپ ۋنيۆەرسيتەت قابىرعاسىندا «اقپاراتتىق جۇيەلەر» ماماندىعى بويىنشا ءبىلىم الىپ، تىڭ دۇنيەلەرگە قانىق بولدىم. بىلگەنىمدى باسقالارعا ۇيرەتە باستادىم» دەيدى جاس ونەرتاپقىش.
عىلىم قارىشتاپ دامىپ جاتقان زاماندا زاماناۋي ۇدەرىستەن قالماۋ — بۇگىنگى كۇننىڭ باستى تالابى.
قازىرگى تاڭدا روبوتوتەحنيكا – عىلىم مەن تەحنيكانىڭ ەڭ ۇزدىك باعىتتارىنىڭ ءبىرى. الەمدە جەتەكشى سالا قاتارىنداعى اتالمىش جاڭا تەحنولوگيا ەلىمىزدە قارقىن الۋدا.
الماتى وبلىسىندا وسكەلەڭ ۇرپاقتى جاڭا ينوۆاسيالىق تەحنولوگيالارعا باۋلىپ جۇرگەن دامير وسى ولكەدەن جاڭا دۇنيەلەردى مەڭگەرگەن جانداردىڭ كوپ بولۋىن قالايدى.
«ستۋدەنتتىك كەزەڭدە تەك ءبىلىم الىپ قانا قويماي، ۋنيۆەرسيتەتتىڭ ستارتاپ اكادەمياسىنان ءبىلىم الدىم. ودان كەيىن ستارتاپ كونكۋرستارعا قاتىسا باستادىم. بيزنەس-جوسپار قۇرىپ، شىعارماشىلىق جۇمىستارمەن بەلسەنە اينالىستىم.
2018 جىلى الماتى وبلىسىنىڭ ىشكى ساياسات باسقارماسى مەن «تامشىبۇلاق» قوعامدىق بىرلەستىگى بىرلەسە ۇيىمداستىرعان «Inclusive IT – 2018» الەۋمەتتىك جوبالار كونكۋرسىنىڭ جەڭىمپازى اتانىپ، 1 000 000 تەڭگە كولەمىندە گرانتتىڭ يەسى اتاندىم.
جوعارى وقۋ ورنىندا ءبىلىم الا ءجۇرىپ، وزگەلەرگە ينديۆيدۋالدى تۇردە ۇيرەتە باستادىم. ۋاقىت وتە كەلە جەكە وقىتۋدان، ورتالىق اشۋدى جوسپارلادىم. روبوتوتەحنيكا مەكتەبىنىڭ نەگىزىن قالاسام دەگەن وي بولدى.
2018 جىلى الدىعا قويعان ماقساتىما قول جەتكىزدىم. بۇگىنگى تاڭدا «Future-IT» روبوتوتەحنيكا مەكتەبىندە جاس ورەندەر ءبىلىم الىپ، وزدەرىنە تاڭسىق دۇنيەنىڭ قىر سىرىن ۇيرەنۋدە» دەيدى دامير نۇركەجانوۆ.
بالالار مەن ستۋدەنتتەردى وقىتاتىن ورتالىقتى اشۋ ءۇشىن ارنايى جوبا دايىنداپتى. سونىڭ ناتيجەسىندە قارجىلاي گرانت ۇسىناتىن الەۋمەتتىك كونكۋرستارعا قاتىسىپ جەڭىمپاز اتانعان. بەرىلگەن قاراجاتقا قاجەت قۇرىلعىلارىن ساتىپ الدى.
«ءبىزدىڭ ماقساتىمىز، ميسسيامىز – وسى بولاشاقتا سۇرانىسقا يە بولاتىن ەلىمىزگە قىزمەت ەتەتىن مىقتى IT ماماندارىن دايىنداۋ بولىپ تابىلادى. جانە دە بالالاردى كومپيۋتەرلىك ماشىقتارعا ەرتە جاستان ۇيرەتۋ، اقپاراتتىق تەحنولوگيانى مەڭگەرۋ ولارعا الداعى ۋاقىتتا قاي سالادا بولماسىن ءوز ءىسىنىڭ كاسىبي مامانى بولۋعا كومەكتەسەدى.
ءقازىر نارىقتا سوڭعى ۇلگىدەگى زاماناۋي قۇرال-جابدىقتار جەتەرلىك. الايدا، ونىمەن جۇمىس جاساي الاتىن «ءتىلىن تۇسىنەتىن» ماماندار تاپشى. سوندىقتان، ءبىز وسى ولقىلىققا جول بەرمەي، وسكەلەڭ ۇرپاقتى اقپاراتتانۋ سالاسىنا بەيىمدەۋدى كوزدەيمىز» دەپ اعىنان جارىلدى جاس ونەرتاپقىش.
ءتورت ادامدى جۇمىسپەن قامتىپ وتىرعان بەلسەندى جاس ءقازىر تاعى ءبىر ورتالىق اشۋدىڭ قامىنا كىرىسكەن. وندا بالالاردى وقىتىپ ءارى زاعيپ جاندارعا ارنالعان سمارت بىلەزىك قۇراستىرۋدى جوسپارلاپ وتىر. ياعني، تاياقپەن جۇرەتىن ادامعا كەدەرگىلەردى سيگنال ارقىلى جەتكىزەتىن براسلەت قۇراستىرماق. «مۇنداي قۇرىلعى قازىرگى تاڭدا رەسەيدە شىعارىلادى ەكەن. ءبىراق باعاسى 700 مىڭ تەڭگە كولەمىندە. قوماقتى قارجىنى قاجەت ەتەتىندىكتەن مۇمكىندىگى شەكتەۋلى ادامداردىڭ قالتاسى كوتەرە بەرمەيدى. سوندىقتان وزىمىزدە شىعارساق، باعاسى دا قولجەتىمدى بولماق» دەيدى دامير.
قامقور جان كوروناۆيرۋس پاندەمياسى كەزىندە ساقتىق شارالاردى ساقتاي وتىرا 300-گە جۋىق بالانى ءوز مەكتەبىندە تەگىن ءبىلىم الۋىنا جاعداي جاسادى. شاكىرتتەرى بۇگىنگى كۇنگە دەيىن 11 بايقاۋعا قاتىسىپ، جۇلدەلى ورىنداردان كورىنگەن.
باستاپقىدا قيىندىقتاردىڭ كوپ بولعانىن جاسىرمادى. جاڭا سالا بولعاندىقتان ماماندار تاپشىلىعىدا ءوز اسەرىن تيگىزبەي قويمادى.
«ەندى بارلىعى ارتتا قالدى، جىل وتكەن سايىن تاجىريبە جيناقتاپ، ءوسىپ، شىڭدالىپ كەلەمىز. تەك كەدەرگىلەرگە قارسى تۇرا ءبىلىپ، باستاعان ءىستى سوڭىنا دەيىن جەتكىزسەڭ ناتيجەسىن كورۋگە بولادى. قولدى ءبىر سىلتەيتىن ادامنان ەشتەڭە شىقپاسى انىق. الدىعا قويعان ماقساتقا جەتە ءبىلۋىڭ كەرەك. ارەكەت ەت، بەرەكەسىن كورەسىڭ » دەپ اعىنان جارىلدى.
راسىندا وزىنە تاڭسىق ءىستى باستاپ، كەيىن جۇمىسى وڭبەي، ورتا جولدان تاستاپ كەتىپ جاتاتىن كەيبىر جاستارعا داميردىڭ بويىنداعى تاباندىلىق كوپكە ۇلگى بولار.
جاس بولسا دا، بىرنەشە اۋقىمدى جوبالاردى يگەرىپ، وسكەلەڭ ۇرپاقتىڭ جاڭا تەحنولوگيانى مەڭگەرۋىنە سەبەپكەر بولىپ وتىرعان ونەرتاپقىشتىڭ اتقارىپ جاتقان جۇمىستارى دا ەلەنىپ، جوعارى باعاعا يە بولىپ جاتىر.
ماسەلەن 2019 جىلدىڭ قاراشا ايىندا تۇڭعىش پرەزيدەنتىمىز نۇرسۇلتان نازاربايەۆتىڭ ەڭ ۇزدىك جاستارعا بەرىلەتىن «ەل ءۇمىتى» سىيلىعىن يەلەندى. قاتارىنان جەكە دارا وزىق بولسادا، باسقالاردىڭ دا بيىك بەلەستەردى باعىندىرعانىن قالايتىنىن اڭگىمە اراسىندا بايقادىق.
«2020 جىلى وقۋشىلارىمىز حالىقارالىق «Balatech» وليمپياداسىنىڭ فينالىنا ءوتىپ، 5ء-شى ورىنعا تۇراقتادى.
«KazRoboSport-2019»، «VEXCode VR Challenge»، «AlmatyRoboman2019» رەسپۋبليكالىق روبوتوتەحنيكا چەمپيوناتىندا، «Jetysu Start-UP» يننوۆاسيالىق يدەيالار بايقاۋىندا، رەسپۋبليكالىق «زيات»، «دارىن»، «KazRoboProject-2020» بايقاۋلارىندا جۇلدەگەر اتانىپ، ۇزدىكتەر قاتارىنان كورىندى.
«ولار مەكتەپتەرگە ارنالعان اۆتوماتتاندىرىلعان قوڭىراۋ، اۆتوماتتاندىرىلعان قوقىس جاشىگى، كوزى ناشار كورەتىن جاندار ءۇشىن كەدەرگىلەردى انىقتايتىن سمارت-بىلەزىك سىندى جوبالارمەن اينالىسىپ، جۇمىستارى كوپشىلىكتى تاڭ قالدىرۋدا.
مىنە توككەن ماڭداي تەردىڭ جەمىسىن كورگەن كەزدە، ءارى قاراي ەڭبەك ەتكىڭ كەلە بەرەدى. جەتىستىگىمىزدىڭ بارلىعى تاۋەلسىزدىگىمىزدىڭ ارقاسىندا ەكەنىن ۇنەمى وقۋشىلارعا ايتىپ وتىرامىن» دەيدى ۇلكەن جۇرەكتى ازامات دامير نۇركەجانوۆ. بولاشاقتا جاس ونەرتاپقىش ۇلكەن جوبالاردى قولعا الىپ، الەمگە تانىمال برەند جاساپ، فرانشيزالارىن ساتقىسى كەلەتىنىن جەتكىزدى.
ءيا قازاقستاننىڭ بولاشاعىنا بەي-جاي قارامايتىن، عىلىم مەن تەحنيكانى قاتار يگەرىپ، ءبىلىمدى جاستاردىڭ ءوسىپ كەلە جاتقانى كوڭىل قۋانتادى.
قۋانىش سماعۇلوۆ
