تۋريزم جانە سپورت ءمينيسترىنىڭ بۇيرىعىمەن قازاقستان رەسپۋبليكاسىنىڭ سپورتتىق ادەبى بەكىتىلدى. بۇيرىق 8 شىلدەدە العاشقى رەسمي جاريالانىپ، ەندى كۇنتىزبەلىك ون كۇن وتكەن سوڭ، ياعني 19 شىلدەدە قولدانىسقا ەنگىزىلەدى، - دەپ حابارلايدى Dalanews.kz kaz.inform.kz-كە سىلتەپ.

سپورتتىق ادەپ «دەنە شىنىقتىرۋ جانە سپورت تۋرالى» زاڭنىڭ 7-بابى 65-2) تارماقشاسىنا، جالپى قابىلدانعان مورالدىق-ەتيكالىق نورمالارعا سايكەس ازىرلەنگەن جانە سپورتشىلاردىڭ، جاتتىقتىرۋشىلاردىڭ، جاتتىقتىرۋشى-وقىتۋشىلار مەن سپورت تورەشىلەرىنىڭ مىنەز-قۇلىعىنىڭ نەگىزگى ەرەجەلەرىن بەلگىلەيدى.

سپورتشىلار، جاتتىقتىرۋشىلار، جاتتىقتىرۋشى-وقىتۋشىلار جانە سپورت تورەشىلەرى:

1) قوعامعا جات مىنەز-قۇلىق جاعدايلارىنا، ونىڭ ىشىندە قوعامدىق ورىنداردا ادامنىڭ قادىر-قاسيەتىن جانە قوعامدىق يماندىلىقتى قورلايتىن الكوگولدىك، ەسىرتكىلىك نەمەسە ۋىت-قۇمارلىق ماس كۇيىندە بولۋىنا جول بەرمەيدى؛

2) ادال ويىن جانە ادال سپورتتىق جارىس قاعيداتتارىن ساقتايدى؛

3) ۇلتتىق كوماندالاردىڭ وكىلدەرىنە، قارسىلاستارىنا، كورەرمەندەرگە جانە سپورتتىق جارىستاردى ۇيىمداستىرۋشىلارعا سپورتتىق ءىس-شارالاردا قۇرمەتپەن قارايدى؛

4) باسقا سپورتشىلاردىڭ، ۆولونتەرلەردىڭ قۇقىقتارى مەن قادىر-قاسيەتىن قۇرمەتتەيدى، سونىمەن قاتار ولارعا قاتىستى كەمسىتۋشىلىككە جول بەرمەيدى جانە سپورتتىق ءىس-شارالار مەن ماراپاتتاۋ راسىمدەرى وتەتىن جەرلەردە ساياسي شەرۋلەرگە قاتىسپايدى؛

5) ءوزىنىڭ سپورتتىق بەدەلىنە زيان كەلتىرۋى مۇمكىن داۋلى جاعدايلاردان اۋلاق بولادى؛

6) قازاقستان رەسپۋبليكاسىنىڭ مەملەكەتتىك ەلتاڭباسىنا، قازاقستان رەسپۋبليكاسىنىڭ مەملەكەتتىك تۋىنا، قازاقستان رەسپۋبليكاسىنىڭ مەملەكەتتىك گيمنىنە، سونداي-اق سپورتتىق جارىستارعا قاتىسۋشى ەلدەردىڭ مەملەكەتتىك رامىزدەرىنە ۇقىپتى جانە قۇرمەتپەن قارايدى؛

7) قازاقستان رەسپۋبليكاسى مەملەكەتتىك گيمنىنىڭ مۋزىكالىق رەداكسياسىن، ءماتىنىن بىلەدى؛

8) قازاقستان رەسپۋبليكاسىنىڭ مەملەكەتتىك گيمنىن ورىنداۋ كەزىندە سپورتتىق ادەپتىڭ ەتيكالىق نورمالارىن ۇستانادى؛

9) تورەشى شەشىمىنە قۇرمەتپەن قارايدى جانە كوپشىلىك داۋلاردان اۋلاق بولادى؛

10) سپورتتىق جارىستاردىڭ قورىتىندىسى بويىنشا الىنعان سپورتتىق ماراپاتتارعا (كۋبوكتارعا، مەدالدارعا، گراموتالارعا جانە ديپلومدارعا) ۇقىپتى جانە قۇرمەتپەن قارايدى؛

11) سپورتتىق جارىستاردا ماراپاتتاۋ راسىمىنە قاتىسادى؛

12) سپورتتىق جارىستاردا، ماراپاتتاۋ ءراسىمى كەزىندە، رەسمي سۋرەتكە ءتۇسىرۋ جانە ماسس-مەديامەن جۇمىس ىستەۋ كەزىندە سپورت ءتۇرى بويىنشا قازاقستان رەسپۋبليكاسىنىڭ ۇلتتىق كومانداسىنىڭ نەمەسە ءوزىنىڭ سپورت كلۋبىنىڭ سپورتتىق كوستيۋمدەرىندە بولادى؛

13) سپورتتىق ءىس-شارانى جاريالايتىن ماسس-مەديا وكىلدەرىنىڭ جۇمىسىنا قۇرمەتپەن قارايدى؛

14) باسقا سپورتشىلارعا ەلىكتەۋ ءۇشىن ۇلگى رەتىندە ونەر كورسەتەدى؛

15) سپورتتىق جارىستاردىڭ ەرەجەسىن (رەگلامەنتىن) ساقتايدى.

سپورتشىلارعا، جاتتىقتىرۋشىلارعا، جاتتىقتىرۋشى-وقىتۋشىلارعا جانە سپورت تورەشىلەرىنە مىناداي تىيىمدار سالىنادى:

— وقۋ-جاتتىعۋ پروسەسىنە قاتىسى بار اقپاراتتى جاريا ەتۋگە؛

— سپورتتىق ءىس-شارا كەزىندە نەمەسە ودان كەيىن بىلاپىت سوزدەر مەن نورماتيۆتىك ەمەس لەكسيكانى، قورلاۋ قيمىلدارىن پايدالانۋعا؛

— سپورتتىق جارىستاردىڭ نەمەسە وقۋ-جاتتىعۋ جيىندارىنىڭ بارىسىن سەبەپسىز بۇزاتىن نەمەسە ارالاساتىن نە قازاقستان رەسپۋبليكاسىنىڭ بەدەلىنە نەمەسە يميدجىنە تەرىس اسەر ەتەتىن كەز كەلگەن ارەكەت نەمەسە مىنەز-قۇلىققا؛

— ىم ءتىلى مەن ميميكانى قوسا العاندا، جازباشا نەمەسە اۋىزشا تۇردە سپورتتىق ءىس-شارانى وتكىزۋ الدىندا، وتكىزۋ كەزىندە جانە (نەمەسە) وتكىزگەننەن كەيىن قانداي دا ءبىر ادامعا ءقاۋىپ توندىرۋگە؛

— كوماندادا ءوزىنىڭ ءدىني نانىمدارىن اشىق كورسەتۋگە جانە باسقا ادامداردى ءدىني بىرلەستىكتەردىڭ قىزمەتىنە قاتىسۋعا جانە ميسسيونەرلىك قىزمەتپەن اينالىسۋعا ءماجبۇر ەتۋگە.