Qanat Bozymbaev Aqmola oblysynyń baspanasyz qalǵan turǵyndaryn tamyz aiynyń ortasyna deiin qonystandyrýdy tapsyrdy, - dep habarlaidy Dalanews.kz.
Vitse-premer Qanat Bozymbaev Aqmola oblysynyń ákimi Marat Ahmetjanovpen sý tasqyny saldaryn joiý boiynsha keńes ótkizdi.
Aqmola oblysynda barlyǵy 1817 úi sý astynda qaldy, onyń 359-y apat jaǵdaiynda dep tanylsa, qalǵan úiler jóndeýge bolatyn baspanalar sanatyna jatady.
"Óńirdegi úilerdi jóndeý men salýǵa barlyǵy 10,5 mlrd teńge qajet. Aldaǵy ýaqytta shamamen 4 mlrd teńge tabý qajet. Ákimdiktiń aldyna 15 tamyzǵa deiin sý tasqynynan zardap shekken Aqmola oblysynyń turǵyndary jóndelgen jáne jańadan salynǵan nemese satyp alynǵan úilerge kirýi tiis degen mindet qoiyldy. Jumys kestesi bar, merdigerler anyqtalyp, barlyq tiisti qarajat bólinetin bolady", - dedi vitse-premer Qanat Bozymbaev.
Halyqtyń qaýipsizdigin qamtamasyz etý jáne olardy sý basqan aimaqtardan kóshirý úshin Atbasar aýdanynyń Atbasar qalasynda 45 páterli eki turǵyn úi salý josparlanyp otyr.
Sonymen qatar, Bulandy jáne Jarqaiyń aýdandarynda 87 jeke úi salynbaq.
"Biz TJ rejimi jariialanǵan óńirlerde: Kókshetaýda - 89, Jarqaiyń aýdanynda - 27, Esil aýdanynda – 22, Astrahan aýdanynda – 34 jáne Jaqsy aýdanynda - 10 daiyn páter men úileri satyp alatyn bolamyz. Qaýipsiz aimaqta barlyǵy 182 úi satyp alý josparlanyp otyr", - dedi Aqmola oblysynyń ákimi Marat Ahmetjanov.
Sondai-aq, jergilikti bilik oblystyń jol jáne injenerlik infraqurylymyn qaita jańǵyrtýy kerek. Bul maqsattarǵa Úkimet rezervinen qarajat bólinedi. Vitse-premerdiń tapsyrmasy boiynsha avtojoldardy, kópirler men elektr jelilerin qalpyna keltirý jumystary shilde aiynda aiaqtalýǵa tiis.
