سولتٷستٸك قازاقستان وبلىسىندا 25 جەكەمەنشٸك سوت ورىنداۋشىسى 2023 جىلعا ارنالعان جەكە تابىس سالىعى بويىنشا دەكلاراتسييادا ٶز كٸرٸستەرٸن ەدەيٸ تٶمەندەتكەنٸ انىقتالدى. جاسىرىلعان تابىستىڭ جالپى كٶلەمٸ - 133,5 ملن تەڭگە, ال تٶلەنبەگەن سالىق سوماسى 13,2 ملن تەڭگەگە جەتكەن, دەپ حابارلايدى Dalanews.kz.
باس پروكۋراتۋرانىڭ مەلٸمەتٸنشە, تەكسەرٸس بارىسىندا سوت ورىنداۋشىلارىنىڭ تابىستاردى دەكلاراتسييالاۋ كەزٸندە زاڭ بۇزۋشىلىقتارعا جول بەرگەنٸ انىقتالعان.
"باقىلاۋ ورگانى 2023 جىلعا ارنالعان 240.00 نىساندى دەكلاراتسييانى تالداۋ كەزٸندە بٸرقاتار سوت ورىنداۋشىلارىنىڭ تابىستى ەدەۋٸر ازايتىپ كٶرسەتكەنٸن انىقتادى. بارلىعى 25 تۇلعا 133,5 ملن تەڭگە كٶلەمٸندەگٸ تابىسىن جاسىرعان, نەتيجەسٸندە 13,2 ملن تەڭگە سالىق تٶلەنبەي قالعان", – دەلٸنگەن حابارلامادا.
تٸپتٸ كەيبٸرەۋلەرٸ تابىسى مٷلدە بولماعانداي نٶلدٸك دەكلاراتسييا تاپسىرعان.
مىسالى, بٸر سوت ورىنداۋشىسى 459 اتقارۋ قۇجاتىن ورىنداپ, سونىڭ نەتيجەسٸندە 4,5 ملن تەڭگە تابىس تاپقان, بٸراق دەكلاراتسيياسىندا تابىس جوق دەپ كٶرسەتٸپ, 449 مىڭ تەڭگە سالىقتان جالتارعان.
پروكۋرورلىق تەكسەرٸستەن كەيٸن سالىق ورگاندارى كامەرالدىق باقىلاۋ جٷرگٸزٸپ, زاڭ بۇزۋشىلىقتاردى تٷزەتۋ شارالارىن قابىلداعان.
نەتيجەسٸندە 11 سوت ورىنداۋشىسى دەكلاراتسيياسىن ناقتىلاپ, 27,4 ملن تەڭگە تابىستى قايتا كٶرسەتٸپ, 2,6 ملن تەڭگە سالىقتى ٶز ەركٸمەن تٶلەدٸ.
قازٸر باس پروكۋراتۋرانىڭ اكتٸسٸن ورىنداۋ اياسىندا ۋەكٸلەتتٸ ورگان قالعان سالىق قارىزدارىن ٶندٸرٸپ الۋ بويىنشا شارالار قابىلداپ جاتىر.
