قما باتىس قازاقستان وبلىسى بويىنشا دەپارتامەنتى نەسيەلىك سەرىكتەستىك باسشىسىنا قاتىستى 150،7 ملن تەڭگە كولەمىندەگى سۋبسيديانى جىمقىرۋ فاكتىسى بويىنشا تەرگەۋدى اياقتادى، دەپ حابارلايدى Dalanews.kz.
كۇدىكتى "اگروبيزنەس" نەسيەلەۋ باعدارلاماسى اياسىندا باقىلاۋىنداعى شارۋا قوجالىعىنىڭ اتىنا زاڭسىز تۇردە 126،7 ملن تەڭگە كولەمىندە جەڭىلدەتىلگەن نەسيە راسىمدەگەن. كەيىن بۇل قاراجات ءىرى قارا مال ساتىپ الىنباستان، شارۋا قوجالىعىنىڭ شوتىنان قولما-قول اقشاعا اينالدىرىلعان.
سونىمەن قاتار، مال شارۋاشىلىعىنىڭ اقپاراتتىق جۇيەسى بازاسىنا جالعان اقپارات ەنگىزۋ ارقىلى ول 2017–2021 جىلدارعا ارنالعان اگروونەركاسىپتىك كەشەندى دامىتۋ جونىندەگى ۇلتتىق جوبا شەڭبەرىندە بولىنگەن 24 ملن تەڭگە كولەمىندەگى سۋبسيديانى زاڭسىز العان. سۋبسيديانى زاڭدى تۇردە الىندى دەپ كورسەتۋ ماقساتىندا ول باسقا شارۋا قوجالىقتارىنان اسىل تۇقىمدى سيىر ساتىپ الدى دەگەن جالعان قۇجاتتاردى تاپسىرعان.
قىلمىستىق جولمەن الىنعان تابىسقا كۇدىكتى جەر تەلىمدەرىن ساتىپ الىپ، ولاردىڭ بىرىندە ساۋنا مەن ساۋدا ءۇيىن سالعان. اتالعان مۇلىكتى جاسىرۋ ماقساتىندا ونى تۋىسىنىڭ اتىنا راسىمدەگەن.
سوت سانكسياسىمەن جالپى قۇنى 198 ملن تەڭگە بولاتىن مۇلىككە، 2 جەر تەلىمىنە، ساۋدا ۇيىنە، ساۋناعا جانە Exeed LX ماركالى اۆتوكولىككە تىيىم سالىندى.
كۇدىكتىگە قاتىستى بۇلتارتپاۋ شاراسى رەتىندە قاماۋعا الۋ قولدانىلدى.
