قانات بوزىمبايەۆ اقمولا وبلىسىنىڭ باسپاناسىز قالعان تۇرعىندارىن تامىز ايىنىڭ ورتاسىنا دەيىن قونىستاندىرۋدى تاپسىردى، - دەپ حابارلايدى Dalanews.kz.

ۆيسە-پرەمەر قانات بوزىمبايەۆ اقمولا وبلىسىنىڭ اكىمى مارات احمەتجانوۆپەن سۋ تاسقىنى سالدارىن جويۋ بويىنشا كەڭەس وتكىزدى.

اقمولا وبلىسىندا بارلىعى 1817 ءۇي سۋ استىندا قالدى، ونىڭ 359-ى اپات جاعدايىندا دەپ تانىلسا، قالعان ۇيلەر جوندەۋگە بولاتىن باسپانالار ساناتىنا جاتادى.

"وڭىردەگى ۇيلەردى جوندەۋ مەن سالۋعا بارلىعى 10،5 ملرد تەڭگە قاجەت. الداعى ۋاقىتتا شامامەن 4 ملرد تەڭگە تابۋ قاجەت. اكىمدىكتىڭ الدىنا 15 تامىزعا دەيىن سۋ تاسقىنىنان زارداپ شەككەن اقمولا وبلىسىنىڭ تۇرعىندارى جوندەلگەن جانە جاڭادان سالىنعان نەمەسە ساتىپ الىنعان ۇيلەرگە كىرۋى ءتيىس دەگەن مىندەت قويىلدى. جۇمىس كەستەسى بار، مەردىگەرلەر انىقتالىپ، بارلىق ءتيىستى قاراجات بولىنەتىن بولادى"، - دەدى ۆيسە-پرەمەر قانات بوزىمبايەۆ.

حالىقتىڭ قاۋىپسىزدىگىن قامتاماسىز ەتۋ جانە ولاردى سۋ باسقان ايماقتاردان كوشىرۋ ءۇشىن اتباسار اۋدانىنىڭ اتباسار قالاسىندا 45 پاتەرلى ەكى تۇرعىن ءۇي سالۋ جوسپارلانىپ وتىر.

سونىمەن قاتار، بۇلاندى جانە جارقايىڭ اۋداندارىندا 87 جەكە ءۇي سالىنباق.

"ءبىز تج رەجيمى جاريالانعان وڭىرلەردە: كوكشەتاۋدا - 89، جارقايىڭ اۋدانىندا - 27، ەسىل اۋدانىندا – 22، استراحان اۋدانىندا – 34 جانە جاقسى اۋدانىندا - 10 دايىن پاتەر مەن ۇيلەرى ساتىپ الاتىن بولامىز. ءقاۋىپسىز ايماقتا بارلىعى 182 ءۇي ساتىپ الۋ جوسپارلانىپ وتىر"، - دەدى اقمولا وبلىسىنىڭ اكىمى مارات احمەتجانوۆ.

سونداي-اق، جەرگىلىكتى بيلىك وبلىستىڭ جول جانە ينجەنەرلىك ينفراقۇرىلىمىن قايتا جاڭعىرتۋى كەرەك. بۇل ماقساتتارعا ۇكىمەت رەزەرۆىنەن قاراجات بولىنەدى. ۆيسە-پرەمەردىڭ تاپسىرماسى بويىنشا اۆتوجولداردى، كوپىرلەر مەن ەلەكتر جەلىلەرىن قالپىنا كەلتىرۋ جۇمىستارى شىلدە ايىندا اياقتالۋعا ءتيىس.