بۇگىن سوزاق اۋداندىق اكىمدىگىنىڭ كىشى ءماجىلىس زالىندا وبلىستىق ىشكى ساياسات باسقارماسىنىڭ تاپسىرىسى نەگىزىندە "وبلىستىق ازاماتتىق اليانس" زاڭدى تۇلعالار قاۋىمداستىعىنىڭ ۇيىمداستىرۋىمەن "اۋدان، قالاداعى اقپاراتتىق رەسۋرستىق ورتالىقتاردىڭ جۇمىسىن جانداندىرۋ ارقىلى اۋىلدىق جەردەگى ۇكىمەتتىك ەمەس ۇيىمداردىڭ دامۋىنا قولداۋ كورسەتۋ جانە الەۋمەتتىك يدەيالار مەن جوبالار جازۋعا ۇكىمەتتىك ەمەس ۇيىمداردى تارتۋ جۇمىستارىن جۇرگىزۋ" جوباسى اياسىندا "ۇكىمەتتىك ەمەس ۇيىمدار ءۇشىن قارجى كوزدەرى جانە الەۋمەتتىك جوبالارداعى يننوۆاسيا" تاقىرىبىندا سەمينار-ترەنينگ وتكىزىلدى.

اتالعان ترەنينگكە سوزاق اۋدانىنداعى قوعامدىق ۇيىمداردىڭ ءتوراعالارى، ىشكى ساياسات ءبولىمىنىڭ ماماندارى مەن ب ا ق وكىلدەرى قاتىستى.

ترەنينگ اياسىندا قوعامدىق ۇيىمدارعا الەۋمەتتىك جوبا جازۋدا جاڭاشىلدىقتى (نوۋحاۋ) قولدانۋ جانە قارجى كوزدەرىن قالاي تارتۋ كەرەكتىگى ءتۇسىندىرىلىپ، سۇراقتارعا جاۋاپ بەرىلدى.

ايتا كەتەتىن جايت، سوزاق اۋدانىندا زاڭدى تۇردە تىركەلگەن 15 قوعامدىق ۇيىم بار ەكەنىن ەسكەرسەك، ونىڭ ىشىندە 7-8 ۇيىم عانا بەلسەندى جۇمىس جاساپ كەلەدى. الداعى جىلى قوعامدىق ۇيىمداردىڭ بەلسەندىلىگىن ارتتىرۋعا جەرگىلىكتى مەكەمە، بولىمدەرمەن بىرلەسىپ جۇمىستار جۇرگىزىلەدى.

 

ب.سارجانوۆ، "ازاماتتىق اليانس" زاڭدى تۇلعالار قاۋىمداستىعىنىڭ مۇشەسى، اۋداندىق قوعامدىق ۇيىمدارعا ارنالعان اقپاراتتىق رەسۋرستىق ورتالىعىنىڭ وكىلى.