مەملەكەتىمىزدىڭ زامان تالاپتارىنا ساي بولۋى، ەكونوميكاسى مەن قوعامدىق قارىم-قاتىناستارى دامىعان ەلدەردىڭ ساناتىنا جەتۋى – تاۋەلسىزدىكتىڭ باستى ماقساتى. وسى ورايدا ەلىمىزدە كوپتەگەن يگىلىكتى ىستەر اتقارىلۋدا.

سونىڭ ءبىرى – «سيفرلى قازاقستان» باعدارلاماسى.سيفرلىك ساۋاتتىلىق-اقپاراتتىق قوعامداعى قاۋىپسىزدىكتىڭ نەگىزى، ءححى عاسىردىڭ ەڭ ماڭىزدى ءبىلىمى، ەڭ نەگىزگى تاقىرىپتارىمىزدىڭ ءبىرى.سيفرلىك ساۋاتتىلىق - بۇل ادام ءومىرىنىڭ بارلىق سالالارىندا سيفرلىك تەحنولوگيالاردى سەنىمدى، ءتيىمدى قولدانۋعا دايىندىعى جانە قابىلەتى. وسى تەحنولوگيانى قولدانۋ ارقىلى حالىقتىڭ ءومىر ساپاسىن ارتتىرۋعا جول اشىپ وتىر. سيفرلاندىرۋداعى نەگىزگى ماقسات – باسەكەگە قابىلەتتىلىكتى ارتتىرۋ، حالىقتىڭ ءومىر ءسۇرۋ ساپاسىن جاقسارتۋ، وقۋ-تاربيە پروسەسىن جەدەلدەتۋ جانە جەڭىلدەتۋ، بالالارعا، ۇستازدارعا، اتا-انالارعا جۇكتەمەنى ازايتۋ. ەڭ باستىسى – ءبىلىم بەرۋ ساپاسىن ارتتىرۋ. ءبىزدىڭ بالالارىمىز حالىقارالىق دەڭگەيدە ءارتۇرلى سالالاردا، ونىڭ ىشىندە جاساندى ينتەللەكت جانە اۋقىمدى دەرەكتەر جاساۋ سالاسىندا باسەكەگە قابىلەتتى بولۋعا ءتيىس.

مەملەكەت باسشىسى اتاپ كورسەتكەندەي، ەلدى سيفرلاندىرۋ – بۇل ماقسات ەمەس، بۇل – قازاقستاننىڭ ابسوليۋتتىك ارتىقشىلىققا قول جەتكىزۋ قۇرالى.

بۇكىل پروسەسس جۇيەلىلىكتى، رەتتىلىكتى جانە كەشەندى ءتاسىلدى تالاپ ەتەدى. ءبىلىم سفەراسىنداعى سيفرلاندىرۋدىڭ ەڭ باستى مىندەتى – ءبىلىم بەرۋ ساپاسىن ارتتىرۋ، ياعني حالىقارالىق دەيگەيدە ءارتۇرلى سالالاردا، ونىڭ ىشىندە «جاساندى ينتەللەكت» جانە «اۋقىمدى دەرەكتەر» جاساۋ سالاسىندا باسەكەگە قابىلەتتى ەل جاستارىن دايىنداۋ. بۇگىنگى تاڭدا تۇجىرىمدامالىق تۇردە ءبىلىم بەرۋ جۇيەسى نەگىزگى ءۇش باعىت بويىنشا جۇرگىزىلۋدە: ءبىلىم بەرۋ ۇدەرىسىن سيفرلاندىرۋ، سيفرلىق ءبىلىم بەرۋ كونتەنتى، ءبىلىم بەرۋدى باسقارۋدى سيفرلاندىرۋ.قازاقستاندا مەكتەپتىك ءبىلىم بەرۋدى سيفرلاندىرۋ ونى رەفورمالاۋ ۇردىسىندەگى باستى تەندەنسيالاردىڭ ءبىرى بولىپ تابىلادى. مەكتەپ بويىنشا ءبىلىم بەرۋدى سيفرلاندىرۋدى جۇزەگە اسىرۋدىڭ جوسپارى ازىرلەنىپ، اۋقىمدى جۇمىستار اتقارىلۋدا، ينفراقۇرىلىمى دامۋدا.
اتاپ ايتقاندا مەكتەپتىڭ سيفرلىق پورتفەلى قۇرىلىپ، ۇببدق، «Kundelik.kz»، «Bilimal»، «Bilimland»، «i-mektep»، «i-test»، «Daryn.online» پلاتفورمالارىمەن جۇمىس اتقارۋدا.

سيفرلى قازاقستان باعدارلاماسى اياسىندا دەنساۋلىق ساقتاۋ سالاسىندا بارلىق مەديسينا ۇيىمدارى ينتەگراسيالانعان مەديسينالىق اقپاراتتىق جۇيەگە قوسىلىپ، ناۋقاستار «Damumed» ءموبيلدى قوسىمشاسى ارقىلى قابىلدانۋدا. ءقازىر بالا تۋۋ بويىنشا مەملەكەتتىك قىزمەتتەردى ءسابيلى بولعان اتا-انالار پەرزەنتحانادان شىقپاي، تەلەفوننىڭ كومەگىمەن-اق الا الادى. ياعني تۋۋ تۋرالى كۋالىكتى، بالاباقشاعا كەزەككە قويۋ، جاردەماقىلاردى تاعايىنداۋدى SMSء-تىڭ كومەگىمەن راسىمدەۋگە بولادى. سيفرلاندىرۋ جۇيەسىنىڭ مۇمكىندىكتەرى وتە كوپ.

سيفرلاندىرۋ قازىرگى الەۋمەتتىك-ەكونو­ميكالىق سالالاردىڭ بارلىعىنا ورتاق. دەمەك  الداعى بەس-ون جىلدىڭ ىشىندە الەمنىڭ بارلىق ەلدەرى وسى جولعا تۇسەتىن بولادى. سيفرلاندىرۋ – جاھاندىق ءۇردىس. بۇل ۇردىستەن باسەكەگە قابىلەتتى ەكونوميكانى دامىتۋدى جانە حالقىنىڭ تۇرمىس ساپاسىن جاقسارتۋدى ويلاعان مەملەكەتتەردىڭ ەشبىرى باس تارتپايدى. قازاقستان وسى ەلدەردىڭ قاتارىندا. سوندىقتان ەلىمىزدە «سيفرلى قازاقستان» باعدارلاماسىن ەنگىزدى.

اتالمىش باعدارلاما سيفرلىق تەحنولوگيالاردى قولدانۋ ارقىلى حالىقتىڭ ءومىر ساپاسىن ارتتىرۋعا جول اشادى. «سيفرلى قازاقستان» مەملەكەتتىك باعدارلاماسىن جاساۋ بارىسىندا كوپتەگەن وركەنيەتتى، دامىعان ەلدەردىڭ تاجىريبەسى قولدانىلدى. ولار - سيفرلىق تەحنولوگيانى ىسكە اسىرۋ جولىندا تولاعاي جەتىستىكتەرگە قولجەتكەن اۆستريا، دانيا، اۋستراليا، كانادا مەن سينگاپۋر سەكىلدى ەلدەردى مىسالعا كەلتىرۋگە بولادى.  مىسال، اۆستريا استاناسى ۆەنا قالاسىندا قالالىق قارجىلىق بيۋدجەتتى دايىنداۋدا جوسپارلاۋدىڭ «سيفرلىق» ءپرينسيپى پايدالانىلادى. سونىڭ ناتيجەسىندە، اۆستريا استاناسى ۆەنا قالاسىنىڭ بيۋدجەتىندەگى قارجىنىڭ  جىل سايىن ەكى ميلليون ەۋروسىن ۇنەمدەۋگە كومەكتەسەدى ەكەن. ال، امەريكا قۇراما شتاتتارىنداعى بوستوندا كوممۋنالدى قىزمەت تۇرلەرىن باقىلاۋعا ارنايى ءموبيلدى قوسىمشا بار. وسى سىندى  قوسىمشا ەلىمىزدە قولدانىسقا ەنگىزىلگەلى بەرى تۇرعىندارىنىڭ شاعىمى الپىس التى پايىزعا بىردەن قىسقارعانىن تىلگە تيەك ەتكىم كەلەدى. «سيفرلى قازاقستان» مەملەكەتتىك باعدارلاماسىن ىسكە اسىرۋ قازاقستاننىڭ الەمنىڭ نەعۇرلىم باسەكەلەستىككە قابىلەتتى 30 ەلدەرىنە كىرۋى بويىنشا ماقساتقا جەتۋدىڭ وزەكتى فاكتورى بولۋى ءتيىس. «سيفرلى قازاقستان» باعدارلاماسىنىڭ 4 باعىتىنداعى مىندەتتەردى ناقتى جۇزەگە اسىرساق، قازاقستان وزىق ەلدەر قاتارىنا ەنۋگە مول مۇمكىندىك الادى. مۇنىمەن قوسا، ەل ىشىندەگى ءوندىرىستى جاھاندىق جاڭعىرتۋ جانە سيفرلاندىرۋ شەڭبەرىندە توعىستىرۋ كەرەك. سوندا عانا قازاقستان ەكونوميكاسى دامىعان الەم ەلدەرىنىڭ كوشىنە ىلەسىپ، اقپاراتتىق سالانىڭ تىڭ جەتىستىگىن پايدالاناتىن بولادى.

مىرزاتايەۆ ن.د

ءال-فارابي اتىنداعى قازۇۋ-دىڭ زاڭ فاكۋلتەتى  ازاماتتىق قۇقىق جانە ازاماتتىق ءىس جۇرگىزۋ، ەڭبەك قۇقىعى كافەدرا مەڭگەرۋشىسىنىڭ عىلىمي-يننوۆاسيالىق جۇمىس جانە حالىقارالىق بايلانىستار جونىندەگى ورىنباسارى

اتاحانوۆا س.ك

ءال-فارابي اتىنداعى قازۇۋ-دىڭ زاڭ فاكۋلتەتى  ازاماتتىق قۇقىق جانە ازاماتتىق ءىس جۇرگىزۋ،ەڭبەك قۇقىعى كافەدراسىنىڭ قاۋىمداسقان پروفەسسورى