قازاقستاننىڭ وڭتۇستىگىندە ستوماتولوگيا سالاسىندا جۇزدەگەن ميلليون تەڭگەگە قاتىستى قارجى جىمقىرۋ فاكتىلەرى انىقتالدى، دەپ حابارلايدى Dalanews.kz.
تۇركىستان وبلىسى پروكۋراتۋراسى جۇرگىزگەن تەكسەرىس بارىسىندا مەملەكەتتىك جانە جەكەمەنشىك كلينيكالاردا ورەسكەل زاڭبۇزۋشىلىقتار اشكەرەلەندى.
انىقتالعان دەرەكتەرگە سايكەس:
- ءبىر جەكەمەنشىك كلينيكا ءتيىستى ليسەنزياسىز-اق 28 مىڭنان استام مەديسينالىق كەڭەس “كورسەتكەن”. قۇجات جۇزىندە وفتالمولوگتان باستاپ ونكولوگقا دەيىنگى قىزمەتتەر راسىمدەلگەن. وسىلايشا مەكەمە زاڭسىز تۇردە 91 ملن تەڭگە العان.
- ءوزارا بايلانىستى ەكى كلينيكا جۇكتى ايەلدەر مەن بالالارعا كورسەتىلدى دەپ 40 مىڭ جالعان ستوماتولوگيالىق قىزمەتتى تىركەپ، 203 ملن تەڭگەنى نەگىزسىز يەمدەنگەن. تەرگەۋ مالىمەتىنشە، ءبىر ستوماتولوگ ءبىر مەزەتتە بىرنەشە جەردە ونداعان ناۋقاستى “قابىلداعان” بولىپ كورسەتىلگەن.
اتالعان فاكتىلەر بويىنشا الاياقتىق بەلگىلەرىمەن ءىس ماتەريالدارى سوتقا جولداندى.
