23 تامىزدا تاجىكستان پارلامەنتىنىڭ تومەنگى پالاتاسى "ءداستۇر مەن سالتتى رەتتەۋ تۋرالى زاڭعا" وزگەرىس ەنگىزىپ، ەل ازاماتتارىنا ۇلتتىق كيىم كيۋدى مىندەتتەدى.
زاڭنىڭ 14-بابىنىڭ 4-بولىمىنە جاسالعان وزگەرىسكە سايكەس "جەكە جانە زاڭدى تۇلعالار ۇلتتىق كيىم اتريبۋتتارىن ساقتاپ، مەملەكەتتىك ءتىلدى بىلۋگە جانە ۇلتتىق كيىم كيىپ جۇرۋگە مىندەتتى بولادى".
پارلامەنتتىڭ وتباسى مەن الەۋمەتتىك قورعاۋ كوميتەتىنىڭ ءتورايىمى حيلولبي كۋربونزودا 23 تامىزدا بۇل زاڭدى ورىنداماعانداردىڭ جازاعا تارتىلاتىنىن ايتتى. ونىڭ سوزىنشە، تاجىكستان ۇكىمەتى جۋىر ۋاقىتتا ۇلتتىق كيىم كيىپ ءجۇرۋ تارتىبىنە قاتىستى ارنايى قاۋلى ازىرلەمەكشى.
جەرگىلىكتى ساراپشىلار وسىنداي جولمەن بيلىك ورگاندارى حيدجاب كيەتىن مۇسىلمان ايەلدەرگە ۇلتتىق كيىمدى تاڭباقشى دەپ سانايدى. تاجىكستان ۇكىمەتى بۇعان دەيىن بىرنەشە مارتە حيدجابقا قارسى ناۋقان جاريالاعان. بيلىك وكىلدەرى زاڭعا ەنگىزىلگەن جاڭا وزگەرتۋ حيدجابقا قارسى ەمەس ەكەنىن، "تاجىكتەردىڭ ۇلتتىق مادەنيەتى مەن دىنىنە قايشى ادەپسىز" كيىنۋ ۇلگىلەرىنە قارسى جاسالعان شارا ەكەنىن ايتادى.
