سيفرلىق دامۋ، يننوۆاسيالار جانە اەروعارىش ونەركاسىبى ءبىرىنشى ۆيسە-مينيسترى قانىش تولەۋشين تۇركىستان وبلىسىنا جۇمىس ساپارى اياسىندا حالىقپەن كەزدەسۋ وتكىزىپ، ازاماتتاردى قابىلدادى، دەپ حابارلايدى Dalanews.kz.
شاراعا مينيسترلىكتىڭ مەملەكەتتىك قىزمەتتەر كوميتەتى مەن تەلەكوممۋنيكاسيالار كوميتەتىنىڭ باسشىلىعى، ۇيالى بايلانىس وپەراتورلارى، «ازاماتتارعا ارنالعان ۇكىمەت» كەاق جانە وبلىس اكىمدىگىنىڭ وكىلدەرى قاتىستى.
ءبىرىنشى ۆيسە-مينيستر ءوز سوزىندە ەلىمىزدەگى جانە وبلىستاعى ءىت سالاسىنىڭ دامۋى، تۇركىستاندا «Smart city» ەنگىزۋ بارىسى تۋرالى ايتتى.
«وتكەن جىلى ءبىز اكىمدىكپەن بىرلەسە وتىرىپ، وڭىردە ءىت سالاسىن تانىمال ەتۋگە، ادامي كاپيتالدى دامىتۋعا، جاڭا داعدىلاردى وقىتۋعا جانە مامانداندىرىلعان ءىس-شارالاردى وتكىزۋگە ىقپال ەتەتىن تۇركىستان حابىن اشتىق. بۇگىندە ەل بويىنشا 14 ايماقتىق حاب اشىلدى. وڭىردە قازاقستاندىقتاردى IT ماماندىقتارى بويىنشا وقىتۋعا ارنالعان TechOrda باعدارلاماسىنا قاتىساتىن ءبىر IT مەكتەپ اككرەديتتەلگەن»، - دەدى قانىش تولەۋشين.
تۇركىستان قالاسىندا «Smart city» جوباسىن جۇزەگە اسىرۋ اياسىندا 188 اۆتوبۋسقا «Alem Pay» تولەم جۇيەسى ورناتىلدى. وتكەن جىلى بيلەتتىڭ 44 پايىزى قولما-قول اقشاسىز ساتىلعان. 35 مەكتەپتە كىرۋدى باسقارۋ جۇيەسى مەن SOS تۇيمەلەرى قامتاماسىز ەتىلدى. جالپى قالادا 456 بەينەباقىلاۋ كامەراسى بار جانە 20 مەكتەپتەگى كامەرالار پوليسيانىڭ باسقارۋ ورتالىعىنا قوسىلعان. 50 تۇرعىن ءۇي كەشەنى كوممۋنالدىق جىلۋ مەن سۋ ەسەپتەگىشتەرىمەن جابدىقتالعان، 120 سمارت شام ورناتىلعان. 109 بايلانىس ورتالىعى پايدالانۋعا بەرىلىپ، اشىلعاننان بەرى 37 508 قوڭىراۋ تۇسكەن.
بۇگىندە حالىققا كورسەتىلەتىن مەملەكەتتىك قىزمەتتەردىڭ 92 پايىزى ەلەكتروندى تۇردە بەرىلىپ جاتىر. 50-دەن استام قىزمەتتى تەك Egov ارقىلى عانا ەمەس، ءجيى قولدانىلاتىن بانكتىك قوسىمشالاردا دا الۋعا بولادى. وبلىستىڭ ينفراقۇرىلىمى 20 حالىققا قىزمەت كورسەتۋ ورتالىعىنان، 52 بەك-وفيستەردەن، 120 Connection Point-تەن جانە 2 ارنايى حالىققا قىزمەت كورسەتۋ ورتالىعىنان تۇرادى.
«سيفرلىق نوتاريات» ىسكە قوسىلعان 2023 جىلدان بەرى تۇركىستان وبلىسىندا ونلاين رەجيمدە 652 مىڭ سەنىمحات بەرىلگەن. كولىكتەردى تىركەۋ قىزمەتى 127 مىڭ رەت پايدالانىلدى.
تۇركىستان وبلىسىنىڭ تۇرعىندارىن تولعاندىراتىن ماسەلەلەردىڭ ءبىرى – ساپالى بايلانىس پەن ينتەرنەتكە قول جەتكىزۋ. وبلىستا 829 ەلدى مەكەن (ەم) بار. ونىڭ ىشىندە 2G (100 اۋىل)، 3G (386 اۋىل)، 4G (304 اۋىل) ءموبيلدى تەحنولوگيالارى ارقىلى ينتەرنەتپەن قامتاماسىز ەتىلگەن. 203 ەم ADSL تەحنولوگياسى بويىنشا تىركەلگەن ينتەرنەتپەن جانە 416 تالشىقتى-وپتيكالىق تەحنولوگيا ارقىلى قامتاماسىز ەتىلگەن.
سونداي-اق، 9 اۋىلدىق ەلدى مەكەن (اەم) KazSat سپۋتنيكتىك جۇيەسى ارقىلى ينتەرنەت جەلىسىنە قوسىلسا، وبلىستاعى 329 مەكتەپ (330 مەكتەپتىڭ ىشىندە) Starlink سپۋتنيكتىك جۇيەسىنە قوسىلعان.
جىل باسىنان بەرى رەسپۋبليكا بويىنشا بايلانىس وپەراتورلارىنا 115 جوسپاردان تىس تەكسەرۋ جۇرگىزىلىپ، 584 ملن تەڭگە ايىپپۇل سالىندى (292 ملن تەڭگە جەڭىلدىكتى ەسەپكە العاندا بيۋدجەتكە تولەندى). ونىڭ ىشىندە تۇركىستان وبلىسىندا 13 ماۋسىمداعى جاعداي بويىنشا 15 جوسپاردان تىس تەكسەرۋ جۇرگىزىلىپ، 30،5 ملن تەڭگە ايىپپۇل سالىندى (15 ملن تەڭگە جەڭىلدىكتى ەسەپكە العاندا بيۋدجەتكە تولەندى).
مينيسترلىك تۇركىستان وبلىسىنىڭ اكىمدىگىمەن جانە ۇيالى بايلانىس وپەراتورلارىمەن بىرلەسە وتىرىپ، 2023-2027 جىلدارعا ارنالعان بايلانىس جانە ءموبيلدى ينتەرنەت ساپاسىن ارتتىرۋ جونىندەگى جول كارتاسىن ازىرلەپ، وعان قول قويدى.
بۇل قۇجاتتا بارلىق پروبلەمالىق ماسەلەلەر مەن ولاردى شەشۋ جولدارى قامتىلعان. كارتا شەڭبەرىندە وبلىستاعى ليسەنزيالىق مىندەتتەمەلەرگە كىرمەگەن 104 ەم-گە ينتەرنەتكە ءموبيلدى كەڭ جولاقتى قولجەتىمدىلىگىن قامتاماسىز ەتۋ جانە 388 ەم-گە ينتەرنەتكە كەڭ جولاقتى قولجەتىمدىلىكتى قامتاماسىز ەتۋ جوسپارلانۋدا. 101 انتەننالىق دىڭگەك قۇرىلىمدارىن سالۋ، 113 اەم-دە بازالىق ستانسيالاردى ورناتۋ جانە 70 اەم-دە بازالىق ستانسيالاردى جاڭعىرتۋ كوزدەلگەن.
كەزدەسۋ بارىسىندا ءسدياوم وكىلدەرى تۇركىستان وبلىسى تۇرعىندارىنىڭ ۇيالى بايلانىس، ينتەرنەت، جاساندى ينتەللەكت، وبلىستىڭ ەلدى مەكەندەرىندەگى ۇيالى بايلانىس ماسەلەلەرى بويىنشا سۇراقتارىنا جاۋاپ بەردى.
