ششۋچينسكىدە جەدەل جاردەم جۇرگىزۋشىسىنە شابۋىل جاساعان ەر ادام قولعا ءتۇستى، دەپ حابارلايدى Dalanews.kz.
الەۋمەتتىك جەلىدە اتالمىش وقيعانىڭ ۆيدەوسى پايدا بولدى. مۇندا ەر ادام جانارماي قۇيۋ بەكەتتەرىنىڭ بىرىندە جەدەل جاردەم جۇرگىزۋشىسىن سوققىعا جىعادى.
كۋاگەرلەردىڭ ايتۋىنشا، كيكىلجىڭ جول ماسەلەسىنەن تۋىنداعان.
"جۇرگىزۋشى كولىگىن دۇرىس قويماي، جول بەرگىسى كەلمەدى. جەدەل جاردەم بريگاداسى شاقىرۋعا اسىعىپ تۇرعان. وقيعا ورنى: ششۋچينسك، گەليوس جانارماي قۇيۋ بەكەتى، 10.02.2024 جىل"، - دەلىنگەن ۆيدەو سيپاتتاماسىندا.
كوپ ۇزاماي اقمولا وبلىسىنىڭ پوليسياسى شابۋىل جاساعان ازاماتتىڭ ۇستالعانىن مالىمدەدى.پوليسيا مالىمەتىنشە، بۇل جاعداي ءقازىر تەكسەرىلىپ جاتىر.
"اقمولا وبلىسىنىڭ پوليسيا دەپارتامەنتى ششۋچينسك قالاسىنداعى جانار-جاعارماي قۇيۋ بەكەتىندە جەدەل جاردەم جۇرگىزۋشىسىنە شابۋىلداعان ەر ادامدى انىقتادى. سوتالدى تەرگەۋ امالدارى باستالىپ، كۇدىكتى ۋاقىتشا ۇستاۋ يزولياتورىنا قامالدى"، - دەدى اقمولا وبلىسىنىڭ پوليسيا دەپارتامەنتى باسپا ءسوز قىزمەتى وكىلدەرى.
ەسكە سالايىق، 27 قاڭتاردا قاراعاندىدا ەر ادام جەدەل جاردەم جۇرگىزۋشىسىن ۇرعان ەدى. ناتيجەسىندە جابىرلەنۋشىنىڭ ميى شايقالىپ، مۇرنى سىنعان، كەۋدە مەن بەتتىڭ جۇمساق تىندەرىنە زاقىم كەلگەن بولاتىن.
