سانجار بوقايەۆ دەگەن ازامات «ءقازىر عانا تويوتا، نيسسان، فولكسۆاگەننىڭ ارنايى ديللەرلەرمەن سويلەستىم. ولار ەرتەڭنەن باستاپ جاڭا اۆتوموبيلدەردىڭ باعاسى ۋتيلسبوردىڭ قىسقارعان باعاسىنا دەيىن ارزاندايدى دەپ وتىر. بۇل مەنىڭ ەسەبىم بويىنشا ورتاشا 700 مىڭ تەڭگەنى قۇرايدى» دەپ ءسۇيىنشى سۇرادى.
كەشىرىڭىز، بوقايەۆ مىرزا! اۆتوالپاۋىت، اۆتومونوپوليست نۇرلان سماعۇلوۆتىڭ "تويوتا" ورتالىعىندا قۇنى 17 ملن نەمەسە 13 ملن تۇراتىن "تويوتانىڭ" 700 مىڭ تەڭگەگە ارزانداعانىنان قاي كەدەي قازاق ۇتادى؟
بۇل كەزدە سكلياردىڭ "ۋتيلسبوردى 50 پايىزعا عانا ارزانداتامىز" دەگەن كوپتەن كۇتتىرگەن جاۋابى دا جاريا بولعان.
ءبارى ءبىر كۇندە، ءبىر مەزگىلدە جاريا بوپ، ايتىلىپ جاتىر. بۇل جەردە ءبىر كەلىسۋ بار ەمەس پە؟ بۇل ەلدى الداۋ ەمەس پە؟ ەلدى تاعى دا شاتاستىرۋ ەمەس پە؟ جۇرتتى ءبىر اي بويى زارىقتىرىپ بارىپ ايتقانداعى "سۇيىنشىلەرى" وسى بولسا، سەنگەن ازاماتتارىمىزعا نە دەيمىز؟
بۇل جەردە ەكىجاقتى ءوزارا كەلسۋ بار سياقتى. حالىق سەنگەن ادامدار سول حالىقتىڭ تىلەگىن ورىنداۋدىڭ ورنىنا، اۆتوالپاۋىتتار مەن ولاردىڭ سكليار سياقتى "كرىشالارىنىڭ" ىڭعايىنا جىعىلىپ كەتكەن سياقتى.
نەگە؟ ويتكەنى العاشقى كەزدە ايتىلعان "ۋتيلسبوردىڭ قۇنى 100 مىڭ تەڭگەنىڭ دەڭگەيىنە دەيىن تومەندەيدى" دەگەن سوزگە تۇرۋ جوق. ونى حالىققا ۇمىتتىردى. ەسىنەن شىعاردى. ءسويتىپ بار بولعانى 50 پايىز ارزانداتۋعا ريزا بول دەپ ءوزىمىز ءۇمىت ارتقان ازاماتتار وزىمىزگە باسۋ ايتىپ جاتىر. سول ءۇشىن اي، اي جارىم ۋاقىت سوزىپ ءجۇرىپ الۋ كەرەك پە ەدى؟
بۇل نەنى كورسەتەدى؟ بۇل – حالىقتىڭ قامىن ويلاپ، حالىقتىڭ قالتاسىنا سالماق سالمايمىز، جاڭا قازاقستان قۇرامىز دەگەن پرەزيدەنتتىڭ تاپسىرماسىن سكليار باستاپ اياققا تاپتاۋ، ياعني ورىنداماۋ دەگەن ءسوز. ايتقانىن جوققا شىعارۋ، تارك ەتۋ دەگەن ءسوز.
قاڭتارداعى بەيبىت شەرۋگە كوپتەگەن ادامدار سۇيىتىلعان گازدىڭ باعاسىن ارزانداتۋ ءۇشىن عانا ەمەس، "جاۋ جاعادان العاندا، ءبورى ەتەكتەن تارتقانداي" بوپ جۇرگەن وسى ۋتيلسبوردان تيتىقتاعاندارى ءۇشىن دە شىققانىن ۇمىتپايىق.
