QMA Batys Qazaqstan oblysy boiynsha departamenti nesielik seriktestik basshysyna qatysty 150,7 mln teńge kólemindegi sýbsidiiany jymqyrý faktisi boiynsha tergeýdi aiaqtady, dep habarlaidy Dalanews.kz.
Kúdikti "Agrobiznes" nesieleý baǵdarlamasy aiasynda baqylaýyndaǵy sharýa qojalyǵynyń atyna zańsyz túrde 126,7 mln teńge kóleminde jeńildetilgen nesie rásimdegen. Keiin bul qarajat iri qara mal satyp alynbastan, sharýa qojalyǵynyń shotynan qolma-qol aqshaǵa ainaldyrylǵan.
Sonymen qatar, mal sharýashylyǵynyń aqparattyq júiesi bazasyna jalǵan aqparat engizý arqyly ol 2017–2021 jyldarǵa arnalǵan agroónerkásiptik keshendi damytý jónindegi ulttyq joba sheńberinde bólingen 24 mln teńge kólemindegi sýbsidiiany zańsyz alǵan. Sýbsidiiany zańdy túrde alyndy dep kórsetý maqsatynda ol basqa sharýa qojalyqtarynan asyl tuqymdy siyr satyp aldy degen jalǵan qujattardy tapsyrǵan.
Qylmystyq jolmen alynǵan tabysqa kúdikti jer telimderin satyp alyp, olardyń birinde saýna men saýda úiin salǵan. Atalǵan múlikti jasyrý maqsatynda ony týysynyń atyna rásimdegen.
Sot sanktsiiasymen jalpy quny 198 mln teńge bolatyn múlikke, 2 jer telimine, saýda úiine, saýnaǵa jáne Exeed LX markaly avtokólikke tyiym salyndy.
Kúdiktige qatysty bultartpaý sharasy retinde qamaýǵa alý qoldanyldy.
