امەريكالىق بيزنەسمەن دجەيمس كەمەرون قازاقستانداعى Eurasian Resources Group (ERG) تاۋ-كەن كومپانياسىنىڭ 100 پايىز اكسياسىن 5 ميلليارد دوللارعا ساتىپ الۋعا ۇسىنىس جاسادى. بۇل تۋرالى Reuters اگەنتتىگى ءوز قولىنا تۇسكەن رەسمي قۇجاتتارعا سىلتەمە جاساپ مالىمدەدى، دەپ حابارلايدى Dalanews.kz.

ERG – مىس، كوبالت، اليۋمينيي جانە تەمىر رۋداسىن وندىرەتىن ءىرى كومپانيا، ونىڭ 40 پايىزى قازاقستان ۇكىمەتىنە تيەسىلى. وتكەن جىلى ERG ەلىمىزدەگى سيرەك جانە سيرەك جەر مەتالدار كەن ورىندارىن بارلاۋعا باعىتتالعان ارنايى توپ قۇرعان بولاتىن.

دجەيمس كەمەرون ديرەكتورلار كەڭەسىنە جولداعان حاتىندا بۇل كەلىسىمدى قارجىلاندىرۋ ءۇشىن ءوز قاراجاتى مەن اقش، اۋستراليا جانە تاياۋ شىعىستان كەلەتىن باسقا ينۆەستورلاردىڭ كاپيتالىن پايدالانۋعا دايىن ەكەنىن جەتكىزگەن. مامىلەنىڭ قارجىلىق كەڭەسشىسى رەتىندە ايگىلى Goldman Sachs كومپانياسى تارتىلۋى مۇمكىن.

امەريكالىق ينۆەستوردىڭ قىزىعۋشىلىعى قازاقستاننىڭ ستراتەگيالىق ماڭىزىنىڭ ارتۋىمەن بايلانىستى بولىپ وتىر. سەبەبى، ەلىمىز 2028 جىلعا دەيىن سيرەك كەزدەسەتىن جانە سيرەكجەر مەتالدارىن ءوندىرۋدى 40 پايىزعا ارتتىرۋدى جوسپارلاۋدا. بيىلعى ءساۋىر ايىنىڭ باسىندا قازاقستان اۋماعىندا بولجامدى قورى 20 ميلليون توننادان اساتىن ءىرى كەن ورنى انىقتالعان بولاتىن. ەگەر بۇل دەرەكتەر تولىق راستالسا، قازاقستان سيرەكجەر مەتالدارىنىڭ قورى بويىنشا الەمدىك ۇزدىك ۇشتىككە كىرۋى مۇمكىن.