پرەزيدەنت قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا ازاماتتارعا الەۋمەتتىك قولداۋ كورسەتۋ جۇيەسىن قايتا قاراۋدى ۇسىندى، دەپ حابارلايدى Dalanews.kz.
ونىڭ پىكىرىنشە، مەملەكەتتەن كومەك شىنايى ءزارۋ ادامدارعا عانا بەرىلۋى ءتيىس.
"حالىققا الەۋمەتتىك كومەك بەرەمىز دەپ، شىنى كەرەك، قوعامدا ماسىلدىق پسيحولوگياعا جول بەردىك. وركەنيەتتى ەل بولامىز دەسەك، مۇنداي جاعىمسىز ۇدەرىسكە توسقاۋىل قويۋىمىز كەرەك. تۇراتىن ءۇيى، ءتىپتى، استىندا قىمبات كولىگى بار ازاماتتارعا ەمەس، كومەككە ءزارۋ ادامدارعا كومەك بەرىلۋى قاجەت"، - دەدى پرەزيدەنت.
پرەزيدەنت بۇگىندە ءتورت جارىم ميلليونعا جۋىق ادام مەملەكەتتەن الەۋمەتتىك كومەك الاتىنىن العا تارتتى. ايتۋىنشا ونىڭ باسىم كوپشىلىگى – ەڭبەككە جارامدى ازاماتتار. وسى تۇستا ول ازاماتتارعا الەۋمەتتىك قولداۋ كورسەتۋ جۇيەسىن قايتا قاراۋدى ۇسىندى. سەبەبى مەملەكەتتەن كومەك الۋ ءۇشىن تابىسىن ادەيى ازايتىپ كورسەتەتىن ادامداردىڭ بار ەكەنىن العا تارتتى.
