سۋبسيديالاناتىن جۇمىس ورىندارىن قۇرعىسى كەلەتىن جۇمىس بەرۋشىلەرگە قويىلاتىن تالاپتار كۇشەيتىلەدى، دەپ حابارلايدى Dalanews.kz.
"سىبايلاس جەمقورلىق تاۋەكەلدەرىن ازايتۋ جانە ادامي فاكتوردى بولدىرماۋ ماقساتىندا ق ر ەڭبەك جانە حالىقتى الەۋمەتتىك قورعاۋ مينيسترلىگى سۋبسيديالاناتىن جۇمىس ورىندارىن (سجو) ۇيىمداستىرۋعا ءوتىنىم بەرەتىن جۇمىس بەرۋشىلەرگە قويىلاتىن تالاپتاردى قاتاڭداتۋ بويىنشا جۇمىس جۇرگىزۋدە. جۇمىس بەرۋشىلەردى ىرىكتەۋ پروسەسى 7 مىندەتتى تالاپتارعا نەگىزدەلەدى جانە تولىق اۆتوماتتاندىرىلادى. بۇل رەتتە مەملەكەتتىك سۋبسيديالار العان ۇيىمدار الداعى ۋاقىتتا جۇمىسقا ورنالاستىرىلعان جۇمىسسىزداردىڭ كەمىندە 10%-ىن تۇراقتى جۇمىسپەن قامتۋى ءتيىس"، دەپ حابارلايدى ەڭبەك جانە حالىقتى الەۋمەتتىك قورعاۋ مينيسترلىگى.
ەڭبەكمينى حالىقتى جۇمىسپەن قامتۋ سالاسىنداعى تاسىلدەردى جەتىلدىرۋ بويىنشا جۇرگىزىپ جاتقان جۇمىس شەڭبەرىندە جۇمىس بەرۋشىلەردەن وتىنىمدەردى قابىلداۋ، جۇمىس بەرۋشىلەرمەن سجو ۇيىمداستىرۋعا شارتتار جاساسۋ پروسەستەرى تولىعىمەن اۆتوماتتاندىرىلدى، جۇمىس ورنىنا بارۋ تابەلى ەنگىزىلدى، قاتىسۋشىنىڭ جۇمىس ۋاقىتى ەسەپكە الىندى.
الايدا، سجو-نىڭ جەكە قۇرالدارى ودان ءارى جەتىلدىرۋدى قاجەت ەتەدى.
مىسالى، سجو ۇيىمداستىراتىن جۇمىس بەرۋشىلەردىڭ تىزبەسىن وسى مانساپتىق ورتالىقتاردىڭ نەگىزىندە تىكەلەي ەڭبەك موبيلدىلىگىنىڭ ورتالىقتارى قالىپتاستىرادى. وسىلايشا، شەشىم قابىلداۋ مۇمكىندىگى جەكە ادامدارعا بەرىلەدى.
"جۇمىس بەرۋشىلەر ءتىزىمىن قالىپتاستىرۋ كەزىندە مانساپ ورتالىقتارىنىڭ قىزمەتكەرلەرى وزدەرىنىڭ تانىستارى مەن جاقىن تۋىستارىنىڭ ۇيىمدارىنا ارتىقشىلىق بەرىپ، جۇمىس ورىندارىن ساۋدالايتىن جاعدايلار بولدى. وسىنداي فاكتىلەر انىقتالىپ، ولار بويىنشا ماتەريالدار ءتيىستى مەملەكەتتىك ورگاندارعا بەرىلەدى"، – دەدى ەڭبەكمينى حالىقتى جۇمىسپەن قامتۋ دەپارتامەنتىنىڭ ديرەكتورى قانات ابدۋللا.
مينيسترلىك مۇنداي جاعدايلارعا جول بەرمەۋ ءۇشىن ءتيىستى بۇيرىققا تۇزەتۋلەر دايىندالدى.
وزگەرىستەرگە سايكەس، جۇمىس بەرۋشىلەر كەلەسى تالاپتارعا ساي بولعان جاعدايدا سجو ۇيىمداستىرۋعا قاتىسا الادى:
- قازاقستان اۋماعىندا تىركەلگەن جۇمىس ىستەپ تۇرعان زاڭدى تۇلعا نەمەسە دارا كاسىپكەر مارتەبەسىنىڭ بولۋى؛
- سۋبسيديالاناتىن جۇمىس ورىندارىن ۇيىمداستىرۋعا ءوتىنىم بەرىلگەن كۇنگە دەيىن 12 ايدان استام قىزمەتتى جۇزەگە اسىرۋ؛
- ءوتىنىم بەرۋ ساتىندە جالاقى بويىنشا مەرزىمى وتكەن بەرەشەكتىڭ بولماۋى؛
- سوڭعى 12 اي ىشىندە جۇمىسكەرلەر ءۇشىن الەۋمەتتىك تولەمدەردى تۇراقتى جۇرگىزۋ؛
- ق ر قارجى مينيسترلىگى مەملەكەتتىك كىرىستەر كوميتەتىنىڭ سەنىمسىز سالىق تولەۋشىلەر تىزىمىندە بولماۋى؛
- ەڭبەك موبيلدىلىگى ورتالىعىمەن جاسالعان سۋبسيديالاناتىن جۇمىس ورىندارىن ۇيىمداستىرۋ تۋرالى الدىڭعى شارتتار بويىنشا بارلىق مىندەتتەمەلەردى ورىنداۋ؛
- بانكروتتىق نەمەسە جويۋ راسىمىنە جاتپايدى.
جۇمىس بەرۋشىلەردىڭ كورسەتىلگەن تالاپتارعا سايكەستىگىن تەكسەرۋ ەلەكتروندىق ەڭبەك بيرجاسىنا وتىنىمدەر بەرگەن كەزدە اۆتوماتتى رەجيمدە جۇزەگە اسىرىلاتىن بولادى. جۇمىس ورىندارى قىزمەتكەرلەردىڭ تىزىمدىك سانىن ەسكەرە وتىرىپ بولىنەتىن بولادى.
سجو ۇيىمداستىرۋ ءۇشىن مەملەكەتتىك سۋبسيديالار العان جۇمىس بەرۋشىلەر بولاشاقتا جۇمىسقا ورنالاستىرىلعان جۇمىسسىزداردىڭ كەمىندە 10%-ىن تۇراقتى جۇمىسپەن قامتاماسىز ەتۋگە ءتيىس.
"بۇل تالاپتى ەنگىزۋ سۋبسيديالاناتىن جۇمىس ورىندارىندا جۇمىسىن اياقتاعان ازاماتتاردىڭ تۇراقتى جۇمىسپەن قامتىلۋىن قامتاماسىز ەتۋ قاجەتتىلىگىنە بايلانىستى. جۇمىسقا ورنالاسۋ دەڭگەيى وبەكتيۆتى سەبەپتەرمەن جۇمىسقا ورنالاسا المايتىن ادامداردى ەسەپكە الماي ەسەپتەلەدى. بۇل تالاپ ءوز شتاتىندا 10 جانە ودان دا كوپ قىزمەتكەرى بار جۇمىس بەرۋشىلەرگە قولدانىلادى"، – دەپ ءتۇسىندىردى قانات ابدۋللا.
سونىمەن قاتار مەملەكەتتەن قوسارلانعان قارجىلاندىرۋدى بولدىرماۋ جانە مەملەكەتتىك قولداۋ شارالارىنىڭ اتاۋلىلىعىن ارتتىرۋ ماقساتىندا جۇمىس بەرۋشىلەر ءۇشىن شەكتەۋلەر ەنگىزىلەدى.
وسىلايشا، ارناۋلى الەۋمەتتىك قىزمەتتەر كورسەتۋگە ليسەنزياسى بار، ينفراقۇرىلىمدىق جوبالار بويىنشا مەملەكەتتىك ساتىپ الۋ شەڭبەرىندە قىزمەتتەر كورسەتەتىن نەمەسە جۇمىستى ورىندايتىن جۇمىس بەرۋشىلەر سجو ۇيىمداستىرۋعا قاتىسۋعا جىبەرىلمەيدى.
ارناۋلى الەۋمەتتىك قىزمەتتەر كورسەتەتىن ورتالىقتاردى (بۇدان ءارى – ااقكو) ليسەنزيالاۋ شەڭبەرىندە ەحاقم سۋبسيديالاناتىن جۇمىس ورىندارىن ۇيىمداستىرۋعا ااقكو-نىڭ قاتىسۋىنا تالداۋ جاسالدى.
2025 جىلى ااقكو-مەن ەڭبەك ۇتقىرلىعى ورتالىقتارى جالپى سوماسى 519،8 ملن تەڭگەگە 3،8 مىڭ ادامعا ارنالعان سجو ۇيىمداستىرۋعا شارتتار جاساستى. 189 ارناۋلى الەۋمەتتىك قىزمەتتەر كورسەتەتىن ورتالىقتاردا 919 ادام جۇمىسقا ورنالاستىرىلدى، ولاردىڭ جالاقىسىن تولەۋگە بيۋدجەتتەن 60،8 ملن تەڭگە جۇمسالدى.
ەحاقم جەرگىلىكتى اتقارۋشى ورگاندارمەن بىرلەسىپ، سۋبسيديالاناتىن جۇمىس ورىندارىنا قاتىسۋشىلاردى تۇراقتى جۇمىسپەن قامتۋدى قامتاماسىز ەتۋ بويىنشا ااقكو-مەن جۇمىس جۇرگىزدى. وسىلايشا، 212،6 ملن تەڭگە قاراجات ۇنەمدەلدى، ول حالىقتى جۇمىسپەن قامتۋعا جاردەمدەسۋ شارالارىنا قايتا بولىنەتىن بولادى.
بۇدان باسقا، مەملەكەتتىك ءبىلىم بەرۋ تاپسىرىسى نەمەسە تەگىن مەديسينالىق كومەكتىڭ كەپىلدىك بەرىلگەن كولەمى شەڭبەرىندە بيۋدجەتتەن قارجى الاتىن جۇمىس بەرۋشىلەر جاستار پراكتيكاسىن ۇيىمداستىرۋعا عانا جىبەرىلەتىن بولادى.
حالىقتىڭ مۇقتاج ساناتتارىنىڭ اراسىنان شىققان ادامدارعا مەملەكەتتىك قولداۋ شارالارىن كورسەتۋ، ۇمىتكەرلەردىڭ تاۋەلدىلىك كوڭىل-كۇيىن تومەندەتۋ ماقساتىندا ەكى جىل ىشىندە ءبىر رەت سجو-عا جۇمىسقا ورنالاستىرۋ ۇسىنىلادى.
بۇل تالاپ اۋىلدىق جەرلەردە نەمەسە شاعىن قالالاردا تۇراتىن ادامدارعا، مونوقالالار مەن قالالاردا تۇراتىن حالىقتىڭ الەۋمەتتىك وسال توپتارىنا قولدانىلمايدى.
بۇل رەتتە الەۋمەتتىك وسال توپتارعا مىنالار جاتادى:
- مۇگەدەكتىگى بار ادامدار؛
- اتاۋلى الەۋمەتتىك كومەك الۋشىلار؛
- اسىراۋشىسىنان ايىرىلۋ جاعدايى بويىنشا الەۋمەتتىك تولەم الۋشىلار؛
- قونىس اۋدارۋشىلار؛
- قانداستار؛
- مۇگەدەكتىگى بار بالانى (مۇگەدەكتىگى بار بالالاردى) تاربيەلەپ وتىرعان ادامدار؛
- اي سايىن كوپبالالى وتباسىلارعا بەرىلەتىن مەملەكەتتىك جاردەماقىنى الۋشىلار.
سۋبسيديالاناتىن جۇمىس ورىندارىنا جۇمىسقا ورنالاسۋعا ۇمىتكەرلەردەن ءوتىنىش تەك ەلەكتروندىق ەڭبەك بيرجاسى ارقىلى قابىلداناتىن بولادى.
